Багш нар жагсаж, хугацаагүй ажил хаяхтай зэрэгцэж эмч, эмнэлгийн ажилтнууд Төв талбайд жагсаж эхэлсэн. Тэд мөн л цалингаа нэмүүлэх үндсэн шаардлагыг тавьж буй. Долоо хоногийн өмнө Засгийн газрын хуралдаанаар эмч нарын цалинг 15 хувиар нэмэгдүүлэх шийдвэр гарч Эрүүл мэндийн сайд Ж.Чинбүрэн,
"Эрүүл мэндийн байгууллагын албан хаагчдын үндсэн цалингийн 15 хувийн нэмэгдэлд 181 тэрбум төгрөг шаардлагатай. Манай салбарын дундаж цалин боловсролын салбартай харьцуулахад арай өндөр байгаа учраас 20 бус 15 хувь нэмэх нь зүйтэй гэж үзсэн. Эмч нар ажилласан жилээсээ шалтгаалж өөр өөр цалин авч байгаа.
1-4 жил ажилласан эмч нэмэгдэлтэйгээ нийлээд 1.8-2.5 сая, 5-10 жил ажилласан эмч нар 2.5-3 сая, 10 жилээс дээш жил ажилласан эмч нар 3-3.5 саяын цалин авч байгаа. Жижүүрт хоносны нэмэгдэл зэрэг нь ороод шүү. Жижүүрт хонодоггүй эмч нар тийм өндөр биш гээд байдаг юм" хэмээн мэдэгдсэн.
Харин бодит нөхцөл байдал эсрэгээрээ, маш бага цалингаар өндөр ачаалалтай ажиллаж байгаа гэдгээ эмч, эмнэлгийн ажилтнууд батлаад буй. Мөн цалинг 15 хувиар нэмэх нь хангалттай биш буюу жагсаалыг тараах үндэслэл болохгүй гэж мэдэгдсэн юм. Тиймээс зургаа дахь өдрөө жагсаж байна.
Өнөөдрийн байдлаар 21 аймаг болоод нийслэлийн 1000 гаруй эмч нар жагсаалд оролцож байна гэж Монголын эрүүл мэндийн ажилтны үйлдвэрчний эвлэлийн холбооноо мэдээлэл өгөв. Мөн өнөөдөр 13 цагаас өмнө энэ сарын есөнд өгсөн жагсаалын шаардлагын хариу ирэх аж. Хэрэв шаардлагыг хүлээж авах боломжгүй гэвэл сонирхлын маргаан үүсгэх юм байна. Энэ маргаан мөн үр дүнд хүрэхгүй бол ажил хаяхад хүрнэ гэлээ.
Д.УЛСАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.