УЛС ТӨРУлс төрийн мэдээ
Ерөнхий сайд авлига албан тушаалын гэмт хэрэгтэй тэмцэх чиглэлээр захирамж гаргаж, хуулийн байгууллагуудад үүрэг өглөө
Засгийн газрын өнөөдрийн хуралдаанаар Монгол Улсын Ерөнхий сайд нийгэмд шударга ёсыг хэрэгжүүлэх, авлига албан тушаалын гэмт хэрэгтэй тэмцэх чиглэлээр захирамж гаргасан байна.
Уг захирамжийн дагуу,
- Авлигатай тэмцэх үндэсний хөтөлбөрийг эрчимжүүлж,
- “Транспэрэнси Интернэшнл” байгууллагаас гаргадаг авлигын төсөөллийн индексэд Монгол Улсын жагссан эрэмбийг сайжруулах,
- Хөрөнгө оруулагч, бизнес эрхлэгч, ард иргэдэд саад учруулж байгаа хууль бус дарамт саадыг арилгах ажлыг шуурхай зохион байгуулах үүрэг бүхий ажлын хэсгийг АТГ-тай хамтран байгууллаа. Ажлын хэсгийн цаашид ажиллах төлөвлөгөөг гаргахыг үүрэг болгожээ.
Дээрх захирамжийн хүрээнд Монгол Улсын хууль, Засгийн газарт олгосон төрийн хуулийн биелэлтийг УИХ-ын өмнө хариуцаж, гэмт хэрэгтэй тэмцэх бодлогын хүрээнд төрийн өндөр албан тушаалтнууд үндэслэлгүй хөрөнгөжсөн асуудлыг шалгаж, АТГ-т шаардлагатай тохиолдолд ЦЕГ-тай дээрх ажлыг хамтран зохион байгуулах, УЕП-той хамран ажиллах үүрэг даалгавар өгсөн байна.
- Мөн Зөвшөөрлийн тухай хуульд зааснаас бусад бизнес эрхлэгчид, аж ахуйн үйл ажиллагаа явуулж байгаа иргэдэд хүнд суртал учруулж байгаа бүх төрлийн хууль бус зөвшөөрөл, бүртгэл, гэрээг бий болгодог байдлыг хүчингүй болгох ажлыг шуурхай зохион байгуулж ирэх сарын 10-ны дотор Засгийн газрын хуралдаанаар оруулж шийдвэрлүүлэх,
- Авлига албан тушаалын гэмт хэргийн шалтгаан нөхцөлийг арилгах чиглэлээр багц хуулийн төсөл боловсруулж аравдугаар сарын 1-ний өдрийн Засгийн газрын хуралдаанаар хэлэлцүүлэх,
- Иргэдийн мэдэх эрхэд халдаж байгаа албаны нууц гэдэг асуудлыг хүчингүй болгох чиглэлээр төрийн болон албаны нууцын тухай хуульд өөрчлөлт оруулах саналыг боловсруулж Засгийн газрын хуралдаанд ирэх сарын 10-ны дотор оруулж, хэлэлцүүлэх,
- Мөн “Транспэрэнси Интернэшнл” олон улсын байгууллагаас удаа дараа зөвлөж байгаа Шүгэл үлээгчийн эрхзүйн байдлын тухай хууль, Гэрч хохирогчийг хамгаалах үндэсний тогтолцоог бэхжүүлэх чиглэлээр хуулийн төслүүдийг яаралтай боловсруулж Засгийн газрын хуралдаанаар хэлэлцүүлэхийг тус тус үүрэг болголоо.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.