ОХУ-ын улсын төсөв болон дайны санхүүжилтэд гол хувь нэмэр оруулдаг Уралын газрын тосны үнэ Иран, Израил мөргөлдсөнөөс хойш бараг 15 хувиар өссөн гэж “BCS” банкны шинжээчид мэдэгджээ. Баасан гарагт /2025.06.13/ Уралын газрын тос баррель нь 5 мянган рубль (65 ам.доллар) арилжиж байсан юм. Үүнээс гурван өдрийн өмнө 4,400 рублийн (57.20 ам.доллар) үнэтэй байжээ. Энэ нь сүүлийн хоёр жилд үзэгдээгүй доод үнэ байсан юм.
Хэдийгээр үнэ нь өссөн ч газрын тосны үнэ засгийн газрын хүлээлтээс доогуур хэвээр байна. ОХУ энэ жилийн төсөв гаргахдаа газрын тосны үнэ баррель нь 6,700 рубль буюу 87.1 ам.доллар байна гэж таамагласан. Тавдугаар сард ОХУ-ын Эдийн засгийн хөгжлийн яам шинэчилж таамаглахдаа 5,300 рубль (68.9 ам.доллар) байна хэмээн тооцоолжээ.
2025 оны эхний улиралд Уралын газрын тос дунджаар 5,900 рубль буюу 76.7 ам.доллароор арилжсан ч байгалийн хий, газрын тосны орлого өмнөх үеэс арван хувиар буурсан байна. Тавдугаар сар гэхэд энэ бууралт 34 хувь болж, эрчим хүчний компаниудын нийт орлого 512.7 тэрбум рубль болж буурчээ. ОХУ-ын Сангийн яам мэдээлснээр энэ нь 2023 оны нэгдүгээр сараас хойших хамгийн муу үзүүлэлт юм.
Эх сурвалж: The Moscow Times
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.