Хэргийн мөрөөр: Хятадын сөнөөгч онгоцны нисгэгч Б.Болд-Эрдэнийг Филиппин улс тагнуулын хэргээр хөөсний ард

Энэ оны хоёрдугаар сарын 16-нд олон улсын хэвлэлүүдэд Монгол Улсын иргэн Б.Болд-Эрдэнийг Филиппин улсын Тагнуулын хэлтэс, Зэвсэгт хүчний 7 дугаар явган цэргийн дивиз, цагаачлалын алба зэрэг өргөн бүрэлдэхүүнтэйгээр тусгай ажиллагаа явуулан баривчилсан тухай мэдээлэл нийтлэгдсэн.

Уг асуудалд тухайн үед нь манай Тагнуул, Гадаад хэргийн яам тоймтой мэдээлэл өгөөгүй.

Баривчлагдсан Б.Болд-Эрдэнэ нь БНХАУ-ын Ардын Чөлөөлөх Армийн Агаарын цэргийн их сургуульд Сөнөөгч онгоцны нисгэгч гэдгээ Филиппиний Цагаачлалын алба болон, сургуульдаа огт мэдэгдээгүй байсан бөгөөд тэрбээр тус улсын Нисэхийн сургуулийн оюутнаар очсон байв. Өөрөөр хэлбэл түүнийг Агаарын цэргийн нисэхийн их сургуулийн төгссөн үнэмлэхтэй, мэргэжлийн нисгэгч байж нисгэгчээр сурахаар Филиппинд ирсэн явдлыг зориудаар тагнуулын мэдээлэл авах зорилго агуулж улсад нь ирсэн гэж үзэхэд хүрсэн юм.

Тэрбээр, нислэгийн дадлагын үеэрээ Филиппиний Иба нисэх буудлын Палауиг голын орчим буюу онцгой объектуудын зургийг гар утсаараа авсан нь мөрдөн шалгалтын явцад тогтоогдсон байдаг.

Энэ нь Филиппиний Цагаачлалын болон хэд хэдэн хуулийн заалтыг ноцтой зөрчсөн буюу цэргийн болон бүс нутгийн агаарын хөдөлгөөний мэдээллийг цуглуулах, өөрийн хэн болох намтар түүхээ буруу мэдээлэх, мэдүүлсэн зорилготой үл нийцэж буй хэмээн үзжээ. Түүнчлэн тухайн бүс нутаг нь БНХАУ, Филиппиний эзэмшлийн маргаантай бүстэй ойрхон учраас зориудын тагнуулын үйлдэл гэж үзэхээс аргагүй хэмээн орон нутгийн хэвлэлүүд мэдээлсэн нь бий.

Замбалес мужид болсон эл тагнуулын үйл ажиллагаатай холбоотой хэрэгт гадаадын иргэн баривчлагдсан нь үндэсний аюулгүй байдлыг хамгаалахад Филиппиний Засгийн газар тууштай ажиллах болно хэмээн тус улсын дотоодын хэвлэлүүдээрээ мэдэгдсэн. Тэд орон даяар тагнуулын үйл ажиллагааг мэдсэн даруйдаа илчлэхийг уриалсан юм.

Уг мэдээллийн дараа Монголын талаас Филиппин рүү хандсан ямар ч мэдэгдэл хийж, мэдээлэл өгөөгүй бөгөөд харин Филиппин дэх БНХАУ-ын Элчин сайдын яамнаас Б.Болд-Эрдэнийн холбогдсон хэргийг Хятад улстай хамааралгүй хэмээн мэдэгдэл гаргасан.

Ингээд харвал, Хятадтай холбоогүй гэдэг агуулгын ард Монгол Улс өөрийн хүнээрээ Филиппиний онцгой бүсээс тагнуулын мэдээлэл цуглуулахыг завдсан юм гэвэл бид өөрсдийн тагнуулаа илчүүлсэн болчихно.

Эл явдалд ямар ч байсан гэлээ дотоодоос тодорхой нэг түвшинд албан ёсны тайлбар гаргах, мэдээлэл солилцох замаар ойлголцолд хүрэхгүй юм бол Хятадын армид байсан Монголын иргэн Филиппинд тагнуул хийжээ" гэдэг мэдээ дурын гүүгл илэрц дээр гарч ирж байх жишээтэй.

Энэ сард Филиппиний Үндэсний Аюулгүй Байдлын Зөвлөл мөн л тагнуултай холбоотой томоохон мэдэгдэл хийсэн нь Хятад улстай холбоотой тагнуулын үйл ажиллагааг илрүүлсэн гэжээ. Энэ нь Хятадын тагнуулын байгууллагын даалгавараар ажиллаж байсан этгээдүүдийг олж илрүүлэн үйл ажиллагааг нь таслан зогсоосон бөгөөд мөн л олон байгууллагын хамтын ажиллагааны хүрээнд хамтарсан баривчилгаа хийсэн байна. Тэдгээр баригдсан этгээдүүд тагнуулын үйл ажиллагаанд оролцсон гэдгээ шууд хүлээн зөвшөөрсөн бөгөөд уг хэрэг Б.Болд-Эрдэнийг тагнуулын хэргээр баривчлагдсанаас сарын дараа гарсан нь Филиппиний хууль хүчнийхэнд сэжигтэй нөхцөл гэж үзэж буй талаараа онцолсон юм.

Эдгээр дараалсан үйл явдлын ард Филиппин улс Гадаадын нөлөөллийн эсрэг хуулийг яаралтай батлахыг дотооддоо уриалж эхлээд буй.

Ингээд Филиппинд Хятадын өмнөөс тагнуул хийсэн байж болзошгүй хэмээн сэжиглэгдэн баривчлагдсан Монгол Улсын иргэн Б.Болд-Эрдэнийг тэд улсаасаа албадан хөөж гаргаснаас хойш мэдээлэл шинэчлэгдээгүй.

Энэ асуудлаар Гадаад харилцааны яамны ТНБД Л.Мөнхтүшиг хэвлэлд хэлэхдээ, үнэхээр гадаадад тагнуулын хэргээр, тэр тусмаа үнэхээр тэгэж ажилласан эсэх талаарх мэдээллийг авч ажиллаж байгаа гэсэн бөгөөд тухайн иргэнийг Монголд авчирсан эсэх талаар мэдээлэл өгөөгүй.

Хэрвээ үнэхээр Монголын иргэн Хятадын нэрийн өмнөөс гуравдагч улсад тагнуулын ажиллагаа хийсэн нь үнэн бол энэ нь манай улсын нэр хүндэд төдийгүй манай улстай дипломат харилцаатай улс орнуудад ч таагүй ойлголт төрүүлэх үйл явдал юм.

Т.БАТСҮРЭН

Өөрийн сэтгэгдлээ илэрхийл

Share Tweet