Нэг дороос | Хоёр дахь шатны санал хураалтаар Д.Амарбаясгалан МАН-ын даргаар сонгогдлоо

Eguur News хамгийн их анхаарал татаад байгаа МАН-ын Бага хурлын үйл явцын талаарх мэдээллийг нэг дороос хүлээн авах боломжийг бүрдүүлж байна.

Өнөөдөр /2025.09.28/ Бага хурлын зарим гишүүнийг хасах, нэмэх асуудлыг хэлэлцэнэ. Мөн намын даргыг сонгох, эсвэл Их хурал товлон зарлаж сонгох эсэх дээр шийдвэр гарах хүлээлттэй байгаа юм.

---

НЭМЭЛТ: 2025.09.28-ний 08.30 цаг

2025 оны 09 дүгээр сарын 28-ны өдрийн МАН-ын VIII Бага хуралдаанд 321 гишүүн оролцож, Д.Амарбаясгалан 275 хүний санал буюу нийт хуралдаанд оролцогчдын 85.6 хувийн саналыг авч МАН-ын даргаар сонгогдлоо.

Эхний санал хураалтаар Д.Амарбаясгалан 58, Г.Занданшатар 42 хувийн санал авч, хэн нь ч намын дарга болох болзол хангаагүй. Нэр дэвшигчдийн авсан санал гуравны хоёрт хүрэхгүй бол хамгийн олон санал авсан хүний нэрийг хоёр дахь шатны санал хураалтад оруулахаар тогтсон аж.

Энэ дагуу хоёр дахь шатны санал хураалт зөвхөн Д.Амарбаясгалан дээр явагдаж, 2025.09.28-ний өглөөний 07.40 цагт дууссан аж.

---

НЭМЭЛТ: 04.53 цаг

-Намын дарга сонгогдоогүй учир дүрмийн маргаан дэгдэж, 28-ны өдөр УЗ, Бага хурал дахин хуралдах нөхцөл үүслээ-

Ерөнхий сайд Г.Занданшатарын хүсэлтээр саналыг дахин тоолж байна. Тэгсэн ч хоёр нэр дэвшигчийн аль нэг гуравны хоёрын босгыг давахгүй нь ойлгомжтой болсон юм.

УИХ-ын гишүүн Б.Заяабал ийм нөхцөл үүсвэл дахин санал хураалт явуулах журам баталсан гэж хэлсэн. Одоо энэ журмыг хэрэглэх эсэх дээр ямар ч тодорхой мэдээлэлгүй байгаа юм.

Харин ХХААХҮ-ийн сайд Ж.Энхбаяр гарч ирж мэдээлэл өгөхдөө "Тийм журам байхгүй, намын дүрэм л гэж бий. Үүнд, намын дарга өргөдлөө өгсөн буюу намын даргын орон гарсан нөхцөлд асуудлыг Бага хурлаар шийднэ гэсэн байгаа. Гэтэл Л.Оюун-Эрдэнэ дарга өргөдлөө өгөөгүй явж байна. Тэгэхээр дүрмийн маргаан үүсээд байна л даа. Иймд маргааш Удирдах зөвлөл дахин хуралдах байх. Хоёр нэр дэвшигчийн хэн нь ч гуравны хоёрын босгоо давсангүй" гэлээ.

УИХ-ын гишүүн асан М.Оюунчимэг өдөр ярилцлага өгөхдөө, Л.Оюун-Эрдэнэ өргөдлөө өгсөн гэгдсэн ч хуралдаан даргалагч Ж.Бат-Эрдэнэ уншиж танилцуулахаас татгалзсан гэдгийг хэлсэн. Өөрөөр хэлбэл, Л.Оюун-Эрдэнэ намын даргаас албан ёсоор буусан процесс явагдахаас өмнө шинэ даргын сонгууль явуулчих вий гэж болгоомжилж буйгаа тэр өгүүлсэн юм.

Ямартай ч өнөөдрийн хувьд үүрийн 05.00 цаг хүртэл хуралдаад МАН шинэ даргаа Бага хурлаар сонгож чадсангүй. Өнөөдөр баталсан журам, Л.Оюун-Эрдэнэ яг намын даргын албан тушаалаа хүлээлгэн өгсөн эсэх зэрэг нөхцөлд үндэслэж есдүгээр сарын 28-ны өдөр үйл явц үргэлжлэх нь.

---

НЭМЭЛТ: 04.19 цаг

Санал хураалтыг тоолж дуусжээ.

Үүгээр хоёр нэр дэвшигчийн хэн нь ч хуралдаанд оролцсон гишүүдийн гуравны хоёрын саналыг аваагүй байна. Зарим хэвлэлд мэдээлснээр, Д.Амарбаясгалан 58, Г.Занданшатар 42 хувийн санал авчээ.

Ийнхүү хэн ч намын дарга болох болзол хангасангүй.

Гэхдээ өнөөдөр хэрэв ийм нөхцөл үүсвэл, илүү санал авсан нэр дэвшигч дээр дахин санал хураалт явуулж, гуравны хоёр санал авах эсэхийг бататгах журам санаачлан баталсан байгаа юм.

Иймд одоо дахин санал хураалт явуулах нь. Энэ талаар албаны хүмүүс 04.20 цагт ямар ч мэдээлэл өгөөгүй байна.

---

НЭМЭЛТ: 02.58 цаг

Санал хураалт үргэлжилж байна

МАН-ын Бага хурлын гишүүд саналаа нууцаар, цаасаар өгсөөр байна.

Энэ үеэр УИХ-ын гишүүн Б.Заяабал мэдээлэл өгөхдөө "Эхний санал хураалтын дүнгээр хэн нэгэн гуравны хоёрын санал аваагүй бол дахиж санал хураах журам танилцууллаа. Тэр журам нь батлагдсан. Саналыг нууцаар, хайрцагт хийж байна. Тооллогын комиссыг Ж.Алдаржавхлан гишүүн ахалж байгаа" гэж ярилаа.

Өөрөөр хэлбэл, нэр дэвшигч Г.Занданшатар, Д.Амарбаясгалан нарын аль нэг нь гуравны хоёрын санал аваагүй бол, аль олон санал авсан дээр нь дахин санал хураалт явуулж, гуравны хоёр хүрэх үгүйг нягтлахаар болжээ.

---

НЭМЭЛТ: 00.55 цаг

Санал хураалт эхлэхэд бэлэн боллоо

МАН-ын Бага хурлын 38 гишүүн тус бүр 3 минутаар үг хэлж дууслаа. Үг хэлсэн гишүүдийн дотор Ерөнхий сайд асан Л.Оюун-Эрдэнэ багтсан.

Ингээд МАН-ын даргад Ерөнхий сайд Г.Занданшатар, УИХ-ын дарга Д.Амарбаясгалан нарын хэнийг сонгох дээр санал хураалт явуулахаар бэлтгэж эхэллээ.

Хуралдаанд оролцож буй гишүүдийн гуравны хоёрын саналыг авч чадсан нэр дэвшигч МАН-ын даргаар сонгогдоно.

---

НЭМЭЛТ: 22.37 цаг

МАН-ын Бага хурал завсарлаж дууслаа.

Завсарлагааны өмнө МАН-ын даргад нэр дэвшигч Г.Занданшатар, Д.Амарбаясгалан нараас асуулт асууж, хариулт авч дууссан.

Харин одоо Бага хурлын гишүүд уг асуудалтай холбогдуулан үг хэлнэ. Үг хэлэхээр нэрээ өгсөн гишүүдийн дотор Ерөнхий сайд асан, МАН-ын даргын албан тушаалаа хүлээлгэн өгнө гэдгээ мэдэгдээд буй Л.Оюун-Эрдэнэ багтсан аж.

Улмаар үүний дараа санал хураалт эхэлнэ.

---

НЭМЭЛТ: 21.28 цаг

Асуулт, хариулт дууслаа

МАН-ын Бага хурал 30 минутын хугацаатай завсарлага авлаа.

Үүний өмнө МАН-ын даргад нэр дэвшигч Г.Занданшатар, Д.Амарбаясгалан нараас Бага хурлын гишүүд асуулт асууж, хариулт авч дууслаа.

"Хоёр нэр дэвшигчид ижил тэнцүү хариулт өгч байна, хэн нэг нь илүү гэх зүйл ажиглагдсангүй" гэдгийг УИХ-ын гишүүн Д.Энхтүвшин хурлаас гарч ирээд сэтгүүлчдэд тодруулга өгөхдөө хэлсэн.

Завсарлагаа дууссаны дараа Бага хурлын гишүүд хэлэлцэж буй асуудалтай холбогдуулан үг хэлнэ.

Ингээд санал хураалт болох юм.

---

НЭМЭЛТ: 20.26 цаг

Г.Занданшатар, Д.Амарбаясгалан нарын нэг 280-аас доошгүй санал авч байж ялалт байгуулна

МАН-ын даргад нэр дэвшигч Г.Занданшатар, Д.Амарбаясгалан нарын асуултад хариулах цаг үргэлжилж байна.

Одоо Бага хурлын 12 гишүүн тэднээс асуулт асуух үлдээд байгаа юм. Үүний гишүүд дараа үг, санал хэлнэ.

Улмаар санал хураалт явуулах ба МАН-ын үндсэн дүрмийн 20.3.7-д "Намын Их хурлын чөлөөт цагт намын дарга орон гарвал Бага хуралд оролцсон гишүүдийн гуравны хоёрын саналаар шинэ даргыг сонгох" гэж заасан.

Одоогийн байдлаар Бага хурлын 421 гишүүн хуралдаанд оролцож байгаа аж. Тэгэхээр үүний гуравны хоёр 280 гаруй санал юм. Өөрөөр хэлбэл, Г.Занданшатар, Д.Амарбаясгалан нарын аль нэг заавал 280-аас доошгүй санал авч байж ялалт байгуулна.

Хэн нь ч энэ босгыг давахгүй бол Их хурлаар намын даргаа сонгохоос аргагүйд хүрэх юм.

---

НЭМЭЛТ: 18.30 цаг

Г.Занданшатар, Д.Амарбаясгалан нар мэтгэлцэж эхэллээ

Монгол Ардын намын Бага хурлын VIII хуралдаан хэлэлцэх асуудлын дарааллын дагуу үргэлжилж байна.

Монгол Ардын намын даргад УИХ-ын дарга Д.Амарбаясгалан, Ерөнхий сайд Г.Занданшатар нар нэр дэвшихээ илэрхийлж, тус бүртээ мөрийн хөтөлбөрөө Бага хурлын гишүүдэд танилцууллаа.

Улмаар нэр дэвшигчид бодлогын мэтгэлцээнийг өрнүүлж, гишүүдийн асуултад хариулж байна.

Нийт 30 орчим гишүүн асуулт асуухаар нэрээ өгчээ. Асуултад мэтгэлцэн хариулж дууссаны дараа Бага хурлын гишүүд үг, санал хэлэх аж.

Ингээд санал хураана.

Нийт гишүүдийн гуравны хоёрын саналыг авч чадахгүй бол хэн нь ч МАН-ын дарга болохгүй.

---

НЭМЭЛТ: 17.00 цаг

Ерөнхий сайд Г.Занданшатар нэр дэвшинэ гэдгээ илэрхийллээ

Монгол Ардын намын Бага хурлын VIII хуралдаан үргэлжилж байна.

Хуралдааны эхэнд Бага хурлын зарим гишүүнийг чөлөөлөх, нөхөн томилох гэсэн зохион байгуулалтын асуудлыг хэлэлцлээ. Тодруулбал, Бага хурлын 49 гишүүнийг чөлөөлж, 49 хүнийг шинээр сонгон батламжиллаа. Үүнд, УИХ-д шинээр сонгогдсон гишүүд, аймгийн намын хорооны дарга зэрэг гишүүд, албан тушаалтнууд багтаж байна.

Бага хуралд төлөөлөгчдийг шинээр сонгосон тухай тогтоолыг баталснаар, шинээр сонгогдсон Бага хурлын гишүүд VIII хуралдаанд саналын бүрэн эрхтэй оролцох боломж нь нээгдлээ.

Хэлэлцэх асуудлын дарааллаар Монгол Ардын намын дарга Л.Оюун-Эрдэнэ ажлаа өгөхөө мэдэгдэж, Намын даргад УИХ-ын дарга Д.Амарбаясгалан, Ерөнхий сайд Г.Занданшатар нар нэр дэвшинэ гэдгээ илэрхийлэв.

Өөрөөр хэлбэл заалнаас нэр дэвшигч гараагүй аж.

---

НЭМЭЛТ: 15.00 цаг

Бага хурлын хуралдааны үеэр шинэ 49 гишүүнийг сонгохоор санал хураалт явуулж, тооллого хийж байна.

Энэ үеэр УИХ-ын гишүүн А.Ариунзаяа сэтгүүлчдийн асуултад хариуллаа.

Тэрбээр "Төрийн жинхэнэ албанд томилогдсон ба бусад шалтгаанаар Бага хурлын 49 гишүүний орон гарсан байгаа. Үүнд шинэ гишүүдийг батламжлахаар санал хураалт явууллаа. Гишүүн нэг бүр дээр нууцаар санал хураасан. Одоо тоолж байна.

Ингэснээр Бага хурлын бүтэц, зохион байгуулалт тодорхой болно. Улмаар дараагийн асуудал буюу намын даргад нэр дэвшигчдийн талаар хэлэлцэнэ. Одоогоор намын даргад нэр дэвшинэ гэдгээ нийтэд илэрхийлсэн нэг хүн байна.

Одоогийн намын дарга Л.Оюун-Эрдэнийн хувьд Бага хурлаар асуудлыг шийдэх хэрэгтэй, өнөөдөр өргөдлөө өгнө гэдгээ хэлсэн" гэлээ.

---

НЭМЭЛТ: 13.26 цаг

Бага хурлын гишүүнээс 49 гишүүн чөлөөлж, 48 гишүүн шинээр сонгохоор санал хурааж байна

Монгол Ардын Намын Бага хурлын VIII хуралдаан Тусгаар тогтнолын ордонд үргэлжилж байна.

Хуралдааны эхэнд Бага хурлын 49 гишүүнийг чөлөөлж, тодруулбал төрийн жинхэнэ албанд томилогдсон, өөрийн хүсэлтээр, бусад шалтгаанаар төлөөлөгчид бичгээр хүсэлт гаргасан байна.

Чөлөөлөгдөж буй Бага хурлын төлөөлөгчдийн оронд нийт 48 хүнийг шинээр сонгохоор санал хураалтыг эхлүүллээ.

Хуралд оролцож буй төлөөлөгчид саналаа өгч дууссаны дараа тооллогын комисс дүнг нэгтгэн танилцуулж Бага хурлын гишүүдийг сонгох тухай тогтоолыг батлах юм.

---

НЭМЭЛТ: 12.34 цаг

Бага хурал 80 хувийн ирцтэйгээр эхэлж, хуралдааныг Ж.Бат-Эрдэнэ даргалахаар боллоо

Хуралдаанд оролцох 428 төлөөлөгч байгаа бөгөөд 80 гаруй хувийн ирц бүрдэж ийнхүү хуралдааныг эхлүүлж буйгаа Монгол Ардын намын дарга Л.Оюун-Эрдэнэ танилцууллаа.

Тэрбээр эхлээд энэ удаагийн хуралдааны дарга, дэд дарга нарыг сонгов. Бага хурлын VIII хуралдааныг УИХ дахь Монгол Ардын намын бүлгийн дарга Ж.Бат-Эрдэнэ, дэд даргаар Бага хурлын гишүүн Д.Гангамөрөн нарыг удирдана.

Энэ удаагийн хуралдаанаар Бага хурлын зарим гишүүнийг чөлөөлөх, шинээр сонгох, ээлжит XXXI Их хурлын товыг тогтоох, төлөөлөгчдийг сонгох журам зэрэг асуудлыг хэлэлцэнэ гэдгийг хуралдаан даргалагч танилцууллаа.

---

НЭМЭЛТ: 12.19 цаг

Заалнаас Н.Учрал, Г.Дамдинням нар нэр дэвших хувилбар яригдаж байна

МАН-ын Бага хурал албан ёсоор хуралдаж эхэлсэн талаарх мэдээлэл ирээгүй байна. Гишүүд харин нэмэгдэж, хүрэлцэн ирсээр байгаа юм.

Олон нийтийн ойлгож байгаачлан, өнөөдөр МАН-ын даргад Г.Занданшатар, Д.Амарбаясгалан нарын хэн нь сонгогдохыг шийдэх магадлал өндөр. Гэхдээ зарим гишүүд намын даргыг өнөөдөр биш, Их хурлаар сонгох ёстой гэдгийг ч хэлж байгаа юм.

Ямартай ч Ерөнхий сайд Г.Занданшатар, УИХ-ын дарга Д.Амарбаясгалан нараас гадна заалнаас Шадар сайд Н.Учрал, АҮЭБ-ийн сайд Г.Дамдинням нар нэрээ дэвшүүлж, өрсөлдөхөөр болсон гэх мэдээлэл яригдаж байгаа юм.

Тэд энэ тал дээр ямар нэг байр суурь илэрхийлээгүй байна.

Ташрамд, намын даргын асуудлаас өмнө эхэлж Бага хурлын шинэ гишүүдийг батламжилна.

---

ШУУД ДАМЖУУЛАЛТ БҮХИЙ БАЙР СУУРЬ:

УИХ-ын гишүүн Г.Лувсанжамц: Засаг, төр барьж байгаа манай нам нээлттэй, дотоод ардчилалтай, мэтгэлцээнтэй байгаасай

---

УИХ-ын гишүүн С.Эрдэнэбат: Хувийн ашиг сонирхлоо хойш тавьдаг хүнийг намын даргад дэмжих нь зөв

---

УИХ-ын гишүүн Х.Булгантуяа: Удаан эрх барихаараа ийм болчихдог юм уу, их л хагарлаа. Намын даргын асуудлаа өнөөдөр шийдэхгүй бол 45 хоног сунжирч, хүндэрнэ

---

УИХ-ын гишүүн Х.Баасанжаргал: Бага хурал эмх замбараатай, дэг журамтай болдог. Микрофон хаах, үг хэлэхийг нь болиулах гэсэн асуудал гарч байгаагүй

---

НЭМЭЛТ: 12.01 цаг

Өнөөдөр эхлээд Д.Энхтүвшин, Г.Лувсанжамц нарын шинэ гишүүдийг Бага хурлын бүрэлдэхүүнд нэмнэ

Бага хуралд УИХ-ын гишүүн Д.Энхтүвшин, Г.Лувсанжамц нар хүрэлцэн ирээд байгаа. Тэд Бага хурлын бүрэлдэхүүнд багтдаггүй, гишүүн нь биш.

Өнөөдөр тэдний хувьд Бага хурлын гишүүн болж, батламжлагдах юм байна.

2024 оны УИХ-ын сонгуулиар бүрдсэн парламентад 25 шинэ гишүүн бий бөгөөд тэднийг өнөөдөр Бага хурлын гишүүнээр батламжлах аж. Мөн нэр бүхий аймаг, орон нутгийн МАН-ын хорооны дарга нар шинээр гишүүн болно.

Нийт 45 орчим орон тоонд шинэ бүтэц зохион байгуулалт хийгдэнэ гэдгийг УИХ-ын гишүүн А.Ариунзаяа хэлсэн юм.

• 

• 

• 

• 

• 

• 

• 

• 

• 

• 

• 

• 

• 

• 

• 

---

ШУУД ДАМЖУУЛАЛТ БҮХИЙ БАЙР СУУРЬ:

Нийслэлийн МАН-ын дарга Х.Нямбаатар: Намын даргыг Бага хурлын гишүүдийн гуравны хоёрын саналаар сонгох дүрэм бий. Намын төлөөлийн төв байгууллага даргаа сонгож болох зохицуулалт ч хуульд бий. Өнөөдөр Бага хурлаар хоёр үндсэн асуудал шийдэгдэх байх. Нэгт, намын дарга. Хоёрт, удахгүй хуралдах намын Их хурлыг товыг зарлах. Намын УЗ-ийн хурлаар хэлэлцэх асуудлын дарааллыг баталж өгсөн. 20 хоногт намаа тараангаа алдлаа. Энэ бол эдийн засаг, улс төрийн тогтворгүй байдал бий болгох эрсдэлтэй. Тиймээс хурдан асуудлаа шийдэх хэрэгтэй.

---

УИХ-ын гишүүн асан Д.Тэрбишдагва: Нэг талаас бузар булайгаа дэлгэлцэж байгаа нь сүүлийн 30 жилийн улс орны байдлыг илэрхийлж байна. Олигархи, нам дамжсан, үндэстэн дамнасан бүлэглэлүүдийн асуудлыг ил ярьж байж л хөгжинө

---

НЭМЭЛТ: 10.30 цаг

Фото: Бага хурлын гишүүд хүрэлцэн ирж байна

МАН-ын Бага хурлын гишүүдээс өдгөө улс төрийн идэвхтэй ажиллаж байгаа болон олон жилийн туршлагатай дүрүүд зэрэгцэн хуралдаа ирж байгаа нь гэрэл зургийг дуранд.

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

---

ШУУД ДАМЖУУЛАЛТ БҮХИЙ БАЙР СУУРЬ:

УИХ-ын гишүүн А.Ариунзаяа: Эхэлж Бага хуралд гишүүн нэмэх, хасах асуудал яригдана. Дараа нь намын даргаа ярилцана даа. Энэ ондоо багтааж Их хурлыг зарлан товлох асуудал ч бас яригдах ёстой. МАН-ын эв нэгдэл нийт 300 мянган гишүүдийн түвшинд бий. Гагцхүү цөөн түвшний хүмүүсийн дунд байгаа нь хэнд ч ойлгомжтой байна.

---

УИХ-ын гишүүн асан Д.Тогтохсүрэн: Бид чинь ард түмний өмнө үүрэг хүлээчихсэн хүмүүс. Үүнийгээ л бодолцох хэрэгтэй. Нэлээд ширүүн өрсөлдөөн болж байх шиг. Манай намын дүрмээр заавал Бага хурлаар дарга сонгоно гэсэн зүйл байхгүй. Ер нь эв эеэ хичээж, хүлээцтэй, ухаалгаар асуудлаа шийдчих болов уу гэж найдаж байна. Намын асуудлыг нам дотроо ярих ёстой. Төрийн ажил, намын ажлын аль аль нь ховоор явж болохгүй

---

ЭМДЕГ-ын дарга асан С.Энхболд: МАН бол эв нэгдлийг сахиж, баримталдаг. Энэ дагуу шийдвэрээ гаргах болов уу гэж хүлээж байна. Намын даргад өрсөлдөх хүмүүс танилцуулгаа хийнэ байх, үүгээр Бага хурлын гишүүд дүгнэлтээ хийнэ

---

УИХ-ын гишүүн Т.Мөнхсайхан: Улс орны эрх ашиг нэгдүгээрт, хоёрдугаарт намын эрх ашиг байх ёстой. Энэ зарчмаар шийдвэрүүд гарах байх. Одоо яг шинэ дарга сонгох асуудал Бага хурал дээр яригдах эсэх нь эцэслэгдээгүй байна. Бид одоо улс эх орныхоо хөгжил цэцэглэлтийг нэгдүгээрт тавьж, эв нэгдэлтэйгээр сонголт хиймээр байна

---

УИХ-ын гишүүн асан Б.Бат-Эрдэнэ: Мөнгө шүтээнтэй, мөнгөний боол болсон хүмүүсээс салмаар байна. Энэ байдлаараа явбал болохгүй, цэвэрлэх хэрэгтэй. Ашиг завшаан хайгсад нь эр эм, хөгшин залуу, үеэр нь ялгадаг. Үе гэхээсээ шударга зарчимтай ажиллах хүнээ л тавих хэрэгтэй шүү дээ

---

УИХ-ын гишүүн Б.Бат-Эрдэнэ: Манай нам хэн нэгний өмч биш. Хэн нэгний эрх ашиг биш зарчимд тулгуурлаж шийдвэр гаргах ёстой. Бага хурлаар яг ямар асуудал хэлэлцэхийг хараахан тодорхой болгож хэлээгүй байна

---

УИХ-ын гишүүн асан Д.Оюунхорол: Намын дотоод ардчиллаар хэн олонхын санал авна, тэр хүн ялна. Ялсан нь хамтраад л ажиллахаас аргагүй. Намын боловсон хүчний бодлого дээр алдаа гарсан гэж боддог, үүнийг засах ёстой. Иймэрхүү зүйл өнөөдөр яригдах байх аа. Л.Оюун-Эрдэнэ бол намтайгаа тийм сайн ажиллаж чадаагүй

---

УИХ-ын гишүүн Д.Энхтүвшин: Би Бага хурлын гишүүн болоогүй байгаа. Ажиглагч байдлаар оролцох хүмүүс 10.00 цагаас ирээрэй гэсэн. Мөрийн хөтөлбөрөөсөө буцдаг л намын дарга байж болохгүй. Л.Оюун-Эрдэнэд асар их боломж байсан, ашиглаж чадаагүй

---

---

ЭХЛЭЛ: 09.00 цаг

Шинэ даргаа сонгох МАН-ын Бага хурал өнөөдөр болно

Өнгөрсөн бямба гарагт /2025.09.20/ МАН-ын Удирдах зөвлөл хуралдаж, даргаа сонгох Бага хурлаа товлосон. Бага хурал өнөөдөр /2025.09.27/ 10.00 цагт Тусгаар тогтнолын ордонд болно.

Хурлаар МАН-ын даргыг тодруулна. Эрх баригч нам болох МАН-ын долоодугаар бага хурал зургаадугаар сарын 9-нд болж, Г.Занданшатарыг Монгол Улсын Ерөнхий сайдад нэр дэвшлүүлснийг дэмжсэн шийдвэр гаргасан. Үүнээс хойш яригдсан тус намын даргын асуудал өнөөдөр шийдвэрлэгдэнэ. Харин энэ удаад тус намын даргад УИХ-ын дарга Д.Амарбаясгалан, Ерөнхий сайд Г.Занданшатар нар нэр дэвшиж байна.

Уг нь МАН-ын Удирдах зөвлөл өнгөрсөн долоо хоногт, Бага биш Их хурлаараа даргаа сонгоно гэж тохирсон ч, өөрчлөгдөж өнөөдөр болох Бага хурлаар даргаа тодруулж, Их хурлаараа батламжлахаар болсон.

Учир нь тус намын Их хурал дөрвөн жилд нэг удаа болдог. Ингэхдээ 45-аас доошгүй хоногийн өмнө зарлагдах ёстой. Энэ хугацаагаараа бол арваннэгдүгээр сарын 10-н орчимд Их хурал нь товлогдохоор байгаа. Даргаа батламжлаад УДШ-д хүргүүллээ гэхэд шүүх түүнийг нь хэлэлцэх 30 хоногийн хугацаа арванхоёрдугаар сарын 10-нд хүрнэ. Гэтэл намууд даргаа бүртгүүлсэн байх цаад хугацаа 2025.12.31 юм. Тэгэхээр батламжлахгүй байх эрсдэлтэй.

Тиймээс тус намын дүрмийн 20.3.7-д “Намын Их хурлын чөлөөт цагт намын дарга орон гарвал Бага хуралд оролцсон гишүүдийн гуравны хоёрын саналаар шинэ даргыг сонгоно" гэж зааснаар МАН шинэ даргаа сонгох юм. Өөрөөр хэлбэл, Бага хурлын гишүүдийн гуравны хоёрынх нь саналыг авсан тохиолдолд заавал Их хурал зарлахгүйгээр намын даргаа сонгоно.

Харин Бага хурлын эхэнд дүрмийн дагуу хэлэлцэх асуудлынхаа дарааллыг гишүүдийнхээ саналаар батална. Ямартай ч,

• МАН-ын Их хурлын товыг хэлэлцэж, зарлана
• Бага хурлынхаа гишүүдийн бүрэлдэхүүнийг шинэчилнэ
• Намынхаа даргаа тодруулна.

Энэ дагуу МАН-ын одоогийн дарга Л.Оюун-Эрдэнэ ажлаа өгөхөө албан ёсоор мэдэгдэж, түүний оронд нэр дэвшигчид өрсөлдөн, санал хураалт явуулах процесс өрнөнө. Ингээд Д.Амарбаясгалан ч, Г.Занданшатар ч, заалнаас өөр нэр дэвшигч ч бай Бага хурлын 360 гаруй гишүүний 240 гаруйнх нь санал авах шаардлагатай. Тэгж байж Их хурлаараа батламжлагдана.

МАН-ын Их хурал намын Бага хурлыг 369 гишүүний бүрэлдэхүүнтэйгээр дараагийн Их хурал хүртэлх хугацаагаар байгуулдаг. Харин Бага хурлын гишүүдийг сонгохдоо Монгол Улсын Их Хурал, Засгийн газрын гишүүн, аймаг, нийслэлийн Иргэдийн төлөөлөгчдийн хурлын дарга, Засаг дарга, аймаг, нийслэлийн намын хорооны дарга, орон тооны дэд даргаар сонгогдож томилогдсон гишүүдийг оролцуулан нэр дэвшүүлж саналыг нууцаар хураана. Бага хурлын гишүүдийн 30-аас доошгүй хувь нь намын анхан шатны байгууллагын төлөөллөөс бүрдэнэ хэмээн дүрмэндээ заасан байдаг аж.

---

ШУУД ДАМЖУУЛАЛТЫГ: Б.Эрдэнэбаяр, О.Онон
ГЭРЭЛ ЗУРГИЙГ: О.Улсболд
ВИДЕО: Э.Золбоо
РЕДАКЦЫН БУУЛГАЛТ: М.Тэнгис, П.Урнаа, Ц.Тамир