Г.Занданшатарт “Эрчист Монгол” ХХК-ийг буулгасан шигээ бусдыг нь цомхотгох амбиц бий юу

Төрийн данхар бүтцийг цомхон болгож, давхардлыг арилган, үргүй зардлыг хэмнэх бодлого бодитоор хэрэгжүүлэхээр “Эрчист Монгол” ХХК-ийг Засгийн газраас татан буулгав. Хагас жилийн хугацаанд тус компанийн өр төлбөр ₮3.5 тэрбумыг давж, цалингаа ч тавьж чадахгүй нөхцөл байдалд хүрсэн байжээ.

Өнгөрсөн зургаан сард Г.Занданшатар Ерөнхий сайдад нэр дэвшиж байх үеэрээ “Төрийн алба цомхон, чадварлаг байх ёстой. Төрийн албанд үр ашгийн менежментийг хэрэгжүүлэх шаардлагатай. Гэхдээ энэ нь одоогийн улс төрийн болон нийгэм эдийн засгийн зорилт чиглэлтэй нийцэх ёстой. Төрийн албаны тухай хуулийг 2017 онд баталсан. Засаглалын реформ өөрөө ҮХНӨ болон уг хуультай уялдах учиртай. Хариуцлагын тогтолцоог сайжруулах ёстой. Бүтэц, бүрэлдэхүүний тухай хуулийг дээрх агуулгаар боловсруулж өргөн барина” гэж ам гарч байсан.

Тэр цагаас хойш есөн сар болоход сая нэг “Эрчист Монгол” ХХК-ийг үргүй зардалтай гэж татан буулгалаа. Гэхдээ ганц үүгээр зогсох учиргүй. Өнгөрсөн хугацаанд Засгийн газар, УИХ-ыг тэргүүлэгчид цөм данхар бүтцийг хумина, цомхотгоно гэдэг байсан ч эсрэгээрээ төрийн албыг томруулсан жишээнүүд их бий. Иймд үргүй, үндэсгүй зардал тээгч ТӨК-иудыг татан буулгаж, цомхон төр байлгана гэх агуулгатаа Г.Занданшатар эзэн болох хэрэгтэй.

Өнөөгийн байдлаар орон нутгийн өмчит л гэхэд 400 орчим байгууллага бий. ЗГХЭГ-ын мэдээлж байснаар 122 төрийн өмчит компани байна. Үүний 99 нь толгой компани, 23 нь охин компани. Үүнийг задлаад харвал ЗГХЭГ-ын доор байгаа “Эрдэнэс Монгол”. Энд Зэс металлын групп, Дэд бүтэц логистикийн группийн арван толгой компани, дөрвөн охин компани байгаа бол Түлш эрчим хүчний группт зургаан толгой, арван охин компани байна.

Бүр Төрийн өмчийн бодлого зохицуулалтын газрын доор 42 компани, Эрчим хүчний яамны 34 компани, Сангийн яамны мэдлийн долоон компани, Зам, тээврийн яамны дөрөв, Хүнс, хөдөө аж ахуй, хөнгөн үйлдвэрийн яамны дөрөв, Аж үйлдвэр, эрдэс баялгийн яамны хоёр компани бий. Нийт төрийн өмчит компаниудыг эзэмшлийн хувьд аваад үзвэл ТӨҮГ 16, ТӨХК 46, ТӨХХК 33. Төрийн өмчийн оролцоотой компаниудын хувьд хоёр нь хувьцаат компани, 17 нь ХХК, нэг нь ХНН байгаа бол нээлттэй хувьцаат компани зургаа байна.

Зарим нь төсөвт нэмэртэй ч нэрмээс нэмж байгаа нь ч цөөнгүй. Ашиггүй, алдагдалтай ажиллаж, өр бөөгнүүлдэг.

ТӨК-иудын алдагдлын гол шалтгаануудыг харвал хөрөнгө оруулалтын төлөвлөгөөнд тусгагдаагүй ажлыг санхүүжүүлдэг. Алдагдалтай ажилладаг мөртлөө их хэмжээний үр дүнгийн урамшуулал олгодог. ТУЗ-ийн гишүүддээ урамшуулал тараадаг. Нийтлэг зөрчил нь ерөөсөө л худалдан авах ажиллагааны алдаа, үр дүнгүй төлөвлөлт, гүйцэтгэлтэй холбоотой гэж дүгнэгдсэн байдаг аа.

О.ОНОН

Өөрийн сэтгэгдлээ илэрхийл

Share Tweet