Монголын коксжих нүүрсний зах зээл өнгөрсөн долоо хоногийн сүүлээр долоо дахь удаагийн оролдлогоор үнийн өсөлтийг хэрэгжүүлсэн ч Хятадын гол хилийн боомтуудад идэвх сул хэвээр байлаа. Ирээдүйн ханшийн сулрал болон дотоодын нүүрсний зах зээл хөрөх хандлага нь худалдан авагчдын болгоомжлолыг нэмэгдүүлж, арилжааны идэвх буурах шалтгаан болов. Үүнээс улбаалан зарим боомтын худалдаачид агуулахын үлдэгдлээ бууруулахын тулд Монголын нүүрсний арилжааны үнийг доошлуулахад хүрсэн юм. Гэсэн ч нүүрс тээврийн ачааны автомашинуудын гаалийн нэвтрэлтийн хэмжээ өндөр түвшинд хадгалагдсаар байна.
Монголын Засгийн газраас үнийн өсөлтийн нэмэгдүүлэх арга хэмжээнүүд авсан ч Ганцмод боомт дахь коксжих нүүрсний зах зээлд эерэгээр нөлөөлж чадсангүй. Харин ирээдүйд ханш буурах, эцсийн хэрэглэгчдийн зүгээс өндөр үнэтэй худалдан авалтыг эсэргүүцэх болсон нь тэдэнд үнийг бууруулахаас аргагүй нөхцөлд хүргэв. 8-р сарын 22-нд Ганцмод боомт дахь Монголын 5-р зэрэглэлийн түүхий коксжих нүүрсний үнэ НӨАТ орсон агуулахын үнэ нь тонн тутамдаа 955 юаниар буурсан бол Жинчуаньд 5-р зэрэглэлийн угаасан нүүрс тогтвортой буюу тонн нь 1,190 юань хэвээр байлаа.
8-р сарын 18-наас 8-р сарын 23-ны хооронд боомтоор өдөрт дунджаар 1,173 нүүрс тээврийн автомашин гааль нэвтэрсэн нь 8-р сарын 11-нээс 16-ны өдрийн дундажтай харьцуулахад 9.12 хувиар өссөн үзүүлэлт боловч өмнөх долоо хоногоосоо 2.3 хувиар буурсан гэж Sxcoal-ийн мэдээлэлд дурджээ. Энэ хугацаанд Цагаанхад–Ганцмод чиглэлийн богино зайн тээврийн тариф НӨАТ-аас бусад зардалтайгаар тонн нь 63 юань байсан бөгөөд 8-р сарын 22-нд өмнөх долоо хоногийн түвшнээс өөрчлөлтгүй хадгалагдсан байна.
Сэхээ-Мандал боомт дээр Монголын нүүрсний үнэ өмнө нь бага зэрэг өссөн нь дотоодын ижил төрлийн нүүрстэй харьцуулахад өрсөлдөх чадварыг хадгалж үлдсэн. Гэвч дотоодын зах зээлийн эрэлт сулрах хандлага нь худалдан авалтыг бууруулах болов.
2025 оны 8-р сарын 22-ны байдлаар Сэхээ боомт дээрх түүхий нүүрс тонн нь 520 юань байсан бөгөөд энэ үнэд өөрчлөлт ороогүй. Мандал боомт дээр төмөр замаар гаалийн нэвтрэлт хийх горимд шилжсэн нь өнгөрсөн долоо хоногт үр ашиг багатай болж, нүүрсний нийлүүлэлт хумигджээ. Зарим худалдаачид ложистикийн хүндрэл үргэлжлэх төлөвтэй гэж үзэн үнийг нэмэгдүүлсэн боловч эцсийн худалдан авагчдын сонирхол сул байгаа нь нийт боомтын үнийг тогтвортой барих болов. 8-р сарын 22-нд угаасан сул коксжих нүүрс тонн нь 860 юань байсан бөгөөд түүхий 3/1 зэрэглэлийн коксжих нүүрсний үнэ мөн тонн нь 570 юань дээр тогтвортой байлаа.
Гаалийн нэвтрэлт: 8-р сарын 18–21-ний хооронд Сэхээ боомтод нүүрс тээврийн автомашины өдөр тутмын дундаж нэвтрэлт 924 болж, 8-р сарын 11–16-ны дундажтай харьцуулахад 7.57 хувиар өссөн байна. Харин Мандал боомтын өдөр тутмын дундаж нэвтрэлт 8-р сарын 18–23-ны хооронд 140 болж, долоо хоногоороо 13.58 хувиар буурчээ.
Монголын Энержи ресурс ХХК нь өнгөрсөн долоо хоногт 3-р зэрэглэлийн угаасан хатуу коксжих нүүрс нийт 64,000 тонныг 5 удаагийн дуудлага худалдаагаар Монголын Хөрөнгийн бирж дээр санал болгосон (нэг бүр нь 12,800 тн). Дуудлага худалдаа амжилттай болж, дундаж борлуулалтын үнэ тонн нь 834 юаньд хаагдсан бөгөөд эхлэх үнэ 800 юань байсан юм. Гэвч энэ нь өмнөх долоо хоногоос тонн тутамд 50 юаниар буурсан үзүүлэлт байлаа.
Эрдэнэс Тавантолгой ХК өнгөрсөн долоо хоногт түүхий 1/3 зэрэглэлийн коксжих нүүрсийг нийт 256,000 тонныг тонн тутмыг нь 65 ам.доллароор санал болгож, гурван удаагийн дуудлага худалдааг эхлүүлсэн боловч бүгдийг нь амжилттай дуусгаж чадаагүй юм.
Хятадын дотоодын кокс боловсруулах үйлдвэрүүд болон гангийн үйлдвэрүүд 9-р сард болох цэргийн парадад бэлтгэх хүрээнд үйлдвэрлэлээ бууруулж эхэлсэн.Түүнчлэн ханшийн савлагаа үргэлжилж буй нөхцөлд ойрын хугацаанд Монголын нүүрсний зах зээл шахагдсан хэвээр байх төлөвтэй байна. Гэсэн хэдий ч энэ долоо хоногийн эхээр Хятадын томоохон кокс үйлдвэрлэгчид үнийг ес дэх удаагаа нэмэгдүүлэх санал гаргасан нь дотоодын коксжих нүүрсний үнэ мэдэгдэхүйц буурахаас сэргийлж, зардлын хувьд илүү ашигтай Монголын нүүрсний эрэлтийг дэмжиж магадгүй юм.
Т.БАТСҮРЭН
Эх сурвалж: SXCOAL
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.