₮50 мянгаар нийлж ангийнхаа 22 охиныг баярлуулсан дөрвөн хүү: Цэргийн баяраар тоглоомын төвд тоглуулбал гоё

Цахим орчинд Олон улсын эмэгтэйчүүдийн эрхийг хамгаалах өдөр ангийнхаа 22 охиныг баярлуулж буй дөрвөн хүүгийн видео бичлэг цацагдаж иргэдээс эерэг сэтгэгдэл, хайр эгдүүг хүртсэн. Тэдгээр дөрвөн хөвгүүн нийслэлийн ерөнхий боловсролын 163-р сургуулийн 9-р ангийн "Ё" бүлгэмийн сурагчид аж.

Сургууль бүрээс шилжин ирсэн хүүхдүүд 2025 оны есдүгээр сарын нэгэнд нийлж одоогийн С.Өнөрцэцэг багштай 9-р ангийг бий болгож, бүтээлцэж буй. Тэдний анги 22 охин, дөрвөн хөвгүүнтэй. Долоон сарын хугацааг л хамтдаа өнгөрүүлсэн гэхэд тэд есөн жил тохой нийлүүлэн суусан мэт нэг анги болон уусан нэгдэж, чаджээ. Өдгөө тэдний ангиас инээд, аз жаргал, баяр хөөр үл тасарна. 136-р сургуулийн 9-р ангийн "Ё" бүлгийг сурвалжилсан сурвалжилгаа хүргэж байна.

Тэд сурагч насныхаа үнэ цэнтэй, нандин мөч бүрийг хадгалж үлдэхийн тулд цахим орчинд ангийнхныхаа хөгжилтэй зүйлсийг бичлэг болгон үлдээж эхэлсэн байна. "Анх манай анги хоёр хөвгүүнтэй байсан. Тухайн үед хоёрхон хөвгүүн 20 гаруй охид байсан болохоор эвгүй санагдсан. Сүүлд хоёр хөвгүүн шилжиж ирээд манай дөрөв бүрдсэн дээ. Манай ангийн дөрвөн бусад ангийн хөвгүүдийг бодвол хүмүүжилтэй санагддаг. Ангийн охидоо хүндэлж харьцдаг, ямар нэгэн муу зуршил байхгүй, хараал хэлдэггүй гээд олон сайн чанарууд их" хэмээн ангийн охид нь ярина.

-Ангийнхаа охидыг баярлуулахаар тус бүр ₮50 мянгыг нийлүүлсэн-

Ангийн дөрвөн хөвгүүн охидоо баярлуулахаар хоорондоо ярилцаж тус бүр ₮50 мянгыг нийлүүлэхээр тохиролцжээ. Улмаар сургуулийн ойролцоох дэлгүүрээс ундаа, амттан авсан байна. Мөн ангийн багшдаа шоколад авахаа мартаагүй аж. "Дөрвүүлээ ч гэсэн баярын өдөр учир ангийн охидоо баярлуулах ёстой гэж бодсон. Бидний сэтгэл гаргаж бэлдсэн зүйлийг аягүй гоё хүлээн авч, баярлаж буйг нь харах сайхан байсан. Цэргийн баяраар биднийг тоглоомын төвд тоглуулбал их баярлана" гэж ангийн хөвгүүд хэллээ. Ангийн охид дөрвөн хөвгүүнээ баярлуулахаар хоорондоо ярилцаж төлөвлөсөн бөгөөд одоогоор нууц байгаа аж.

Мөн хөвгүүд "олон охидтой байх гоё байдаг. Хоцорсон хичээлээ нөхөх, шалгалтын үед бид дөрөвт их тусалдаг. Охидоо хүндэлж аль болох түрүүлж буулт хийхийг хичээдэг" гэлээ. Харин охид хөвгүүдийнхээ тухай "Манай ангийн дөрөв сурлага сайтай, томоотой учраас ангид үймүүлдэг хүн байхгүй. Чимээгүй, амар тайван байдаг. Багш нар хүртэл манай ангийг магтдаг. Манай дөрөв бидэнд үнэхээр их халамжтай, нөмөртэй байдаг " гэв.

Өнгөрсөн оны есдүгээр сард өөр өөр сургуулиас шилжиж ирсэн хүүхдүүд нийлж "Ё" бүлгэмийг бий болгожээ. Анхандаа тэдэнд биеэ барих, санаа зовох зэрэг асуудлууд байсан аж. Төд удалгүй тэд ижилдэн дасаж, найзалж нөхөрлөж эхэлжээ. Одоо тэд аз жаргал, баяр хөөр дүүрэн хичээлдээ сууцгааж байгаа нь энэ. Мөн өөр бүлгэмд шилжин очсон ч дасаж өгөхгүй байсан учир тэдний ангид шилжиж ирсэн хүүхдүүд ч цөөнгүй.

-Ангийнхантайгаа хувь тохиол, ерөөлөөр учирсан гэж боддог-

Ангийн багш "Манай ангийн хүүхдүүд өдөр ирэх тусам бие биедээ дасаж байна. Нэг анги болоод долоон сар болсон ч нэгдүгээр ангиасаа хамтдаа байсан мэт халуун дотно хамт олон болж чадсан. Анги нийтээрээ хичээл сурлага сайтай гэж сургуулийн багш нар үнэлдэг. Бүгд зөв төлөвшилтэй гэр бүлийн суурь хүмүүжил сайтай хүүхдүүд. Тийм учраас богино хугацаанд халуун дотно хамт олон болж чадсан байх. Бусад ангийн хүүхдүүдээс илүү нээлттэй санагддаг. Ангийн багшийн хувьд хүүхдүүдтэйгээ ойр, найз нөхөд мэт байхыг хичээдэг.

-Саяхан болсон мартын найманд танай ангийн дөрвөн хөвгүүн охидоо баярлуулсан гэж байна?

-Манай дөрөв надад ямар нэгэн зүйл хэлээгүй. Тухайн өдөр баасан гараг гуравдугаар сарын 7-ны өдөр байсан учир баяр гэсэн зүйл огт бодоогүй байж байсан. Тэгсэн хөвгүүд маань олон гэлгүй ангийн 22 охиноо надтай нийлээд 23 хүн баярлуулсан. Ангийнхан охид үнэхээр баярлаж сайхан хүлээж авсан. Миний ч мөн ижил их баярласан.

-Таны хувьд өнгөрсөн есдүгээр сараас эхэлж ажилласан юм байна. Танай анги бүгд л энэ сургуульд шинээр бүл нэмж ирсэн байх нь?

-Өнгөрсөн есдүгээр сард 163-р сургуульд ажиллаж эхэлсэн. Тухайн үед анги дааж авах уу гэсэн саналыг сургуулиас тавьсныг нь хүлээн авсан. Анх хоёр хөвгүүн 19 охинтой анги хүлээж авч байсан. Сарын дараагаас нэмэгдэж хүүхэд шилжиж ирээд 22 охин, 4 хөвгүүн нийт 26 хүүхэдтэй анги болсон. Би ангийнхантайгаа хувь тохиол, ерөөлөөр учирсан гэж боддог. Хүмүүжил, төлөвшил сайтай, хичээнгүй, зөв хандлагатай хүүхдүүдийн багш болсондоо олзуурхаж баярлаж явдаг.

Өөрийн сэтгэгдлээ илэрхийл

Share Tweet