Х.Нямбаатар "галзуурч байна"

Хотын дарга Х.Нямбаатар нийслэлд хэрэгжүүлэх Туулын хурдны замыг эсэргүүцсэний хариуд өөрийнхөө ахалж буй бүтээн байгуулалтыг дэмжих хүрээнд лоозон барьж гудманд гарав.

Магадгүй, нэг талдаа Нийслэлийн захирагчийн хувьд тэр өөрийнхөө бүтээн байгуулалтыг дэмжих нь зүйтэй. Өдөр шөнөгүй хот дахь ажлыг өөрөө лайвдаж, танилцуулж явсан Х.Нямбаатар өнөөдөр сошиал хандалтдаа хэт автаж, өөрийг нь шүүмжилсэн болгоныг "удирдах" гэж оролддог болов.

Монгол Улс бол ардчилсан улс бөгөөд нийслэлийн иргэд ямар ч бүтээн байгуулалтыг шүүмжлэх, жагсах, үзэл бодлоо чөлөөтэй илэрхийлэх эрхтэй.

Нэгт, ардчиллын амин сүнс хэвлэлийн эрх чөлөөнд халдах нь хэрээс хэтрэв. Ер нь ХЗДХ-ийн сайд байхаасаа л хэвлэлийн хурал дээр асуулт асуусан сэтгүүлчдэд “Эхлээд унш. Сэтгүүлч байж судал” гэхчлэн хэг ёг хариулт өгдөг, үргэлжлүүлэн урт урт юм ярьдаг байв. Харин одоо өөрийнхөө цахим хаягаар шууд дамжуулалт хийж, түүндээ хэвлэл, мэдээллийн байгууллагуудыг сэтгүүлч, редакцынх нь нэрийг цоллон “худалдагдсан”, “авлигачдын тролл” гэхчлэн орилж байгаа нь олон хүний эгдүүг хүргэв. Хууль зүйн сайдаар ажиллаж байсан хүний хувьд баримтгүйгээр гүтгэх, гэм буруутай эсэх нь шүүхээр тогтоогдоогүй байхад сошиалаар дүүжилж болохгүй гэдгийг тэр хэнээс ч илүү мэднэ. Тэгэхээр энэ бол эрх мэдэлдээ хэт дулдуйдсан, эрээ цээрийг давсан, зориуд гаргасан хандлага байх нь. Асуулт бүр түүнд таалагдах ёсгүй, сэтгүүлч бүр түүнийг дэмжихгүй албагүй билээ. Ерөөс бүгдэд таалагдах, бүхнийг хайрцаглах гэсэн оролдлого бол коммунизм мөнөөс мөн.

Хоёрт, хотын дарга, нийслэлийн МАН-ын даргын албан тушаалдаа эрдэж жагсаал цуглаан зохион байгуулав. Х.Нямбаатар дарга энэ үйлдлээ  “Туулын хурдны замын трасс дагуу ажиллаж байна” гэсэн тайлбартайгаар өөрийнхөө хаягаар шууд дамжуулсан. Даанч түүний хотын намын үүрийн гишүүдээ үүрэгжүүлсэн, барих самбар, хэлэх үгийг нь биечлэн зааварчилсан чат нь задарчихсан байдаг. Тэрбээр хэдхэн өдрийн өмнө "УИХ-ын гишүүн Э.Бат-Амгаланг хорооны Засаг дарга, хэсгийн ахлагч нарыг үүрэгжүүлж, улс төрийн зорилгоор жагсаал зохион байгууллаа" хэмээн шүүмжилж суусан. Гэтэл өөрөө яг ижил үйлдэл гаргав.

Ингээд өчигдөр түүний зааварчилгаа ёсоор самбар лоозон, барьсан хүмүүсийг дагуулж өдөржин Туул гол дагуу алхав. Ингэхдээ тэр зүгээр ч алхсангүй. “Хатан Туулаа хамгаалъя” уриатай жагсаж буй иргэдтэй мөргөлдөөн үүсгэх шахам зүйл болгов. Жагсагчдыг “Олигархын төлөөллүүд улс төрийн эрх ашгийн төлөө тэмцэж байна. Барьсан юмыг нь булааж ав. Энэ хүнийг жагсаалаас явуул” гэх мэтээр чичилсэн. Дээрээс нь айл айлын гадаа очиж, нэр хаягийг нь улс даяар зарлав. Тухайлбал, УИХ-ын гишүүн асан, зохиолч Ц.Оюунгэрэлийн гадаа очиж "Гараад ир" хэмээн хашхичив. Энэ нь хүний хувийн нууцыг задалсан төдийгүй, Туул голоо хамгаалах талаар үзэл бодлоо илэрхийлснийх төлөө нэг төрлийн дарамт үзүүлсэн үйлдэл болсныг иргэд шүүмжилж байна.

Үүгээр ч зогсохгүй “Зам бол хөгжил. Хөгжлийг гацаах гэж байгаа хүмүүсийг би хүний өөрийнгүй өдөр бүр лайв хийж зарлана. Нэг бол намайг алж байгаад Туулын хурдны замыг зогсоо” хэмээн шууд дамжуулалтаар уурсаж, "галзуурч эхэллээ".

Эцсийн эцэст түүний энэ галзуурлыг үзэл бодлоо чөлөөтэй илэрхийлэх эрхтэй нийслэлийн иргэд л татаж, зогсоож чадна гэдгийг тэр мартаж болохгүй.

Д.ХАДААН

Өөрийн сэтгэгдлээ илэрхийл

Share Tweet