АНУ-ын Холбооны нөөцийн сан лхагва гарагт /2025.03.19/ мэдэгдэл хийхдээ бодлогын хүүг хэвээр үлдээж буйгаа мэдэгдсэн байна. Өнгөрсөн арванхоёрдугаар сараас хойш Холбооны нөөцийн сан бодлогын хүүг 4.25-4.50 хувьд барьж байгаа. Холбооны нөөцийн сангийн захирал Жером Пауэлл хэлэхдээ Доналд Трампын захиргааны анхны бодлого, тэр дундаа өргөн хэмжээний гаалийн татварууд нь АНУ-ын эдийн засгийн өсөлтийг удаашруулж, түр хугацаанд инфляцыг нэмэгдүүлсэн бололтой гэжээ.
Гэхдээ Холбооны нөөцийн сан арванхоёрдугаар сард гаргасан таамаглалынхаа дагуу энэ жил бодлогын хүүг хоёр удаа бууруулах төлөвтэй хэмээсэн байна. Пауэлл сэтгүүлчдэд хандаж “Өнөөдөр тодорхойгүй нөхцөл байдал ер бусын өндөр байна” гэжээ. Тэрбээр эдийн засгийн ерөнхий тоо баримт тогтвортой хэвээр байгааг онцолсон юм.
“Moody’s Analytics” фирмийн эдийн засагч Мэтт Коляр “AFP” агентлагт хэлэхдээ “Хүн болгон бодлогын хүүг бууруулахгүй гэдгийг мэдэж байсан. Холбооны нөөцийн сан нөхцөл байдлыг ажиглан, хүлээнэ гэдгээ тодорхой илэрхийлсэн” гэжээ. Эдийн засагч Кэти Бостянчич “Холбооны нөөцийн сангийн ажилтнууд хэтийдсэн хариу үйлдэл үзүүлэхээс болгоомжилж байна. Хоёр сарын өмнөх үеийг харвал эдийн засаг уналтад орох магадлал маш бага гэж хүмүүс хэлж байсан. Харин одоо энэ магадлал нэмэгдсэн, гэхдээ тийм ч өндөр биш” хэмээсэн байна.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.