Сурвалжилга: "Би мөнх насална, ажил, мөнгө хэрэггүй" гэж шашинд итгэдэг 20,000 хүн байж болзошгүй байна

60 нас шүргэж явсан эмэгтэй "Ажил хийх шаардлагагүй, амьдралд мөнгө хэрэггүй. Би бурхны хүн болж байгаа. Мөнх насална" гээд насаараа ажиллуулсан хоолны газраа хаагаад, ТҮЦ-ээ хүртэл буулгаад хашаандаа авчраад тавьчихсан гэвэл итгэх хүн цөөн байх. Тэр ингэтлээ шашинд автаж, сүүлдээ сүм дотроо нас баржээ. Сүүлийн нэгхэн жилийн хугацаанд энэ бүх үйл явдал өрнөж, насаараа ханилсан хань, төрүүлж өсгөсөн үр хүүхдэдээ ч танигдахааргүй болтлоо өөрчлөгдсөн байна. Унтахдаа чихэвчээр номлол сонсож, сүүлдээ хоол ч идэхээ больсон тухай түүний хүү Г.Батбямба ярьсан юм. Энэ бол ганцхан айлын зовлон.

Үүний араас ээж, эмээ хоёртойгоо амьдардаг өсвөр насны охин ээжийгээ болиулахын тулд тагтан дээрээсээ үсрэхийг завдаж, сүрдүүлдэг зэрэг олон арван кэйс дурдаж болно. Хамгийн түгээмэл нь энэ шашны номлол, урсгалаас болж тоймгүй олон гэр бүл чимээгүй салдаг аж. Учир нь тэдгээр гүн итгэгчид амьдралдаа оролцохоо больж, ажлаа ч орхидог байна.

Тэд одоогийн энэ бүхэн түр зуурынх. Харин бурхныг дагаад явбал мөнхийн амьдрал байгаа гэдэгт итгэдэг. Харин үр дагавар нь дээр дурдсан бүхэн.

Бид энэ сэдвийн хүрээнд саяхан ээжийгээ алдсан Г.Батбямбатай уулзаж, "Монгол сувд" сүмийн Сонгинохайрхан дүүрэг дэх салбарын дэд дарга Н.Хэрлэнгээс тодруулахад дараах зүйлсийг ярьж байна.

Г.Батбямба: Үр хүүхдүүд чинь Сатаны сүнстэй болохоор таны үгэнд орохгүй, эсэргүүцээд байна гэж заадаг

-Солонгосын “Шинэ тэнгэр газар” гэх нэртэй шашны урсгал манай улсад "Монгол сувд" сүм нэртэйгээр үйл ажиллагаа явуулдаг гэж мэдэгдсэн шүү дээ. Хэд орчим салбар, хэдэн гишүүнтэй эсэхийг та мэдэх үү?

-Удирдлага нь нийт 16 салбар 10,000 гишүүнтэй гэж ярьж байна лээ. Би энэ байгууллагыг хууль ёсны зөвшөөрөлтэй гэж бодохгүй байгаа. Учир нь бусад энгийн сүмүүд байршил нь тодорхой, загалмайтайгаа, гаднаас нь харахад ойлгомжтой байдаг. Гэтэл эднийх тийм биш. Анх манай ээжийг явж эхлэхэд 19 дүгээр хороололд байсан. Дараа нь 21 дүгээр хороолол руу нүүсэн. Одоо драгоны энд ирчихсэн байна. Зөвшөөрөлтэй эсэхийг нь холбогдох газарт хандаж, шалгуулах бодолтой байгаа. 

-Гаж гэж үзээд байгаа шалтгаанаа тайлбарлаач?

-Би өөрөө нэлээдгүй хугацаанд сүмд явсан. Тиймээс энгийн сүм ямар байдгийг сайн мэднэ. Жишээлбэл, “заавал хүн олж ир” гэж шахаж шаарддаггүй. Сайн мэдээг түмэнд түгээ гэдэг л дээ. Хүмүүст хүргэдэг. Гэхдээ тухайн хүн итгэх үү, ирэх үү гэдэг өөрийнх нь сонголт. Араас нь хөөцөлдөж шахдаггүй. Харин эднийх бол шахдаг. Би та нарыг “Сатаны сүнснээс аврах гээд байна” гэдэг. Өглөөний 6 цагаас оройн 20 цаг хүртэл энэ номлолоороо хүний тархийг байнгын зодчихоор мэдээж түгжигдэнэ биз дээ. Ингэж блоколж, вакум орчинд барьж, тусгаарладаг. 

Өөрөөр хэлбэл энэ зүйлийг байнгын яриад байхаар тухайн хүмүүс бурхнаас өөр юм бодохоо больж эхэлнэ. Тухайлбал, манай ээж баяр ёслол, хурим найр, зугаалгад гэр бүлээрээ явъя гэхээр үгүй. “Бид бурхны замыг олсон, мөнх амьдарна, мөнх насыг олно” гэдэг. Зааж байгаа тэр хичээлдээ ийм зүйлсийг ухуулга маягаар суулгаж байгаа учраас тэдгээр хүмүүс итгээд байна шүү дээ. Нөлөө нь ийм. Үүнийг цэвэр Eсүсийн шашны урсгалууд буруу, худлаа гэж үгүйсгэдэг. 

Дээрээс нь аврах гэж байгаа хүнээ худлаа яриад ч хамаагүй аваад ир гэдэг зүйлийг хэлдэг, араас нь хөөцөлддөг. Сая л гэхэд манай ээж өөд болохынхоо өмнө Ховд руу явсан. 

-Яах гэж?

-Манай ээжийн дүү Ховдынхоо суманд энгийн сүмд явдаг. Улаанбаатарт ач, зээгээ харахаар ирэх үед нь манай ээж энэ сүм рүү авааччихсан. Мэдээж эгч сум руу гаа буцаж таарна. Тэгтэл “Zoom”-ийн хичээлдээ орж ирэхгүй байна гэдэг шалтгаанаар сүм нь ээжийг Ховд руу явуулсан. Ингэж хүнийг шахдаг. 

-Зарим хүмүүсийн ажил дээр хүртэл очдог гэж сонссон?

-Тэр үнэн байх. Хаа хол Ховд руу очиж байгаа юм чинь энд хүний ажил дээр очих бол энгийн асуудал. Өөрөөр хэлбэл байх боломжтой. 

-Таны ээж хэдэн жил энэ сүмд явсан бэ?

-2024 оны нэгдүгээр сараас явж эхэлсэн. Тухайн үед нь их сайхан юманд явж эхэлсэн, ирж үзэхгүй юм уу гээд л. Бид ч ажилтай болохоор амжихгүй яваад байлаа. Асуухаар сүм ч юм шиг, сургалт ч юм шиг зүйл яриад. Сүм юм биш үү гэхээр үгүй ээ хувь хүний хөгжлийн сургалт гэсэн. Тэгэхээр нь өө болж байна ээж, яваад үзээ л гэв. Гэтэл сүүл рүүгээ “миний хүү заавал ир, чи миний үгэнд итгэх ёстой” гэх мэтээр бараг л дарамтлах, хүчлэх маягтай болоод эхэллээ. Энэ байдлыг нь анзаараад боль, гар гэсэн ч хүлээж аваагүй. 

Нэг жишээ хэлье. Манай авга ах нас бараад ажил явдалд нь явах гэтэл сүмээс ээжийг явж болохгүй гэсэн юм байна лээ. Тухайн үед ээж гайхаж, эргэлзээд дүүд “больдог ч юм бил үү, ямар сонин газар вэ. Ажил явдалд явж болохгүй гэж байна” гээд хэлсэн байгаа юм. Tэр үед нь гаргаад авчихдаг байж гэж одоо харамсаж байна. Ийм зүйл болсныг өнгөрснийх нь дараа л мэдлээ. 

-Ээж нь ганцаараа амьдардаг байсан юм уу?

-Аав маань бий. Бүр шантраад нутаг руугаа явж, дүүгийндээ амьдардаг юм бил үү гэдэг болчихсон байсан. Хоёр дүүг маань хүртэл байнгын яв гэж дарамтална. Үүнээс болоод бас л зайгаа аваад, шантарчихсан хэцүү байсан. Ингэж хүний тархийг баздаг. Энгийн сүмд явсан бол манай ээж хэзээ ч тэгэхгүй. Энэ сүм хичээл өгнө. Энэ Библийг задал, унш, хичээл ном хий гэдэг. Ингэсээр ээж унтахдаа хүртэл чихэвч зүүдэг болчихсон. 

-Хоол унд ч идэхээ больсон гэсэн?

-Сүүлдээ хоол ч идэхээ больсон. Сэтгэл хөдлөлд хэт автаад, итгээд, туйлшраад ирэхээр хүн хоол ч идэхээ больдог. Ингээд эхлэхээр мэдээж санаа зовно, хэлнэ. Өөрийгөө бод, амар гэхээр “үгүй, би бурханд биеэ өгчихсөн, хэзээ ч үхэхгүй, мөнх амьдарна” гэдэг. 

-Зан авир нь хэзээнээс өөрчлөгдөж эхлэв?

-Сүүлийн нэг жилээс л өөрчлөгдсөн дөө. Тэр Сатан гэдэг муу ёрын сүнс. Энгийн сүмд ийм хараалын байдалтай, бусдыг буруутгасан, муулсан номлол хийхийг хориглоно шүү дээ. Аль ч шашин тийм. Гэтэл энэ байгууллага “үр хүүхдүүд чинь Сатаны сүнстэй болохоор таны үгэнд орохгүй, эсэргүүцээд байна” гэж заадаг. Хүнд ийм зүйл зааж болохгүй. 

-Орлогынх нь 10 хувийг авдаг гэж ярьсан. Ямар учиртай вэ?

-Энгийн сүмд ч орлогын 10 хувь гэдэг л дээ. 

-Орлогыг нь яаж тодорхойлох юм. Жишээлбэл цалин байх юм уу?

-Тийм. Долоо хоногийн 700,000 төгрөгийн цалинтай бол 70 мянга гэх жишээний. 

-Өдөр бүр өгөх үү?

-Би энд явж байгаагүй болохоор сайн мэдэхгүй байна. Энгийн сүмд долоо хоногт нэг удаа гэхээр сард дөрвөн удаа очно гэсэн үг. Дөрвөн удаа очихдоо өргөл өгч ч болно, өгөхгүй байсан ч болно. Заавал гэж шаардахгүй. Христийн номлол дээр орлогын 10/1 гээд байж л байдаг. 

-Ээж нь тухайн сүмд хэр их мөнгө төгрөг өгсөн бол?

-Эхлээд зохих хэмжээгээр өгдөг байсан ч сүүлдээ гэрт наалдах, авах юм бараг үгүй болсон. Аавын цалингаар  л голдуу болгодог.  Ээж бол цалингаа дандаа нуугаад тийшээ л өгдөг болсон байх. Би ингэж хардаж байгаа. 

-Бүх цаг хугацаагаа сүмдээ зарцуулдаг, ажил хийхээ больчихсон, амьдралдаа оролцдоггүй ийм хүмүүс зөндөө байгаа-

-Ямар ажил хийдэг байсан бэ, ээж нь?

-Хоолны газар ажиллуулдаг байсан ч ажил хийх шаардлагагүй гээд больсон. “Би бурхны хүн болж байгаа учраас ажил хийх шаардлагагүй. Миний сүнс ариуссан, гэгээрсэн” гэдэг ойлголт аваад шууд зогсоосон. Давхар ажиллуулдаг байсан ТҮЦ-ээ бас хаагаад, хашаандаа авчраад тавьчихсан. Ингээд тэтгэврээс өөр орлогогүй болсон доо.

-Энэ хоёр газрыг хэр удаан ажиллуулсан бэ?

-Хоолны газрыг насаараа ажиллуулсан. ТҮЦ-ийг хоёр жилийн өмнөөс л байх. Ингэж сайхан хөдөлмөрлөж явсан ээж маань энэ сүм рүү татагдаж орсноос хойш бүх зүйл өөр тийш эргэсэн.

-Яаж яваад орчхов?

-Аавын ангийн охин гоё сургалт байгаа суугаач ээ гэж манайд олон удаа ирсэн юм байна лээ. Аавыг л ятгаад байж. Аав ч дийлдэхгүй л дээ. Сүүлдээ манай эхнэрт нэг хэлээд үз гэсэн байгаа юм. Ээж ямар ч байсан нэг суугаад үзье гэж очсон. Тэгээд л тархиа “базуулчихсан”. Oгт гарч чадаагүй явсаар өнөөдрийн байдалд хүрсэн. Сүүлдээ өөрийгөө ч удирдах чадваргүй болдог юм байна лээ. 

-Та болон таны ар гэр, ах дүүс хохирогч болоод үлдлээ л дээ. Ийм ижил зовлон туулж байгаа, энэ тойргоос гарч чадахгүй байгаа хэр олон хүн мэдэх вэ. Кэйс дурдаж болох уу?

-Бүх цаг хугацаагаа сүмдээ зарцуулдаг, ажил хийхээ больчихсон, амьдралдаа оролцдоггүй ийм хүмүүс зөндөө байгаа. Дурдвал дуусахгүй. Гэр бүл салсан тохиолдол тоймгүй олон. Өөрөөр хэлбэл ажил хийхгүйгээр бурхандаа итгээд яв гэдэг итгэл үнэмшлийг төрүүлээд байна шүү дээ. Тиймээс бурхандаа л итгэвэл ажил хийх шаардлага алга гээд ажлаа болиод сүм рүүгээ гүйгээд байгаа юм. Бидний амьдарч байгаа энэ амьдрал түр зуурынх юм байна. Бурхныг дагаад явбал мөнхийн амьдрал байгаа гэдэг итгэл үнэмшлийг эндээс авчхаад бүхнээ хаяад тийшээ шуураад гүйгээд байна. 

Жишээлбэл, эмээ, ээжтэйгээ цуг амьдардаг өсвөр насны охин байна л даа. Тэр охин ээжийгээ зогсоож, болиулахын тулд амиа хорлоно гэж тагтан дээрээ гарч үсрэхийг завддаг. Ээжээ та наадахаа ярихаа, хэлэхээ больчих. Үгүй бол би үсэрлээ гэдэг. Аргаа барсан охин ингэж тэмцэж байна. Ганцхан гэр бүлийг тийм байдалд хүргэж байна шүү дээ. Ийм олон гэр бүл байгаа. Үгүйсгэх аргагүй. Ичээд, санаа зовоод ч гэдэг юм уу нийгэмд гарч ирж чаддаггүй. Хэрэв ийм хүмүүс байвал холбогдоорой, нэгдээрэй гэж уриалмаар байна. 

- Ээж нь сүмд илтгэл тавьж байхдаа нас барсан гэдгийг мэдээлэл хийхдээ дурдсан. Очиход нөхцөл байдал ямар байсан бэ. Энэ үйл явдлын дараа сүм ямар тайлбар хийв?

-Илтгэл тавьж байгаад унасан цаг нь өдрийн 14 цаг 07 минут. Ямархуу үйл явц болсныг бичлэгээр харсан л даа.

-Утасны бичлэг юм уу?

-Үгүй ээ, цагдаа дээр байсан камерын бичлэгийг харсан. Хууль, шүүхийн байгууллага шалгаж байгаа учир хэлэх боломжгүй. Харин ээж маань 14:07 минутад унасан байхад манай дүү рүү 14:47 минутын үед залгасан. Бүхэл бүтэн 40 минутын дараа гэсэн үг. Анх залгахдаа танай ээж ухаан алдаад уначихлаа гэж хэлсэн байдаг. 

-Эмгэнэл илэрхийлсэн үү?

-Ажил явдалтай байсан өглөө ээжийг нутаглуулахаар явсан хойгуур гурван эмэгтэй ирсэн байна лээ. Эгч маань явцгаасан нь дээрээ гээд буцаасан байсан. Үнэхээр л харамсаад ирсэн бол яагаад заавал байхгүй хойгуур ирэв зэрэг олон асуулт байна. 

-Насаараа ханилсан ханиа аав нь алдлаа. Та бүхэн төрүүлсэн ээжээ харамсалтайгаар алдлаа. Энэ хугацаанд ээждээ хэлмээр, ойлголцмоор байсан ч хүлээж аваагүй зүйлүүд олон байсан байх. Үүнээс болоод их ч маргалдаж. Эцэст нь ийм зүйл боллоо шүү дээ?

-Хамгийн харамсалтай зүйл энэ л дээ. Энэ шашны асуудлаас болоод ээж минь надад маш их гомдол тээсэн. Та нар миний үр хүүхэд байж үгэнд минь орохгүй байна, сүмд явахгүй байна гэдэг байдлаар ханддаг болсон. Бид мэдээж эсэргүүцнэ. Сүүлд л гэхэд Ховд явахад нь дургүйцсэн. Дотроо муу ээжийгээ арай л их гомдоогоод байна уу гэж бодсон л доо. Тэгээд аравдугаар сарын 06-нд төрсөн өдрөөр нь ээжийгээ сайхан баярлуулъя. Тэгээд муу ижийгээ хаяя даа, энэ замаараа яваг, зогсоож дийлэхгүй юм байна гэж бодсон. Тэр үед хэлэх гэж хадгалсан үгээ хэлж чадаагүй болохоор гомдолтой байдаг. Энэ бүхний цаана эдгээр хүмүүсийн гэр бүлийнхэн ямар хүнд, хэцүү нөхцөл байдалд орж үлддэг юм бэ гэдгийг ойлгосон. Ээжийгээ ганцхан удаа чанга тэвэрнэ дээ гэж бодож явсан юм. Гэтэл хэзээ ч ингээд үхчихнэ гэж бодоогүй. Өвчин, зовлон ч хэлдэггүй хүн байсан. Тиймээс энэ байгууллагад үнэхээр гомдолтой байна.

---

"Монгол сувд" сүмийн Сонгинохайрхан салбарын дэд дарга Х.Хэрлэн: Нийт 15 салбартай, 20,000 итгэгчтэй

-Танай сүм хэдэн жил үйл ажиллагаагаа явуулж байна?

-2016 онд үүсэн байгуулагдсан, 10 дахь жил рүүгээ орж байна. 

-Итгэгчид гэж ярьдаг. Хэд орчим хүн танай сүмд явж байна?

-Манай сүмд одоогоор 2,000 орчим хүн явж байна. 

-Нийт?

-Нийт гэвэл 10,000 орчим итгэгч байна. 

-Хэдэн салбартай билээ?

-Нийт 15 салбар сүм явж байгаа. Хотод найм, орон нутагт долоо. 

-Орон нутгийн салбарууд нь дандаа аймаг уу, суманд бас байгаа юу?

-Дандаа аймгуудын төвд бий. 

-”Монгол сувд” сүмийг БНСУ-ын “Шинэ тэнгэр газар” гэдэг шашны урсгалын дагуу байгуулагдсан гэж ярьж байгаа ойлголт зөв үү?

-”Монгол сувд” сүм гэдэг бүртгэлтэйгээр Монголд шашныхаа эрхийг аваад явж байгаа. “Шинэ тэнгэр газар” гэдэг өөрөө Библи ном дээр байдаг үг. Тийм учраас л хүмүүс биднийг тэгж буруутгаад байгаа юм. Яг албан ёсны нэр бол “Монгол сувд” сүм. 

-”Шинэ тэнгэр газар”-тай холбоогүй гэсэн үг үү?

-Ямар нэг холбоо байхгүй. 

-Сүүлийн үед гарсан мэдээллүүдийг харсан байх. Энэ асуудал дээр ямар тайлбар хийх вэ. Танай итгэгч байсан 58 орчим настай хүн энд нас баржээ?

-Тийм нөхцөл байдал болсон, үнэн. Тухайн үед нь Цагдаагийн газарт мэдэгдсэн. Цагдаагийн газар шалгаж байгаа. 

-Тухайн хүн танай сүмд хэдэн жил явсан бэ?

-Манай итгэгч болоод жил гаран л болж байсан хүн. 

-Манайд яриа өгсөн иргэн бусад сүмүүдтэй харьцуулбал танайхыг шахаж, шаарддаг гэж байна. Жишээлбэл, Ховдод байгаа хүнийг цахим хуралдаа суу гэж хэлэхээр Ховд руу явсан гэлээ. Энэ үнэн, бодит мэдээлэл мөн үү?

-Энэ мэдээллийг үзсэн. Хүүхдүүд нь ирж уулзахдаа хэлсэн. Яг тийм ажлаар яваад ирсэн эсэхийг бид мэдэхгүй байна. Жишээ нь манай сүмээс яваад ир гэж хэлж явуулаагүй. Миний зүгээс тэр хүнийг тэр хүн рүүгээ яваад ирээрэй гэдэг зүйлийг яриагүй ээ гэсэн үг. Тэгэхээр энэ талаар мэдэхгүй. 

-Та сүмээ төлөөлж ярьж байгаа биз дээ. Сүмийн зүгээс явуулаагүй ээ гэсэн үг үү?

-Тийм.

-Тухайн хүн худлаа хэлээд явчихсан гэсэн үг юм уу?

-Манайх ардчилсан байдлаар хувь хүний сонголтод нь нийцүүлдэг. Та боломжтой үедээ ирээрэй. Боломжгүй үедээ ирэхгүй байж болно оо гэсэн тэр зүйл нээлттэй байдаг. Тэр хүн өглөө ирнэ үү, орой ирнэ үү, ирэхгүй байсан ч тэр хүний асуудал. Заавал ир гэж шаарддаггүй. Хүмүүс өөрсдөө бурхны үгийг мэдээд сураад ойлгоод эхлэхээрээ сайн дураараа ирээд, явдаг. 

-Танайх хүнээ хэрхэн татдаг юм бол. Итгэгч олж ирдэг юм уу. Та бас хэллээ итгэл, үнэмшлээрээ болдог оо гээд. Нас барсан эмэгтэй танайд анх орохдоо хувь хүний хөгжлийн сургалт гэж ойлгосон асуудал ч байна. Анх ирж байгаа хүнд юу гэж хэлж, ойлгуулдаг юм бэ?

-Шашин номын байгууллага гэдгээ эхлээд албан ёсоор хэлдэг. Манайх бол Библи номыг хүмүүст зааж, мэдүүлж өгдөг байгууллага шүү. Албан ёсны нэршил хаягтай, “Монгол сувд” сүм гэдэг байгууллага шүү гээд хэлдэг. Нөгөө хүн маань Библи номыг уншаад заалгаад, сураад эхлэхээрээ энэ номд мэдсэн зүйлээ бусдад мэдүүлээрэй гэдэг үгнүүдийн дагуу өөрсдөө явж байгаа. Тиймээс бидэнд заавал хүн олж ир, авчир гэж шахдаг асуудал байхгүй ээ.

-Танайхыг бараг долоо хоногийн долоон өдөр хичээл ордог гэж байна. Хичээл гээд байгаа нь юу юм бэ, хөтөлбөр гэж байгаа юм уу. Байгаа бол юу, юуг хүмүүст зааж сургадаг вэ?

-Долоо хоногийн зургаан өдөр буюу гурав дахь болон бүтэн сайн өдөр ариун мөргөл хийдэг. Хоёр дахь, дөрөв дэх, нэг дэх, тав дахь өдрүүдэд өглөө 9 цагаас, орой 18 цагаас ирж сургалтдаа хамрагддаг. Заавал ир гэж шахдаггүй. Хөтөлбөр байгаа. 2025 оны нэгдүгээр сараас 12 сар хүртэл заагдах бүх хуваарь гарчихсан байдаг. Жишээ нь Библи гэдэг номыг ямар утгатай юм бэ гээд харвал зүйрлэлээр буюу кодоор бичигдсэн байдаг. Тиймээс хүн шууд уншаад ойлгодоггүй учраас түүнийг зааж мэдүүлэх сургалт л явагддаг. 

-Энэ олон хүнийг хамруулж байгаа танай сүмийн гол зорилго, нийгэмд үзүүлж байгаа нөлөө чинь юу юм бэ?

-Шашин номыг хүмүүс мэдээд, сураад эхлэхээрээ ядаж бурхан гэж юу байдаг юм бэ. Би ямар утга учиртайгаар бүтээгдээд яваад байгаа хүн юм бэ гэдгээ мэдээд  зөв, эерэг хандлагатай, уур амьсгалтай хүмүүс бүрэлдэн бий болж эхэлж байгаа юм. Жишээ нь манайд ороод өөрчлөлт гарч байгаа хүмүүсийг харвал архи, тамхинаас гарч байна. Гэр бүлдээ эерэг уур амьсгалуудыг бий болгож байна. Ядаж л хараал хэлэхээ больж байна. Анхнаасаа зөв зохистой зүйлүүдийг хэрэгжүүлж явах ёстой юм байна буюу буруу зүйл хийвэл болохгүй юм байна гэдгийг бага багаар сургалтаар дамжуулан хэлж өгдөг. 

-Хүн бүрийн өөрийнх нь шийдвэр эцсийн үр дүнг дандаа гаргаж байгаа-

-Та зөв, сайн гэдэг талаас тайлбарлах шиг боллоо. Гэхдээ тэр ээж сүмд явснаасаа хойш ажил хийхгүй байхыг номлодог гээд хоолны газраа хаагаад, ТҮЦ-ээ хашаандаа авчраад тавьчихсан байна л даа. Энэ тал руу нь бас чиглүүлээд байгаа юм биш үү. Танайх яг ямар байдлаар чиглүүлээд байна?

-Тэр хүнийг яагаад ажлаа орхисныг нарийн сайн мэдэхгүй байна. Бид бол хүнийг ажлаасаа гараарай гэдэг үгийг хэлдэггүй. Библи дээр ч байхгүй. Харин ч гэр бүлдээ гэрэл болоорой, ойр тойрны хүмүүсийг харин ч тусалж дэмжээд, бурхны үгийг аваад явж байгаа хүмүүс учраас илүү гэгээлэг, сайхан амьдрах нөхцөлийг нь бүрдүүлэхэд туслаарай гэж заадаг. 

-Тэр хүний тархинд суучихсан, үр хүүхдэдээ хүртэл хэлсэн байна л даа. Тэрийг нь юу гэж ойлгох вэ?

-Хүн болгоны аливаа зүйлийг хүлээж авах нь өөр байгаад байна. Жишээ нь тэр итгэгчийн хувьд энэ 50, 60 нас наслах явцдаа олон зүйлийг амьдрал ахуйдаа үзэж хараад явж байсан ч магадгүй энэ дотор орж ирээд бурхны үгийг заалгаад, сурах явцдаа “аа энэ үнэхээр миний амьдралд хамгийн чухал зүйл байна”  гэж тэр хүн өөрөө бодоод, итгээд магадгүй тэрнийхээ төлөө шийдвэр гаргаад явсан байхыг үгүйсгэхгүй. Хүн бүрийн өөрийнх нь шийдвэр эцсийн үр дүнг дандаа гаргаж байгаа. 

-Танайх 10 жил үйл ажиллагаа явуулсан гэлээ. Яагаад гаднаа тодорхой хаяггүй байна вэ, албан ёсны зөвшөөрөл бий юу. Бусад сүмүүдийг анзаарахад гаднаа загалмайтай, хаанаас нь ч харсан сүм гэж мэдэгдэхүйц байдаг л даа?

-Манайх албан ёсны зөвшөөрлөө 2016 онд авсан. Бид өөрсдийн гэсэн сүмтэй бол хаяг, байршлаа тавихад асуудал алга. Харин энэ байгууллагыг манайх түрээсэлж байгаа. Түрээслүүлэгч байгууллага анх гэрээ хийхдээ ямар нэг байдлаар гаднаа хаяг, загалмай байрлуулахгүй шүү гэж тохиролцсон юм. 

-Санхүүжилтээ хаанаас босгож байна. Нийт 15 салбартай гэсэн. Энэ салбарууд бүгд л байртай байх. Бүх зардлуудаа яаж болгож байна. Жишээлбэл Солонгосын “Шинэ тэнгэр газар” гэж урсгалтай холбоотой бол гаднаас санхүүждэг гэж ойлгож болно. Гэтэл холбоогүй гэлээ?

-Библи дээр аравны нэг хувийг өгөөрэй гэдэг ишлэл байдаг. Гэхдээ монголчуудын амьдрал ахуй өнөөдөр ямар байгаа билээ. Тэр болгон олсон мөнгөө өгөөд байх боломжтой хүмүүс цөөн. Бурхныг мэдээд явж байгаа итгэгч буюу хүмүүс маань өөрсдийн итгэл үнэмшлийн дагуу боломжоороо өгдөг гэсэн үг. Жишээ нь бурхны үгийг сонсоод явж байгаа 10 хүний тав нь л өгдөг. Гэхдээ өгөхгүй байгаа хүмүүсийг заавал өгөөрэй гэж шахаж, шаарддаггүй. 

-Энэ алдаг оног өгч байгаа хүмүүсийн мөнгөөр тогтмол үйл ажиллагаагаа явуулж байна гэж үү?

-Тийм. Яг одоогоор энэ итгэгч нарынхаа өгч байгаа өргөл, хандиваар л энэ үйл ажиллагаануудаа цааш нь үргэлжлүүлээд явуулж байдаг гэсэн үг.

-Уучлаарай, хардаад асууж байна. Энэ хүмүүс тийм баян юм уу. Жишээлбэл 10 хүний тав нь өгдөг гээд бодохоор боломжгүй санагдаж байна. Та бол сүсгээрээ өгдөг гэсэн шүү дээ?

-Энгийнээр бол бид гандан орлоо гэхэд хоосон ордоггүй шүү дээ. Заавал жаахан ч гэсэн зүйл бариад ордог, номоо уншуулаад гардаг. Түүнтэй адил бурхныг мэдээд явж байгаа хүмүүс учраас бурхныхаа өргөөнд ирээд энэ олсон зүйлээсээ 5, 10 мянган төгрөг, зарим нь 500 мянган төгрөг ч юм уу өгөөд яваад байхад олон хүний өргөл хандив нийлж байгаа учраас бүрэлддэг. Өөр ямар нэг санхүүжилт байхгүй. Бусад салбарууд дээр ч бүх санхүүгийн тайлан тооцоо, бичиг баримтуудыг нь аваад, үзээд хараад, шалгаад явж байгаа. Итгэгчдэдээ ч шилэн байдлаар тайлагнадаг. 

• 

• 

• 

• 

• 

• 

• 

• 

• 

Сэтгүүлчийн тэмдэглэл: Ямар шашин шүтэх, эс шүтэх нь хувь хүний хуулиар олгогдсон эрх. Харин туйлын үнэний эсрэг номлож, хорвоогийн жамаас хазайж болох мэт ухуулж, ар гэр, ажил амьдралаас нь холдуулж, тусгаарлаж буй бол өөр асуудал. Жишээлбэл би мөнх насална, ажил хийх шаардлагагүй, амьдралд мөнгө хэрэггүй гэдэг байдлаар аливаад ханддаг болсон, гэр бүлээсээ салсан олон мянган хүн байна. Тэдгээр итгэгчдийн ард хохирч үлдсэн, чимээгүй зовлон амссан бас л мянга, мянган хүн байна. Тэд нийгэмд дуу хоолойгоо хүргэхээр, бусдад сэрэмжлүүлэхээр нийгмийн сүлжээнд групп ч үүсгэжээ.

Харин нөгөө талд буруутай гэгдэж буй 20,000 итгэгчтэй сүмийнхэн бүх зүйлийг няцааж байна. Нээлттэй мэдээллийн сангаас харвал "Монгол сувд" сүм 2016 онд "Сүсэгтэн олны шашин, хурал номын эрэлт хэрэгцээг хангах үйл ажиллагааг хууль тогтоомжийн хүрээнд эрхлэх" гэх чиглэлээр ажиллана гээд албан ёсны зөвшөөрөл авч, ашгийн төлөө бус хэмээн бүртгүүлжээ. Тэргүүнээр нь Цэнд-Аюуш Гантөгс гэж бүртгэлтэй байна.

Хэрэв энэ сүм үнэхээр дээрх байдлаар номлодог бол "би мөнх насална, ажил хийх шаардлагагүй, амьдралд мөнгө хэрэггүй" гэж итгэсэн 20,000 хүн байх магадлалтай байна.