Хоолны фестивалиар Х.Нямбаатарын ажиллах арга барилд өгсөн мессеж юу байв

Ерөөсөө маш ажилсаг. Тэгээд бүх зүйлээ өөрөө гардаж хийх гэдэг. Өөрөө гардаж хийвэл л хамаг юм нь арай сайнаар хийгдэх юм шиг санагддаг. Энэ бол Х.Нямбаатарын хувь хүнийх нь онцлог шиг байгаа юм. Ийм хүмүүс олон ажлыг нугалж чаддаг.

Европын хэдэн зуун жилийн настай хотуудод соёлоор, зарчмаар, хууль ёсоор засаглаж болж байна. Харин Улаанбаатар бол монголчуудын шинэ тутам нийгэмшлийн төв суурин учраас энэ их овоорсон асуудлуудаа хүн төвт удирдлагаар засаглахаас өөр аргагүй харагддаг. Хүн төвт удирдлага нь одоогийнхоор Х.Нямбаатар юм уу даа.

Хаа сайгүй замуудаа янзалж, автобусуудаа шинэчилж, тэнд ч газар чөлөөлж, энд ч метроны нүх ухаж, бонд босгож эрчим хүчний асуудлаа цэгцлэхээр банкны эзэнтэй гар барьж, гадны хотуудаар нэг явж ажлаа яриад, санхүүжилт татах зэргээр "хотын" гэх тодотголтой ажлууд руу тэр гүн шургалж орсон. Барилгын компаниудтай хэрэлдэж, лагерын замд хогоо хаяж буй иргэнтэй ч муудалцаж, тэрүүгээр нэг шууд дамжуулалт хийж, хаа сайгүй үсэргэсэн хүн болж гүйцэв, Х.Нямбаатар. Сайчилж хэлбэл, хүн төвт засаглалыг Х.Нямбаатар жинхэнэ утгаар нь ингэж хэрэгжүүлж байгаа юм.

Нөгөө талд, Х.Нямбаатарыг энэ олон ажилд хар муйхраар яг өөрийн санаснаар зүтгэхээр хана мөргөж байгааг нь хоолны фестивалиас харж болно.

Хотын төсвөөс 600 сая төгрөг зарцуулж, том том тогоонд Узбек тогооч нараар плов хийлгэж, Гандангийн лам нараар гурилтай шөл хутгуулав. Монголд ерөөсөө мэргэжлийн тогооч байхгүй юм шиг авирлаж байгаа юм. Хувийн хэвшлээс "Номадс", "Хаан бууз"-ынхан ирээд зогсоход л ямар хөөрхөн мэргэжлийн, зах зээлийн зарчмаараа харагдаж болохыг Х.Нямбаатар бүр мартатлаа өөртөө итгэлтэй болжээ. "Хот өөрөө л хийчихвэл сайн болчихно, ингэж зардлаа хэмнэнэ" гэж бодсных болов уу.

Төв талбай дээрээ хоолонд дугаарлаж, нийтийн том тогооноос аяга будаатай хуурга авахад цагдаа нар зохицуулалт хийж буй дүр зураг. Энэ нь Хятадын их удирдагч Мао Зедун улс орон даяар гангийн үйлдвэрлэл эрчимжүүлэх аян зарлаж, айл өрхүүдийн ширмэн сав суулгыг цуглуулан, тосгон бүр гар аргаар хайлуулангаа нийтийн гал тогооноос өрхүүдийг хооллож байсан их сэнсрэлтийн үеийг санагдуулна.

Хятадууд гар аргаар ган хайлуулж шалиагүй шиг Х.Нямбаатарын хувийн хэвшлийнхнээ орхиж, гандангийн лам нар хийгээд Узбек тогооч нараар хоол хийлгэсэн дүр зураг тийм мухардмал уур амьсгал төрүүлэв.

Хот үнэхээр хоолны фестивалиар мөнгө олмоор бол хувийн хэвшлүүдтэйгээ энэ аргачлалаа ярилцах, жил бүр уламжлал болгон явуулахад нь дэмжлэг үзүүлэх замаар санхүүгийн схемээ уячхаж болмоор. Гарц гаргалгааг яаж ийж хувийн хэвшлүүд рүү чиглүүлж, чаддаг хүмүүсээр нь чаддаг ажлыг нь хийлгэнгээ орлого төвлөрүүлж болмоор санагдах.

Саях youtuber, стриймэр IShowSpeed-ийн төв талбайд зочлохдоо "Монгол хоол нь хаана байна" гэж дуу алдсан нь ч маш томоор бодох ёстой мессеж байв. Тийн суугаад хоолоо идэж байтал дээврээс нь ус дусалж, гэнэт тавгүйтүүлчхэж байгаа нь хотынхны хотын даргаасаа мэдрээд байгаа тавгүйтэх мэдрэмжтэй адил санагдана.

Хоол хямдхан буй нь сайхан, амттай байгаа нь ч гоё. Гэхдээ тэр дугаарлаж жагсахыг нь хүртэл зохицуулж барьж байгаа нь нөгөөх эрх чөлөөт монголчуудад үнэхээр тээртэй санагдах нь тодорхой. Ийм энгийн анзааргыг хүчээр шийдээд ирэхээрээ л хар муйхарлалт болчхож байгаа юм.

Хотынхны хамаг стрессийг хөдөлгөж, бөөн уур унтуу болдог хэдхэн сэдэв л бий. Тэр нь ахуй байдлаас агаарын бохирдол, автозамын түгжрэл. Нийгмийн шинжтэйгээс хэтийдсэн баян, хоосны ялгаа.

Бүтцээр нь харахад, хэвийн хууль ёс, ном журмаар алгуурхан яваад энэ бүхэн шийдэгдэхгүй. Механик байдлаар нийтэд үл таалагдах олон алхам хийнгээ нийтийн байдлыг дээрдүүлсээр байх тийм замаар л явахаар харагдаж байгаа. Гэхдээ хоолны фестиваль мэт "жижиг" сэдэв дээрээ хүртэл Х.Нямбаатарын энэ механик ажиллагаа нэвт шувт ороод байхаараа л нийтийнхээ уурыг улам хүргээд байгаа юм.

Энэ мэдээнд өгөх таны үнэлгээ

Хуваалцаарай Жиргээрэй