Ногоон автобус худалдан авсан ажлын хэсгийнхэн "юун дээр гарын үсэг зурснаа мэдээгүй" гэв

Ногоон автобусны хэргээр 25 хүнд эрүүгийн хэрэг үүсгэж, яллагдагчаар татсан. Үүнд хэдийнээ олон нийт мэдэх болсон С.Жавхлантбаатар, Ж.Сүхбаатар гэх дүрүүд болон Тэнүүн огоо ХХК-ийн ерөнхий захирал болон гүйцэтгэх захирал нар багтдаг.

Харин үлдсэн хэд нь нийслэлээс томилогдсон автобус худалдан авах ажлын хэсгийнхэн.

Нэг бүр нь 339 сая 646 мянга 535 төгрөгийн үнэтэй BS 106 гэсэн автобусыг шаардлага хангасан эсэхийг шалгаж, төрийг төлөөлж автобус худалдан авах уу, авахгүй юу гэдгийг шийдэх үүрэгтэй байсан. Гэвч тэд хөдөлгүүрийн зөрүүтэй техникийн шаардлага хангаагүй автобусыг төрийн мөнгөөр худалдан авах актыг үйлдсэн.

Иймд тус ажлын албанд ямар ямар хүмүүс байсан. Тэд өнөөдөр хэрхэн мэдүүлж буй талаарх мэдээллийг хүргэж байна.

-Хульх автобус худалдан хүлээн авсан ажлын хэсгийнхэн-

Нийслэлийн Нийтийн Тээврийн Газраас их багтаамжийн автобусыг хүлээлцэх ажлын хэсэг 2023 оны зургаадугаар сард Б.Мөнхболд даргатай, 15 хүний бүрэлдэхүүнтэй байгуулагдсан. Энэ бүрэлдэхүүнд дараах газруудаас гишүүдийг томилсон.

НЗДТГ:

• НЗДТГ-ын хөгжлийн бодлого төлөвлөлтийн хэлтсийн даргын үүргийг түр орлон гүйцэтгэгч Ганболдын Мишээлт

Нийслэлийн худалдан авах ажиллагааны газар:

• НХААГ-ын дарга Гомбо-Очирын Энхтайван
• НХААГ-ын Худалдан авах ажиллагааны хэлтсийн мэргэжилтэн Шарын Баярсүх
• НХААГ-ын мэргэжилтэн Амарбаясгалангийн Нарангэрэл

Нийслэлийн нийтийн тээврийн газар:

• ННТГ-ын Санхүү хөрөнгө оруулалтын хэлтсийн дарга бөгөөд ерөнхий нягтлан бодогч Батмөнхийн Баярмаа
• ННТГ-ын Зорчигч тээврийн үйлчилгээний хэлтсийн дарга Бадам-Одсэрийн Дөлгөөн
• ННТГ-ын Техник технологийн хэлтсийн дарга Баатарын Мөнхболд
• ННТГ-ын Техникийн хяналтын үзлэгийн инженер Баттогтохын Алтаншагай
• ННТГ-ын Техникийн технологийн хэлтсийн Нийтийн тээврийн Цахилгаан хангамж хариуцсан инженер Дуньдхүүгийн Цогтбадрах

Нийслэлийн тээврийн газар:

• Нийслэлийн тээврийн газрын тээврийн бодлого төлөвлөлт хариуцсан ахлах мэргэжилтэн Однасангийн Хонгорзул
• Нийслэлийн тээврийн газрын Хөрөнгө оруулалт гадаад харилцаа хариуцсан мэргэжилтэн Лхагважавын Солонго
• Нийтийн тээврийн улсын байцаагч Очирсүрэнгийн Сүхбаатар

Хотын стандарт хяналтын газар:

• Хотын стандарт хяналтын газрын авто тээврийн хяналтын улсын ахлах байцаагч Цэндийн Хадбаатар
• Хотын стандарт хяналтын газрын Тээврийн хяналтын улсын байцаагч Удмаагийн Энхтөр

Зорчигч тээврийн нэгтгэл ОНӨААТҮГ:

• ЗТНОНӨААТҮГ-ын Техникийн хэлтсийн дарга Оросоогийн Лувсандагва

-Ажлын хэсгийн гишүүдийн зарим нь нэрээ ашиглуулсан. Зарим ажлын хэсгийнх биш ч гарын үсэг зурсан. Зарим нь дадлагажиж байсан аж-

Уг ажлын хэсэг 2023 оны наймдугаар сарын 14-ны өдөр их багтаамжийн дизель хөдөлгүүртэй Daewoo BS 106 маркийн эхний 20 автобусыг хүлээн авахаар ажилласан. Гэхдээ тус өдөр ажлын хэсгийн долоон хүн хуралдаа очсон бол үлдсэн хэд нь хуралд очиж, автобус шалгалгүй хүлээн авсан гэх гарын үсгийн зурсан байдаг.

Харин ажлын хэсгийнхэн акт үйлдэхэд тус 20 автобуснуудад ажлын даалгавар болон техникийн найман төрлийн зөрчил илрүүлсэн гэдгийг Ажлын хэсгийн дарга Б.Мөнхболд мэдүүлэгтэй хэлсэн.

Гэтэл одоо явагдаж буй шүүх хурал дээр ажлын хэсгийнхний дийлэнх нь автобус асуудалтайг мэдээгүй учир гарын үсэг зурсан. Эсвэл дарга яаруулж гарын үсэг зуруулсан гэж мэдүүлж буй.

Мөн тэдний мэдүүлгээс харахад, автобус хүлээн авч акт үйлдэх үеэр ажлын хэсгийн хоёр гишүүн ээлжийн амралттай. Хоёр гишүүн ар гэрийн асуудалтай. Нэг гишүүн орлогчоо явуулсан. Харин хоёр нь өөр ажилтай явж байсан аж. Харин гарын үсэг зурсан нэг инженер нь бүр тус ажлын хэсгийн гишүүн биш дадлагажигч байсан нь анхаарал татаж байгаа юм.

Ингээд есөн удаа хуралдсан ногоон автобусны шүүх хурлын үеэр Автобус худалдан авах ажлын хэсгийнхэн ямар ямар мэдүүлэг өгснийг хүргэе.

Ажлын хэсгийн ахлагч Б.Мөнхболд:

-Ажлын хэсгийн ахлагчийн хувьд наймдугаар сарын 14-нд болсон автобус хүлээлцэх хурлын талаар бүх гишүүддээ хэлсэн. Зарим нь “ээлжийн амралттай байна орондоо хүн явуулъя, хурал давхцаж байна” гэх тайлбаруудыг өгч байсан. Бүгд ирэх шаардлагатай ч ирээгүй хүмүүст хариуцлага тооцоогүй. Хуралд долоон хүн ирсэн. Би хуралд өөрөө оролцож автобусыг шалгаж үзсэн. Бид бүгд автобусыг шинэ гэж бодсон. Харахад өөлөх юмгүй шинэ харагдсан. Цаашлаад тулгаж үзэхэд зарим зүйлс нь байхгүй байсан. Бид 20 автобуснаас нэгийг нь л шалгаж үзсэн. Яаралтай наад автобуснуудаа үзээд хүлээж ав гэсэн газрын даргын чиглэлийн дагуу бид нэгийг нь үзэж, бусдынх нь арлын дугаарыг тулгаад хүлээж авсан. Автобус асуудалтай байгааг С.Жавхлантбаатарт аман байдлаар танилцуулсан. Бид шалгаж үзэх үеэрээ евро 2 хөдөлгүүртэйг мэдсэн.

Ажлын хэсгийн хоёр гишүүн автобус хүлээн авах актад гарын үсэг зураагүй. Энэ талаар газрын даргад танилцуулахад Мөнхбаатар, Мөнхзул хоёр гарын үсэг зураагүй талаар хэлэхэд, “Чи наад хэдээрэй гарын үсэг зуруулж чадахгүй. Арчаагүй юм” гэж хэлсэн. Ер нь гишүүдээр гарын үсэг зуруулах ажлыг Цогбадрах бид хоёр хувааж хийсэн.

НТГ-ын тээврийн бодлого төлөвлөлт хариуцсан ахлах мэргэжилтэн О.Хонгорзул:

-Би ажлын хэсэгт бие төлөөлөн ажиллаагүй. Манай хэлтсийн дарга Тамир гэдэг хүн “Автобус хүлээн авах ажлын хэсэг байгуулагдсан. Би орох  гэсэн болов ч боловсрол болохгүй байна. Чиний нэрээр бүртгүүлээд ажлаа би өөрөө хийгээд явна” гэсэн. Үүний дагуу миний нэр явж, ажлын хэлтсийн дарга хийж байсан. Автобус хүлээн авах ажлын хэсгийн актад мөн хэлтсийн дарга гарын үсэг зурах чиглэл өгсөн. Надаар ажлын хэсгийн дарга Б.Мөнхболд гарын үсэг зуруулсан. Би албан тушаалаараа хэлтсийн даргыг орлодог учраас гарын үсэг зурах ёстой юм байна гэдэг ойлголт анхнаасаа авсан байсан. Гэхдээ автобуснууд асуудалтайг мэдсэн бол гарын үсэг зурахгүй байх байсан. Хүн өөрийгөө хэрэгт хийхийг хүсэхгүй шүү дээ.

ННТГ-ын Техникийн технологийн хэлтсийн Нийтийн тээврийн цахилгаан хангамж хариуцсан инженер Д.Цогтбадрах:

-Би тухайн үед түр тушаалтай дадлагажигч байсан. Б.Мөнхболд дарга үүрэг өгсний дагуу бэлэн байсан ажил хүлээлцэх актад гарын үсэг зурсан. Мөн хурлын тэмдэглэл хийсэн гэдэг дээр миний гарын үсэг зурагдсан байдаг. Тэр хурлын тэмдэглэлийг би Түвшинжаргалаар бичүүлсэн. Гэхдээ Түвшинжаргал ажлын хэсэгт ороогүй байсан тул ажлын хэсгийн нарийн бичиг гэдэг утгаараа би гарын үсэг зурсан. Цаг давчуу байсан тул хурлын тэмдэглэлийг би шалгаагүй гарын үсэг зурсан. 14-ны өдрийн ажлын хэсэг ямар шийдэлд хүрснийг ч мэдээгүй. Учир нь урд оройн нь хүүхэд өвдөөд маргаашийнх нь буюу тэр автобус хүлээлцэх хуралд орж чадаагүй. Ажилдаа ороод шууд дээрээс ирсэн гарын үсэг зуруулах чиглэлийн дагуу явсаар байгаад хурлын тэмдэглэлтэй танилцаж амжаагүй. Хүлээж авч буй автобус асуудалтайг мэдсэн бол гарын үсэг зурахгүй байсан.

ННТГ-ын Санхүү хөрөнгө оруулалтын хэлтсийн дарга бөгөөд ерөнхий нягтлан бодогч Б.Баярмаа:

-Би автобус хүлээж авах акт үйлдэх ажлын хэсгийн хуралдаанд очоогүй. Тэр үед нийслэл дээр дараа жилийн төсвийн төсөл боловсруулах ажил дээр тооцоо нийлүүлээд явж байсан. Би техникийн хүн биш санхүүгийн хүн болохоор ажлын албаны инженерүүд очиж үзээд шаардлагад нийцэж байна гэсэн дүгнэлт хийх юм байна гэж ойлгож байсан. Гэвч ажлын хэсгийнхэн надад автобус шаардлага хангаагүй талаар хэлээгүй. Техникийн ажилчид шаардлагад нийцсэн гэж дүгнэсэн байсан учраас би актад гарын үсэг зурсан. Гэрээ дүгнэсэн актад Б.Мөнхболд дарга гарын үсэг зуруулна гэж өөрөө манай өрөөнд ирсэн. Автобус шаардлага хангаагүй талаар мэдсэн бол би гарын үсэг зурахгүй байсан.

ЗТНОНӨААТҮГ-ын Техникийн хэлтсийн дарга О.Лувсандагва:

-Автобусыг шууд хүлээлцэх акт үйлдэх ойлголтгүй байсан. Наймдугаар сарын 14-нд ажлын хэсгийн дарга намайг “парк шинэчлэлийн хүрээнд автобус ирсэн комисс ажиллах гэж байна” гэж дуудсан. Тухайн үед би ээлжийн амралттай байсан тул хоцорч очсон. Намайг очиход маргаан болж байсан. Ажлын хэсгийнхэн автобусны арам яриад маргалдчихсан байж байсан. Тухайн үед автобусны дутуу зүйлсийг эцсийн хэрэглэгчдэд хүргэхдээ нийлүүлж өгнө гэж байсан. Цаг үе нь тулсан дараагийн үйл ажиллагаа зогсоохгүйн тулд энэ 20 автобусыг энэ чигээр нь хүлээн авах шаардлагатай байгаа гэдгийг үйлдвэрлэгч талаас нь болон нийлүүлэгчид хэлж байсан. Миний хувьд ажил дээрээ очоод даргадаа нөхцөл байдлыг танилцуулаад байж байхад оройн нь ажлын хэсгээс ярьж эхэлсэн. Улмаар маргааш өдөр нь гарын үсэг зуруулсан. Тухайн үед надад энэ автобус төгсгөл биш юм. Араас нь үйлдвэрлэгчээс дахин автобус ирэх учир хүлээн авах шаардлагатай гэж тайлбарласан. Мөн манай ээж яг нойр булчирхайн хагалгаатай байсан тул нэг бүр шалгаж, асуудалд анхаарах боломжгүй байсан.

Нийтийн тээврийн улсын байцаагч О.Сүхбаатар:

-Би тухайн үед авто тээврийн байцаагчаар ажиллаж байсан. Сургууль төгссөн ч практик дээр ажиллаж үзээгүй. Техникийн туршлагагүй байсан. Автобус хүлээн авах тушаалтай би тухайн үед танилцаагүй байсан. 20 автобусыг хүлээлцүүлэх л үүрэгтэй оролцож байгаа юм байна гэж ойлгож байсан. Би бүр сүүлд тушаалтай нь танилцахад дүрэм, журмын хүрээнд акт үйлдэх гэж байсан. Би өөрийн биеэр хүлээн авах хуралд оролцсон. Бид гадаа гаргасан нэг автобусыг үзсэн. Тэр өдөр хурал гэхэд ер нь хэцүүхэн юм болсон. Яг нэг танхимд суугаад нэгнийхээ саналыг сонсож санал хураагаагүй. Гадаа автобус үзсэн байдалтай байж байгаад таарсан. Тиймээс би автобус хүлээн авах шалгалт дахиж хийгдэх юм байна гэсэн ойлголттой байсан. Тиймээс миний хувьд автобус шаардлага хангахгүй байсан ч гарын үсэг зурсан. Гэхдээ автобус шалгасан дүгнэлтийн баримт бичигт гарын үсэг зурж байна гэж бодож байсан. Хүлээн авах акт байсныг мэдээгүй.

Хотын стандарт хяналтын газрын авто тээврийн хяналтын улсын ахлах байцаагч Ц.Хадбаатар:

-Би автобус хүлээн авах хуралдаанд би өөрийн биеэр оролцоогүй. Хуулиар олгогдсон эрхийн дагуу ээлжийн амралтаа авсан байсан. Тиймээс манай орлон гүйцэтгэгч буюу улсын байцаагч миний өмнөөс хуралд оролцсон. Миний хувьд улсын байцаагчаар төлөөлүүлсэн учир хурлын тэмдэглэлд хяналт тавьж үзээд хуралдаанд оролцогчдын дийлэнх нь хүлээн авч гарын үсэг зурсан байсан тул шийдвэрийг дагж би бас гарын үсэг зурсан. Автобусыг өөрийн биеэр очиж үзэх боломж байгаагүй. Хурлыг цагийн тулгаж зарласан. Би хотоос зайдуу амарч байсан болохоор ирэх боломжгүй байсан.

ННТГ-ын Техникийн хяналтын үзлэгийн инженер Б.Алтаншагай:

-Би ажлын хэсгийн гишүүн биш. Энэ ажлын хэсэг зургадугаар сарын 12-нд байгуулагдсан. Харин би зургадугаар сарын 19-нд ажилд орсон. Наймдугаар сарын 14-нд эхний 20 автобус шалгасан гэдэгт миний нэр орсон. Тэр өдөр манай хэлтсийн дарга намайг дуудсан. Улмаар автобус шалгах ажил байна гэсэн. Манай ахлах байгаагүй тул ажил цалгардана гээд дагалдан хүүхэд явуулъя гэдэг шийдвэрт хүрээд намайг тийш явуулсан. Очиход 20 автобусны арлын дугаар тулгах ажил байсан. Өөрөөр ямар нэгэн байдлаар автобус үзээгүй. Арлын дугаар тулгачхаад л ажил руу явсан. Тухайн үед би гурван сарын дагалдан хийж байсан. Оройн нь манай ахлах инженер лүү ажлын хэсэг залгаад “өдөр ирсэн инженерээрээ гарын үсэг зураална шүү” гэж ярьсан. Тэгээд яг ажил тарахаар өмнө ирж гарын үсэг зуруулсан. Би тушаалын толгойг нь харахад А64 дүгээр тушаалаар байгуулсан ажлын хэсэг гэсэн байсан. Харин доор нь нөгөө миний өдөр шалгасан арлын дугаар байсан. Тиймээс би арлын дугаар шалгасан учир зуруулж байгаа юм байна гэж бодсон.

ННТГ-ын Зорчигч тээврийн үйлчилгээний хэлтсийн дарга Б.Дөлгөөн:

-Би наймдугаар сарын 14-ны хуралдаанд оролцоогүй. Тухайн өдөр хурал давхацсан. Ажлын албаны инженерүүд тухайн автобуснуудын техникийн шаардлага хангасан гээд дүгнэчихсэн байсан. Бас би гарын үсэг зурсан ч зураагүй ч энэ ажил цааш явна гэж бодоод гарын үсэг зурсан. Гэхдээ автобус шаардлага хангаагүйг мэдсэн бол би гарын үсэг зурахгүй байсан.

Д.ЖАРГАЛМАА

Энэ мэдээнд өгөх таны үнэлгээ

Хуваалцаарай Жиргээрэй