Хэргийн мөрөөр: Үндэсний цэцэрлэгт хүрээлэнд ажиллаж байхдаа машинд дайруулсан залуугийн биеийн байдал хүнд байна

2025 оны тавдугаар сарын 8-ны өдөр Үндэсний цэцэрлэгт хүрээлэнгийн үйлдвэрлэлийн талбайд ажиллаж байсан 26 настай Т гэх залуу машинд дайруулж, хүнд бэртэл авсан харамсалтай хэрэг гарсан байна.

Цагдаагийн ерөнхий газраас бидний тодруулсан мэдээллээр, уг хэрэг Баянзүрх дүүргийн цагдаагийн нэгдүгээр хэлтэст шалгагдаж байгаа бөгөөд мөрдөн шалгах ажиллагаа үргэлжилж байгаа учир одоогоор дэлгэрэнгүй мэдээлэл өгөх боломжгүй гэлээ.

Харин Үндэсний цэцэрлэгт хүрээлэнгийн ажилчдаас энэ талаар тодруулахад, бүгд мэдээлэл өгөхөөс татгалзсан юм. Зарим нь тухайн явдал болсон талаар сонссон гэдгээ хүлээн зөвшөөрсөн ч дэлгэрэнгүй тайлбар хийхийг хүссэнгүй. Тус хүрээлэнгийн удирдах албаныхан ч мөн адил тодорхой хариулт өгсөнгүй.

Бид тус газрын байранд очиж уулзахад, “Дарга яам руу явсан, одоогоор байхгүй. Осолд орсон залуугийн биеийн байдлыг анхаарч, холбогдож байгаа. Шалгах ёстой газар нь шалгаж байгаа учраас хөдөлмөрийн аюулгүй байдлын талаар мэдээлэл өгөх боломжгүй” гэх хариулт өглөө.

Мөн Гэмтэл согог судлалын үндэсний төвөөс өгсөн мэдээллээр, осол гарсан өдөр буюу тавдугаар сарын 8-ны өдрийн 12 цаг 50 минутад хүнд бэртэл авсан залууг хүргэж ирсэн байна. Тус иргэний баруун бөөр, хөл нь хүнд гэмтэж, хавсарсан гэмтлийн мэс заслын тасагт хэвтэн эмчлүүлж байгаа бөгөөд одоогоор бяцралт, цус хуралт шимэгдүүлэх эмчилгээ хийж буй талаар эмнэлгийн эх сурвалж мэдээлэв.

Осолд орсон Т нь дөнгөж их сургуулиа төгсөөд, Үндэсний цэцэрлэгт хүрээлэнд техникчээр ажиллаж эхлээд байсан аж. Мөн ажлаа хийж байхдаа хүрээлэн дотор машинд дайруулсан нь хөдөлмөрийн аюулгүй байдлыг хангаагүйгээс үүдсэн ноцтой осол байж магадгүй байгаа юм.

Үндэсний цэцэрлэгт хүрээлэнгийн захирал Ё.Нямжавын удирдлага дор сүүлийн жилүүдэд байгууллагын бүтэц, орон тоо нэмэгдсэн ч, мэргэжлийн бус хүмүүс ажилд авсан нь ажиглагдаж байв. Мэргэжлийн бус боловсон хүчин, бэлтгэл ажлын дутмаг байдал, зохион байгуулалт сул, хөдөлмөрийн аюулгүй байдлын хуулийг зөрчсөнөөс энэхүү осол гарахад хүрсэн байж болзошгүй байна.

Нэмэлт: Хөдөлмөрийн аюулгүй байдал, эрүүл ахуйн тухай хуулийн тавдугаар бүлэг

27 дугаар зүйл.Аж ахуйн нэгж, байгууллагын хөдөлмөрийн аюулгүй байдал, эрүүл ахуйн асуудал хариуцсан бүтэц, зохион байгуулалтХэвлэх

27.1.Хөдөлмөрийн аюулгүй байдлыг хангах, хөдөлмөрийн нөхцөлийг сайжруулах, хууль тогтоомжийг хэрэгжүүлэх, хяналт тавих үүргийг аж ахуйн нэгж, байгууллагын захирал /эзэн/, ажил олгогч шууд хариуцна.

27.2.Ажил олгогч нь үйлдвэрлэл, үйлчилгээний онцлог, ажлын байрны эрсдэлийн түвшин, ажилтны тоог харгалзан хөдөлмөрийн аюулгүй байдал, эрүүл ахуйн асуудал хариуцсан бүтэц болон ажилтан, зөвлөл ажиллуулна.

27.3.Энэ хуулийн 27.2-т заасан хөдөлмөрийн аюулгүй байдал, эрүүл ахуйн асуудал хариуцсан бүтэц болон ажилтан, зөвлөл дараах чиг үүргийг хэрэгжүүлнэ:

27.3.1.аж ахуйн нэгж, байгууллагын хөдөлмөрийн аюулгүй байдал, эрүүл ахуйн бодлого, төлөвлөгөөг боловсруулж, шаардлагатай дүрэм, журмыг шинэчлэн баталж хэрэгжүүлэх;

27.3.2.хөдөлмөрийн аюулгүй байдал, эрүүл ахуйн удирдлагын тогтолцоог нэвтрүүлэх, хэрэгжилт, үр дүнд хяналт тавих;

27.3.3.хөдөлмөрийн аюулгүй байдал, эрүүл ахуйн хууль тогтоомжийн шаардлага, стандарт, салбарын болон аж ахуйн нэгж, байгууллагын мөрдөх хөдөлмөрийн аюулгүй байдал, эрүүл ахуйн дүрэм, журмын хэрэгжилтийн байдалд үзлэг, шалгалт хийлгэх, илэрсэн зөрчил дутагдлыг арилгуулах арга хэмжээ авах;

27.3.4.хөдөлмөрийн аюулгүй байдал, эрүүл ахуйн сургалтын хэрэгцээг тодорхойлох, төлөвлөх, хөтөлбөр боловсруулах, сургалт зохион байгуулах, үр дүнг тооцох, тайлагнах;

27.3.5.ажлын нөхцөл, мэргэжлийн онцлогт тохирсон тусгай хувцас, хамгаалах хэрэгслийг ажилтанд олгох, норм, чанар, зохистой хэрэглээнд хяналт тавих;

27.3.6.хөдөлмөрийн аюулгүй байдал, эрүүл ахуйн хууль тогтоомжийн шаардлага, стандарт, дүрэм, журмыг зөрчсөн албан тушаалтан, ажилтанд хариуцлага хүлээлгэх саналаа ажил олгогчид гаргах;

27.3.7.хууль тогтоомжид заасан бусад чиг үүрэг.

27.4.Хөдөлмөрийн аюулгүй байдал, эрүүл ахуйн асуудал хариуцсан ажилтнаар инженер, техникийн болон эрүүл ахуйн боловсролтой, мэргэшсэн хүнийг ажиллуулна.

27.5.Аж ахуйн нэгж, байгууллагын хэлтэс, албаны дарга, нэгж, тасгийн ахлагч, тэдгээртэй адилтгах албан тушаалтны ажлын байрны тодорхойлолтод хөдөлмөрийн аюулгүй байдал, эрүүл ахуйн талаар дараах чиг үүргийг тусгана:

27.5.1.хөдөлмөрийн аюулгүй байдал, эрүүл ахуйн хууль тогтоомж, стандартыг хэрэгжүүлэх, өөрийн харьяалах ажлын байр болон үйлдвэрлэлийн орчинд тохирсон дүрэм, журмыг боловсруулахад оролцох;

27.5.2.хөдөлмөрийн аюулгүй байдал, эрүүл ахуйн үйл ажиллагааг төлөвлөх, хэрэгжүүлэх, зохион байгуулах, хяналт тавих, үр дүнг тооцох, удирдлагын тогтолцоог нэвтрүүлэхэд ажилтнаа манлайлан ажиллах;

27.5.3.осолд дөхсөн тохиолдлыг бүртгэх болон үйлдвэрлэлийн осол, мэргэжлээс шалтгаалсан өвчин, үйлдвэрлэлийн орчинд учирч болох аюулыг илрүүлэх, тогтоох, үнэлэх, бууруулах, арилгах талаар хөдөлмөрийн аюулгүй байдал, эрүүл ахуйн ажилтанд мэдээлэх, хамтран ажиллах;

27.5.4.энэ хуулийн 27.3, 28 дугаар зүйлд заасан чиг үүргийг хэрэгжүүлэхэд ажил олгогч болон хөдөлмөрийн аюулгүй байдал, эрүүл ахуйн ажилтантай хамтран ажиллах.

27.6.Аж ахуйн нэгж, байгууллагын хөдөлмөрийн аюулгүй байдал, эрүүл ахуйн асуудал хариуцсан бүтцийн жишиг, ажилтны орон тооны норматив, зөвлөлийн ажиллах үлгэрчилсэн журмыг хөдөлмөрийн асуудал эрхэлсэн төрийн захиргааны төв байгууллага батална.

27.7.Энэ хуулийн 4.1.2, 4.1.3, 4.1.6-д заасан этгээд, аж ахуйн нэгж, байгууллага, ажил олгогч нь хөдөлмөрийн аюулгүй байдал, эрүүл ахуйн асуудал хариуцсан бүтэц болон ажилтан ажиллуулах орон тоонд хүрээгүй тохиолдолд хөдөлмөрийн аюулгүй байдал, эрүүл ахуйн асуудлыг мэргэшсэн байгууллага, ажилтнаар гэрээгээр гүйцэтгүүлж болно.

Энэ мэдээнд өгөх таны үнэлгээ

Хуваалцаарай Жиргээрэй