10 хүнтэй бүлэглэн авлигын хэрэг үйлдсэн О.Магнай 500, Ц.Шижир 340, Х.Эрдэнэ 300 саяыг өгнө

О.Магнай, Ц.Шижир тэргүүтэй 11 хүнд холбогдох авлигын хэрэг хуулийн байгууллагад шалгагдаж эхлээд цөөнгүй хугацаа өнгөрсөн. Улмаар холбогдох хэргийн шүүх хурал /2025-08-25/-ны өдрөөс /2025-09-04/ хүртэлх өдрүүдэд Баянзүрх, Сүхбаатар, Чингэлтэй дүүргийн эрүүгийн хэргийн анхан шатны тойргийн шүүхэд болж, шийдвэр гарлаа.

Хэргийг эргэн сануулахад, О.Магнай ШӨХТГ-ын дарга байхдаа одоогийн ШШГЕГ-ын Хяналт шалгалт, үнэлгээ, дотоод аудитын газрын даргаар ажиллаж буй, хурандаа Б.Цогжаргалд хөндлөнгөөс нөлөөлсөн.

Улмаар Б.Цогжаргалын тушаалаар шийдвэр гүйцэтгэгч Г.Идэрчулуун, Х.Саруул, Б.Батцэрэн нар Баянгол дүүргийн нутагт Ливан улсын иргэн Мохамад Зухуэр Итаны хөрөнгөө оруулж барьсан 11 давхар шилэн фасадтай, дөрвөн тэрбум төгрөгийн өртөгтэй барилгыг 723 саяар үнэлэн О.Магнайгийн ээж С.Отгонжаргалын “Дархан цамхаг” компанид шилжүүлсэн байдаг. Дээрх гадаадын иргэнд О.Магнай 2014 онд 300 мянган ам.доллароор зарсан газар дээрээ барилга бариулчхаад ийнхүү үнэлүүлж шилжүүлэн авахад шийдвэр гүйцэтгэгч нар албан тушаалаа ашиглан оролцсон хэрэгт холбогдсон. НШШГГ-ын ажилтнууд 2018 оны тавдугаар сарын 16-нд шийдвэр гүйцэтгэх ажиллагаа явуулж дээрх Ливаны иргэний эзэмшлийн “Седарс партнерс” ХХК-ийн мэдэлд байсан 11 давхар объектыг хураан авч, 724 сая төгрөгөөр үнэлж, хоёр хоногийн дараа О.Магнайгийн хамаарал бүхий “Дархан цамхаг” ХХК-д шилжүүлсэн байдаг.

Мөн нийслэлийн Газрын албаны даргаар ажиллаж байсан Э.Болорчулуунд О.Магнай нөлөөлж ээжийнхээ эзэмшлийн “Баянцамхаг” ХХК-д Баянзүрх дүүргийн I хорооны нутагт 896 ам метр газрыг 15 жилийн хугацаатай эзэмших эрх хууль бусаар олгуулсан хэмээн буруутгагдсан юм. Харин Газрын албаны дарга Э.Болорчулууны хувьд Ц.Шижиртэй хамт Монгол-Оросын хувь нийлүүлсэн нийгэмлэг Улаанбаатар төмөр замын газраас дур мэдэн “Нармон” ХХК, авга дүү Б.Бямбацогт тэргүүтэй хүмүүст олгосон, усны сан бүхий газрын онцгой хамгаалалтын бүс болон ус хангамжийн эх үүсвэрийн эрүүл ахуйн бүсэд иргэн, хуулийн этгээдэд газар ашиглуулах, эзэмшүүлэхийг хориглох заалтыг зөрчин “Эко констракшн”-ы С.Нямдаваагийн эзэмшиж байсан, Сүхбаатар дүүргийн нутаг дахь 6750 ам метр талбайн хэмжээг нэмэгдүүлж, 12 649 болгож газар эзэмшүүлэх захирамж гаргуулсан гэх зэрэг хэрэгт холбогдсон билээ.

О.Магнай, Э.Болорчулуун, хурандаа Б.Цогжаргал тэргүүтэй 11 хүнд НПГ-аас Эрүүгийн хуулийн 13.5-3.1-т заасан албаны эрх нөлөөг ашиглаж бусдыг заналхийлсэн, 17.3-2.2-ын бусдад их хэмжээний хохирол учруулж залилсан, 18.6-1 дэх хэсгийн мөнгө угаасан, 21.2-1 дэх хэсгийн худал мэдүүлэг өгсөн гэх заалтыг үндэслэн яллах дүгнэлт үйлдэж шүүхэд шилжүүлсэн.

Шүүх хянан хэлэлцээд,

• О.Магнайд хоёр жил нийтийн албанд томилогдох эрхийг хасах, 1 жил зорчих эрхийг хязгаарлах, 500 сая төгрөгийг гаргуулж Улсын орлого болгуулах
• Ц.Шижирт нийтийн албанд томилогдох эрхийг гурван жилээр хасах, зорчих эрхийг 4 жилээр хасах, 340 сая төгрөгийг гаргуулж Улсын орлого болгуулах
• Х.Эрдэнэд эрүүгийн хуулийн 22.1.1-д заасан зүйл ангиар гэм буруутайд тооцож 15 сая төгрөгөөр торгох, 6 сарын хугацаагаар зорчих эрхийг хязгаарлах, 300 сая төгрөгийг хувиасаа гаргаж Улсын орлого болгуулах
• Э.Болорчулууны нийтийн албанд томилогдох эрхийг 3 жилээр хасаж, зорчих эрхийг гурван жилээр хязгаарлах
• Б.Бямбацогтыг нэг сая төгрөгөөр торгох
• Ц.Алтанцэцэгийг хоёр жилийн хугацаагаар нийтийн албанд томилогдох эрхийг хязгаарлаж, нэг жилээр зорчих эрхийг хязгаарлах
• Ш.Ядамдоржийг нийтийн албанд томилогдох эрхийг хоёр жилийн хугацаатай хасаж, 15 сая төгрөгөөр торгох, мөн зургаан сарын хугацаагаар зорчих эрийг хязгаарлах ял оноолоо.
• Харин эргийн холбогдогчоор шалгагдаж байсан Б.Цогжаргал, Х.Саруул нарыг цагаатгалаа

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй