УИХ-ын гишүүд: Дансаа хаалгасан ААН-үүд яаж татвараа төлөх вэ. Уян хатан шийдэх хэрэгтэй

Өчигдөр Засгийн газар Татварын багц хуулийн төслийг хэлэлцээд УИХ-д өргөн мэдүүлэхээр болсон.

Энэ үеэр Ерөнхий сайд Г.Занданшатар "Татвар төлөгчдийн дансыг шууд хааж албадлага хэрэглэдэг байдлыг халж, зөвлөн туслах чиглэл рүү шилжинэ. 20, 30 мянган жижиг татвар төлөгчдийн дансыг хаалаа гээд шальтай төлөгдөж байгаа юм байхгүй байгаа шүү дээ. Яагаад шүүхийн шийдвэргүйгээр хүний өмч хөрөнгөд халдаж байдаг юм гэх асуудал яригдаж байна. Дансыг нь хаагаад хаячихаар яаж тэр хүн яаж татвараа төлөх юм. Татварын маргаан таслах зөвлөл нь үр ашигтай ажилладаг, эрүүл саруул механизм бий болгох хэрэгтэй" хэмээн зэмлэв.

Тэгвэл ААН-үүдийг татварын өртэй хэмээн дансыг нь хааж буй асуудалд УИХ-ын гишүүд байр суурийг тодрууллаа.

ЦХИХХ-ны сайд Э.Батшугар: ААН-үүдийн дансыг шууд хааж байгааг буруу гэж боддог. Тус байгууллагад орж ирэх мөнгөн гүйлгээг тэр чигт нь царцаачихвал яаж үйл ажиллагаагаа явуулж, ажилчдынхаа цалинг тавих вэ гэх асуудлууд гарна. Иймд тухайн дүүрэг, хорооныхоо байцаагчтай тохироод хуваарь гаргаад төлөөд явах нь зөв.

Харин нэг асуудал дээр данс хаах нь зөв гэж боддог. Хүүхдийнхээ тэтгэмжийн мөнгийг төлдөггүй, зугтаачихдаг эцэг/эх бий шүү дээ. Тэдний дансыг хааж, хүүхдийн мөнгийг төлүүлэх нь зөв.

УИХ-ын гишүүн Х.Баасанжаргал: Данс хаадаг тогтолцоотой би санал нэгддэггүй. Тухайн бизнес эрхэлж буй компанийн үйл ажиллагаа тогтвортой үргэлжилж байж л Улс татвараа авах боломж бүрдэнэ шүү дээ. Хааж, боох замаар татвар төлүүлэх нь яав ч болохгүй үзэгдэл.

Энэ асуудалтай холбоотой тодорхой тоон мэдээллүүдийг би цуглуулж байгаа. Ер татварын байцаагч ААН-ийн дансыг хаах шийдвэр гаргаад байгаа нь зөв эсэхэд дүн шинжилгээ хийх хэрэгтэй. Нөгөөтээгүүр эдийн засгийн эрх чөлөөний асуудал энд хөндөгдөнө. Шүүхийн хяналтад байх ёстой асуудал гэж үзэж байгаа. Яагаад гэвэл хүнийг баривчлахын тулд заавал шүүхийн зөвшөөрөлтэй байдгийн адил хүний мөнгө, эдийн засгийн эрх рүү халдах гэж байгаа бол шүүхийн зөвшөөрөл хэрэгтэй шүү дээ. Улсын байцаагчийн дураараа шийддэг асуудал байх ёсгүй.

УИХ-ын гишүүн П.Сайнзориг: ААН-үүдийн дансыг хаахгүйгээр 100 хувь битүүмжилдэг байсан бол мөнгөн урсгалын 80 хувийг битүүмжлэх саналыг Засгийн газраас оруулж ирж байгаа юм билээ. Хувь гишүүний зүгээс байр сууриа илэрхийлэхэд татварын өртэй компаниудад орж ирж байгаа мөнгөн гүйлгээний 40 хувиас хэтрүүлэхгүй авах ёстой гэж бодож байна. Ингэж үе шаттай татварыг нь төлүүлж болно. Нөгөө талд тус ААН-ийг мөнгөн урсгал болон мөнгөн дутагдлаас сэргийлэх, ажлын байр, бизнесээ өргөжүүлэх боломжийг нь олгох хэрэгтэй. Бусад орнуудад ч энэ жишиг хэрэгждэг.

ААН орлого олж байж л татвараа төлнө шүү дээ. Иймд уян хатан татварын шинэчлэлтийг хийх ёстой гэж харж байгаа. Татвар төлөгчдөө дэмжихгүй бол Улсын төсөв бүрдэхгүй. Иймд маргаан таслах ажиллагааг илүү мэргэжлийн байдлаар хийх ёстой.

УИХ-ын гишүүн Ж.Алдаржавхлан: Манай Ерөнхий сайд нэг ч ААН-ийн дансыг татварын өртэй холбоотойгоор хаахгүй гэсэн шүү дээ. Гэтэл одоогийн байдлаар 22 мянган ААН-ийн дансыг хаачихсан нөхцөл байдалтай буй. Татварын байцаагч нартаа өгч байгаа даалгавар нь төсвийн орлого бүрдүүл гэх. Тэдний авч буй арга хэмжээ нь данс хаах. Энэ асуудал дээр Ерөнхий сайд, Засгийн газар дорвитой шийдвэр гаргаад явах байх гэж бодож байна.

Яг бодит байдал дээр төсвийн зарлага маш их болсон. Зарлагаа санхүүжүүлж чадахгүй болсон шүү дээ, бид. Иймд төсвийн шинэчлэлт хийж Засаг захиргааны шинэчлэлт, хэмнэлт хийхгүй бол цалингаа ч тавьж чадахгүйд хүрэх нь.

УИХ-ын гишүүн О.Номинчимэг: Манай Улс ЖДҮ эрхэлж буй анхан болон дунд шатны ААН-дээ ээлгүй. 1.5-6 тэрбумын орлоготой 4000 орчим ААН татвар төлөлтийг нуруун дээрээ үүрч яваа. Татварын бодлого, процесийн хувьд ээлгүй байгааг бид харж байна. Иймд эл босгыг өөрчлөх, хөнгөвчилсөн журамтай болох, хамгийн гол нь шударга татварын тогтолцоотой байхад анхаарах шаардлагатай. Юун түрүүнд очоод дансыг нь хаахаа болих нь зүйтэй. Хэчнээн маргаантай байгаа ч гэсэн тухайн ААН үйл ажиллагаагаа хэвийн үргэлжлүүлж байх ёстой. Энэ зохицуулалтыг оруулахаар ажиллаж байна.

Видео:

Өөрийн сэтгэгдлээ илэрхийл

Share Tweet