"Kincora Copper" компанийн худалдсан "Хүрэл үнэг" төслийн хайгуулын ажлыг татварын маргааны улмаас түр зогсоожээ
Өнгөрсөн оны 10-р сард олон улсад “Bronze Fox” буюу “Хүрэл үнэг” нэрээрээ танигдсан Монголын алт зэсийн томоохон ордыг эзэмшигч Канадад бүртгэлтэй “Kincora Copper” компани өөрсдийн эзэмшлийн хувийг Австралийн “Woomera Mining” руу албан ёсоор шилжүүлсэн. Woomera Mining Limited компани нь 2024 оны 12-р сард нэрээ сольж Orbminco Limited болсон билээ.
“Хүрэл үнэг” орд нь Дорноговь аймагт 22 мянга га талбайг эзлэх Оюу Толгой, Цагаан суваргын ордтой геологийн тогтоцоор нэг байршилд оршдог томоохон ордуудын нэг юм. "Woomera Mining" руу шилжсэнээс хойш тус компани хайгуулын судалгааг нарийвчлан хийсээр иржээ.
Тус компани Хүрэл үнэг төслийн хүрээнд өргөн цар хүрээтэй геофизикийн судалгааг дуусгаж, цаашдын хайгуул хийх шинэ бүсүүдийг тодорхойлсон байна. Мөн төслийн баруун хэсэгт ашиглалтын тусгай зөвшөөрөл авах өргөдөл гаргах үйл явц явагдаж байгаа нь уурхайн ашиглалтын боломжийг нэмэгдүүлэх хүлээлттэй байгаа талаар компанийн нээлттэй мэдээлэлд дурджээ.
Гэвч Монголын татварын албатай үүссэн татварын маргаан шийдэгдээгүй хэвээр байгаа бөгөөд Orbminco болон түүний түнш Kincora Copper нь саяхан шүүхийн шийдвэрийг давж заалдаад буй. 2021 онд Kincora Copper компанийн охин компани болох “Golden Grouse IBEX”-д Монгол Улсын Татварын ерөнхий газраас 2.7 тэрбум төгрөг буюу 800 мянган ам.долларын татвар ногдуулж байсан юм. Энэхүү татварын акт нь тус компанийг 2016 онд “Kincora Copper”-ийн охин компани “Golden Grouse IBEX”-ийн нэгдэн, нийлэх хэлцэлтэй холбон гаргасан бөгөөд Давж заалдах шатны шүүх маш богино хугацаанд шийдвэр гаргасан нь тус компанид шок үүсгээд авсан.
2023 оны 3-р сард Улсын дээд шүүхэд тус компанийн зүгээс давж заалдах хүсэлт гаргасан юм. “Kincora Copper”-н ТУЗ-ийн дарга асан Оливер Тервалл “Татварын байгууллага нь ашигт малтмалын лицензийн худалдаанд өөрийн үнэмлэмжээр татвар тогтоогдог өндөр эрх мэдэлтэй ганц ч улс дэлхийгээс олдохгүй” хэмээн мэдэгдсэн удаатай.
Улмаар татварын маргаанаас залхсан “Kincora Copper” Монгол дахь хөрөнгүүдээ зарахаар болсноо 2023 оноос зарлаж эхэлсэн бөгөөд ийн Woomera Mining компанитай хэлцэл хийж “Хүрэл Үнэг” төслийг 450 мянган ам.доллартой тэнцэх хэмжээний хувьцаа болон бэлэн мөнгөн дүнгээр тохиролцож, худалдсан юм.
Үүнтэй холбоотойгоор хууль эрх зүйн тодорхой байдал бүрдэх хүртэл Монгол дахь цаашдын хайгуулын ажлаа түр зогсоож, өөр нэг төслийн ажил руугаа оржээ.
Т.БАТСҮРЭН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.