Зах дээр ажиллаж буй 12 настай Б.Хүслэн: Цалингаараа хичээлийн хэрэгслээ авна гэхээр гоё байна

Нарантуул худалдааны төв. Хичээлийн шинэ жилийнхээ бэлтгэлийг зэхэж буй хүүхэд багачууд, оюутан сурагчдаар дүүрэн. Тэдний дунд хичээлийн хэрэгслээ цуглуулах бус зарж борлуулж буй дунд ангийн хүүтэй бид уулзав.

Тэрбээр "хүүхдүүд зуны амралтаа дийлэнхдээ гэртээ утсаараа тоглох, гадуур зугаалж өнгөрүүлдэг. Харин би ажил хөдөлмөр хийж, хичээлийн хэрэгслээ өөрийнхөө олсон мөнгөөр авъя гэж шийдээд худалдааны зөвлөх мөн тэрэгчин хийж байгаа. Энэ шийдвэрийг минь аав ээж минь ч сайнаар хүлээн авсан" гэж хэвлүүхэн ярьсан юм.

-Долоо хоногийн зургаан өдөр өглөө 06.00 цагаас орой 19.00 цаг хүртэл ажилладаг ч ер ядардаггүй. Би бүр шавьтай-

Би 12 настай. Сүүлийн нэг сарын хугацаанд буюу долоодугаар сарын 25-наас эхлэн Нарантуул худалдааны төвд ажиллаж байгаа. Хүүхдүүд зуны амралтаараа гэртээ ээж аавдаа эрхлээд хийж өгсөн хоолыг нь идэж, гар утсаараа тоглоод л өнгөрдөг байх. харин би хөдөлмөр эрхэлж үзье, наймаа хийж суръя л гэж бодсон. Энд би хоёр хувцасны лангуу, нэг бичиг хэргийн лангуунд туслах ажилтан хийж байна. Ингэхдээ дэвтэр нөхнө, өрнө, тэргээр зөөнө, бас хүмүүсийн худалдан авалт хийхэд нь зөвлөж тусалдаг. Миний ажил өглөө зургаан цагт эхэлдэг. Тэгээд л орой долоо хүртэл дээр нэрлэсэн ажлаа хийнэ дээ. Энэ хугацаанд зөндөө л ажил амжуулна. Бүр шинээр орсон ажилтнуудад зааж, зөвлөнө. Хамгийн сүүлд шинээр орсон миний шавь надтай чацуу, 12 настай. Мэдэхгүй байгаа ажлаа надаас асуугаад л хийдэг юм.

Яг энэ эрчээрээ найман сарын 30 хүртэл ажиллана. Одоогоор нэг сар ажиллаад байгаа ч яг хэдэн төгрөгийн цалин авснаа сайн мэдэхгүй л байна. Гэхдээ миний хичээлийн хэрэгслийг авахад лав хүрнэ байх. Бизнес эрхлэх гоё юм байна билээ. Ёстой л хүмүүстэйгээ тулж ажиллана шүү дээ. Яг юу авахыг хүсэж байгааг нь асууна. Тэрийг авбал зүгээр гээд зөвлөнө, их сонирхолтой. Ямар дэвтэр авбал зүгээр вэ, хайч, цавуу алийг нь сонгох вэ гээд их л асууна. Би нэг их төвөгшөөхгүйгээр хариулна, өөрийн хэрэглэж үзсэн болон хүмүүсийн ихээр авдаг чанартай зүйлсийг санал болгон худалдаалдаг даа.

-Морин хуурын багш, Холливудын жүжигчин болох мөрөөдлөө биелүүлэхийн тулд Хөгжим бүжгийн коллежид элсэж байгаа-

Аав ээж минь миний ажиллаж буйд хачин их баяртай. "Миний хүү сайн шүү, улам их хичээнэ шүү" гээд урам өгнө. Би долоо хоногт нэг л өдөр амарч байгаа. Нарантуул худалдааны төв амрах өдөр буюу мягмар гарагт. Зургаан өдрийн туршид өглөөнөөс орой хүртэл ажиллах хэцүү л дээ. Гэхдээ би ер ядрахгүй байгаа. Өглөө бүр л эрч хүчтэйгээр ажилдаа ирдэг.

Удахгүй хичээл орно. Догдлол маш их байна. Ялангуяа шинэ сургуульд элсэж шинэ багш нартай болно, шинэ найзуудтай болно гэхээр бүр ч гоё санагдаж байгаа. Мөн дээрээс нь хичээлийнхээ бэлтгэлийг өөрийн хөдөлмөрлөж олсон орлогоороо авна гэхээр өмнө жилүүдээс ч гоё. Би ирээдүйд морин хуурын багш, холливудын жүжигчин болно гэж боддог. Тийм ч учраас тэр мөрөөдлийн минь эхлэл гээд энэ жил Хөгжим бүжгийн коллежид элсэж байгаа.

Морин хуур тоглох надад маш сайхан мэдрэмж төрүүлдэг. Сүүлийн нэг жилийн туршид шимтэн суралцаж байгаа. Намайг хамгийн сайн тоглодог аялгуугаа нэрлэ гэвэл "Монгол аялгуу"-г гэж хэлнэ. Мөн "Мандах нар", "Хүлгийн айзам"-ыг сайн тоглож чадна. Чадахгүй байгаа ганц ая гэвэл Жалам хар л байна даа.

Энэ мэдээнд өгөх таны үнэлгээ

Хуваалцаарай Жиргээрэй