Цэргийн алба хаах доод хязгаарыг 20 нас болгох өргөдлийг иргэн Ж.Саранчимэг санаачилсан байна. Тус өргөдөл Dparliament.mn цахим өргөдлийн санд байршсан бөгөөд ЕБС-ийн хүүхдүүдэд цэргийн зарлан дуудах хуудас ирдэг нь тохиромжгүй гэж үзжээ.
Тиймээс "цэргийн албанд мордох доод хязгаарыг 20 нас болгосноор хүүхэд хоёр жил их дээд сургуульд сурах, ажиллах явцдаа эх орон, газар нутаг, хууль дүрэм, хүмүүсийн харилцаа, мэргэжил боловсрол зэргийн тухай суурь мэдлэгтэй болно" хэмээн үзэж байгаа ажээ. Тэрчлэн "айх айдасгүй ухамсартайгаар цэргийн алба хаах боломж бүрдэнэ" гэжээ.
Мөн хугацаат цэргийн алба хаагчдыг аж ахуйн ажилд оролцуулахгүй байж, цэргийн мэргэжлийн сургалт бэлтгэлд хамруулах тухай өргөдлийг санаачилсан байна. Тус өргөдлийг иргэн Э.Тэмүүгээ санаачилсан бөгөөд одоогоор 119 хүн гарын үсэг зуржээ.
Өргөдлийг санаачлагч Э.Тэмүүгээ" Монгол Улсын батлан хамгаалах салбарын чадавхыг сайжруулахын тулд хугацаат цэргийн албан хаагчдыг зөвхөн бие бялдрын болон цэргийн мэргэжлийн сургалт, дадлагаар хангах нь зүйтэй. Одоогийн нөхцөлд цэргүүдийг зам, барилга, тариалан, аж ахуйн ажилд дайчилж буй нь тэдний үндсэн үүрэг болох эх орноо хамгаалахад чиглээгүй, цэргийн албаны нэр хүнд, чанарыг бууруулж байна. Иймээс цэргүүдийг мэргэжлийн сургалт, тусгай бэлтгэл, технологийн чадвар олгох сургалтад хамруулж, аж ахуйн ажлаас бүрэн чөлөөлөх нь зүйтэй. Энэ нь цэргийн сахилга, чадвар, хөдөлмөрийн үнэлэмжийг дээшлүүлж, эх оронч хүмүүжил, батлан хамгаалахын бодит бэлтгэлийг сайжруулах ач холбогдолтой" гэжээ.
Хугацаат цэрэг бол эх орныхоо батлан хамгаалах хүчний нэгж. Гэвч тэдгээр залуусыг хөдөө аж ахуй, барилга, засвар, бизнесийн чиглэлийн ажлуудад оролцуулж, зөрчилтэй нөхцөлд хөдөлмөр эрхлүүлэх явдал гарч байгаа аж. Тиймээс тус өргөдөлд ирэх оны нэгдүгээр сарын 4-ний өдрийн 12:59 цаг хүртэл санал авах юм байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Demjij bn