З.Нарантуяа хэний өгсөн чиглэлээр Д.Баясгалангийн "Бөөрөлжүүт"-д зээл гаргахаар яарав

Хөгжлийн банк 2025 онд олон улсын зах зээлд арилжихаар зарласан 500 сая ам.долларын бондын санхүүжилтээсээ 300-г нь Д.Баясгалангийн "Бөөрөлжүүт" эрчим хүчний төслийн өргөтгөлд өгөхөөр "дээгүүр хүрээндээ" тохироо хийсэн гэх талаар бид өмнө нь мэдээлсэн.Тэгвэл уг 300 сая ам.долларын зээлийг хоёр хувааж, он дамнуулан өгөхөөр төлөвлөснөөр эхний 100 сая ам.долларыг нь ойрын хугацаанд олгохоор ажиллаж буй аж.

Ингэснээр "Бодь" группээс хэрэгжүүлж буй "Бөөрөлжүүт"-ийн эрчим хүчний төсөл 2024 онд хотын 300 сая ам.доллар, 2025 онд Хөгжлийн банкнаас 300 сая ам.долларын бондын зээлийг он дараалж авах нөхцөл үүсээд байна.

Уг төслийг хэрэгжүүлэгч  “Цэцэнс Майнинг энд Энержи” компаниас 2025.01.22-ны өдөр Хөгжлийн банканд нийт 300 сая ам.долларын зээлийн санхүүжилт хүссэн хүсэлтээ гаргасан аж. Харин Хөгжлийн банкны Гүйцэтгэх захирал З.Нарантуяагийн тушаалаар 2025.07.09-ний өдрийн огноолбороор зээлийн үнэлгээ, судалгаа хийх ажлыг эхлүүлсэн байна.

Үндсэндээ Хөгжлийн банк зээлийн судалгааг хоёр сар орчмын хугацаанд хийснээр, эхний 100 сая ам.долларын зээлийг олгохоор түргэвчилсэн байдлаар ажиллаж буй гэх мэдээлэл бий. Гүйцэтгэх захирал З.Нарантуяагийн зүтгүүлж буй гэх уг зээлийг олгох эсэх талаар одоогоор Хөгжлийн банкны ТУЗ-өөс албан ёсны шийдвэр хараахан гаргаагүй байна.

Мөн Зам тээврийн хөгжлийн яамны захиалга бүхий "Монголын төмөр зам" ТӨХК-ийн бүтээн байгуулах “Багахангай–Хөшигийн хөндий салбар төмөр зам” төслийг санхүүжүүлэхээр болсон бөгөөд зээлийн хүсэлт нь 722 тэрбум төгрөг.

Хөгжлийн банк дээрх хоёр төсөлтэй хамтатган, нийт 5.8 их наядын дүн бүхий 6 төрийн өмчийн оролцоотой, 8 хувийн хэвшлийн төслийг судлаж буй. Дээрх хоёр төсөл нь 14-өөсөө ялгагдаж, Хөгжлийн банкны нээлттэй өгөгдөлд "Санхүүжүүлж буй төсөл хөтөлбөрүүд" цэсэнд байршсан байв.

Эдийн засгийн тогтвортой байдалд нөлөө үзүүлэх, эргэн төлөгдөх чадамж бүхий уул уурхайн бус төсөлд хөрөнгө оруулах чиглэл барина хэмээн Хөгжлийн банк зарласан. Ингэж зарлаад, тодорхой бизнес төслүүд татсан ч зөвхөн Б.Дэлгэрсайхан сайд, "Бодь"-ийн Д.Баясгалан нарт л хаалгаа нээсэн дүр зураг эндээс ажиглагдана.

Хамтарсан Засгийн газрын үед Эдийн засгийн хөгжлийн яамыг АН-д өгсөн шалтгаанаар тус яамны харьяанд байх Хөгжлийн банкийг тус намын гишүүн З.Нарантуяа удирдах болсон.

Харин эдүгээ Эдийн Засгийн хөгжлийн яамыг МАН-аас Н.Учрал удирдах болсноор Ерөнхийлөгчийн нөлөө Хөгжлийн банк дээр илүү жин дарж байна.

Харин "Бодь" группийг үүсгэн байгуулагч Д.Баясгалангийн хувьд Х.Баттулгын үед ч, хүчтэй Ерөнхийлөгчийн дүртэй У.Хүрэлсүхийн цагт ч яаж ийгээд төрөөс томоохон ажлуудыг авч, хаана ямар өгөөжтэй бонд, санхүүжилтийн орон зай байна, тэнд яваа лобби сайтай томоохон бизнесменүүдийн нэг билээ.

Уг агуулгаарх өмнөх бичвэр:

Энэ мэдээнд өгөх таны үнэлгээ

Хуваалцаарай Жиргээрэй