Хэргийн мөрөөр #2: Б.Баатарыг ТЕГ-т 12 жилийн хорих ялтай зүйл ангиар шалгаж, ЭЦА дахь хэргүүдийг АТГ-т нэгтгэжээ

Агуулгын хураангуй

“Херо энтертайнмент групп” ХХК-ийн гүйцэтгэх захирал, Ерөнхий сайд асан Л.Оюун-Эрдэнийн ах Б.Баатарт холбогдуулан шалгаж байгаа хэргийн процессын талаарх хоёр дахь цувралаа уншигч танд хүргэж байна. Сар орчмын өмнө түүнийг АТГ-т дөрөв, ЭЦА дээр хоёр, ТЕГ-т Үндэсний эв нэгдэл бусниулах зүйл ангиар шалгаж буй талаар бид Хэргийн мөрөөр: Б.Баатарыг ТЕГ, ЭЦА, АТГ-аас 12 хүртэлх жилийн хорих ялтай долоон зүйл ангиар шалгаж байна нийтлэлээр хүргэсэн.

Тэгвэл яг одоогийн байдлаар ЭЦА дахь хоёр зүйл анги нь харьяаллын дагуу АТГ-т шилжиж, ТЕГ Эрүүгийн хуулийн 19.9 буюу Үндэсний эв нэгдлийг бусниулах зүйл ангиар яллагдагчаар татсан тогтоолоо гардуулахаар хүлээж байна. Нэг үгээр хэлбэл сарын өмнө "Монгол хан" жүжгийнхээ ажлаар гадагш явсан Б.Баатар Монголын хилээр орж ирмэгц ТЕГ-аас шалгаж байгаа зүйл ангиар саатуулагдах нюанстай байна.

Хэргүүдийг ерөнхий агуулгаар нь харвал,

• Ерөнхий сайд асан Л.Оюун-Эрдэнийн хүүгийн найз охиндоо бэлэглэсэн гэх цүнх, бөгжийг худалдан авсан эх үүсвэр,
• Л.Оюун-Эрдэнэд үнэтэй цаг бэлэглэсэн гэх асуудал,
• "Гэрэгэ" барилгын 14, 15 дугаар давхруудыг "дээрэмдэж" авсан гэх үндэслэл,
• Оюутолгойн 20 сая ам.долларыг ашигласан гэх ХЗДХ-ийн сайдын мэдэгдлээр,
• Батлан хамгаалахын сайд Л.Батлутыг "ЭОТ-оос 7 тэрбумыг авч Херо студиэ тохижуулсан гэх чуулганы хуралдааны үеэр хэлсэн үг,
• "Эко интернэшнл" тауэрын дэргэд баригдаж буй шинэ барилгыг Б.Баатар санхүүжүүлсэн гэх иргэний гомдол мэдээллээр,
• Эрчим хүчний сайд Б.Чойжилсүрэнд хамаарах газрын асуудлаар,
• "Зэс эрдэнийн хувь" компанийг авсан гэх мэдээлэл,
• Ерөнхийлөгч У.Хүрэлсүхийн ургийн мод, хамааралтай байж болох хаус хороолол зэргээр видео шторк цацсан зэрэг агуулгууд буй юм.

Агуулгын дэлгэрэнгүй

-АТГ дахь өрнөл: Шалгалтын хүрээнд Б.Баатарыг цахимаар мэдүүлэг өгөх, шаардлагатай баримтуудыг авч ирж өгөхийг даалгасан ч өгөөгүй байна-

ЭЦА-аас АТГ-т шилжсэн хоёр хэрэг: Эрүүгийн хуулийн 18.6, 18.3-р зүйл анги. Одоо АТГ-т Эрүүгийн хэргийн зургаан зүйл ангиар шалгаж байна.

• ЭХ-ийн 18.3: Татвар төлөхөөс зайлсхийх - нэг жил хүртэл хугацаагаар зорчих эрхийг хязгаарлах ялтай
• ЭХ-ийн 18.6: Мөнгө угаах - 12 жил хүртэлх хугацаагаар хорих ялтай
• ЭХ-ийн 22.1: Эрх мэдэл, албан тушаалын байдлаа урвуулан ашиглах - 12 жил хүртэлх хорих ялтай
• ЭХ-ийн 22.8: Төсвийн хөрөнгийг зориулалтын бусаар зарцуулах - найман жил хүртэлх хорих ялтай
• ЭХ-ийн 22.9: Төрийн өмчийн төсвийн бус хөрөнгийг зориулалтын бусаар зарцуулах - найман жил хүртэлх хорих ялтай
• ЭХ-ийн 22.10: Үндэслэлгүйгээр хөрөнгөжих - найман жил хүртэлх хорих ялтай дөрвөн зүйл ангиар шалгаж буй.

АТГ-аас эл зургаан зүйл ангид холбогдуулан сэжигтнээр татсан, мэдүүлэг авсан зүйл одоогоор байхгүй. Иргэнээс ирсэн гомдлын дагуу шалгалтын ажиллагааг үргэлжлүүлж байна. Шалгалтын хүрээнд Б.Баатарыг цахимаар мэдүүлэг өгөх, шаардлагатай баримтуудыг авч ирж өгөхийг даалгасан ч одоогоор мэдүүлэг өгөөгүй байгаа юм. Энэ талаар Б.Баатарын өмгөөлөгчөөс тодруулахад "Шаардлагатай баримтуудаа энэ долоо хоногт багтаан өгөх гэж байгаа" хэмээсэн юм.

ЭХ-ийн 22.1, Эрх мэдэл, албан тушаалын байдлаа урвуулан ашиглах зүйл ангиар шалгаж эхэлсэн хугацаа нь |2025 оны 09 сар|, үндэслэл нь төсвийн хөрөнгөөр "Монгол хан" жүжгийг санхүүжүүлсэн гэх. Харин |2025 оны 10 сар|-аас эхлэн ЭХ-ийн 22.8, 22.9, 22.10-р зүйл заалт тус бүрд хэрэг бүртгэл нээн шалгаж эхэлсэн байна.

Сүүлд ЭЦА-аас шилжсэн хоёр зүйл анги нь "Гэрэгэ" оффиссын барилгыг дээрэмдэж авсан гэх асуудал аж. Энэ хүрээнд шалгахдаа татвараас зайлсхийх, мөнгө угаах зэрэг зүйл ангиар зүйлчилсэн гэсэн үг.

Б.Баатарыг шалгаж буй агуулгаар АТГ-аас тодруулахад "Эрх мэдэл, албан тушаалын байдлаа урвуулан ашиглах зүйл ангид холбогдуулан шалгаж байгаа. Одоогийн байдлаар хэрэг бүртгэл нээж, мөрдөн шалгалт үргэлжилж байна. Байцаалт аваагүй, мөн ямар нэгэн гүйцэтгэх ажиллагаа явуулаагүй" гэх мэдээллийг өглөө.

-ТЕГ-аас 12 жил хүртэлх хорих ялтай зүйл ангиар шууд яллагдагчаар татсан нь түүнийг хилээр орж ирмэгц цагдан хорих боломжтой гэсэн үг-

АТГ дахь өрнөл нь ийм. Харин ТЕГ дахь хэрэг бол тэс өөр.

Зүйл ангийг тодруулбал, "Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон үйлдлийг зохион байгуулсан бол таван жилээс арван хоёр жил хүртэл хугацаагаар хорих ял шийтгэнэ" гэх зохицуулалттай.

Хачирхалтай нь, яг энэ зүйл ангиар Б.Баатарыг 2014 онд ТЕГ-аас шалгаж байсан. Шалгагдах болсон шалтгаан нь тухайн үед цацагдаж, нийгэмд дуулиан тарьсан "Тусгаар тогтнол" нэвтрүүлэгтэй холбоотой гэх. Шалгаж байх үедээ хэд хэдэн удаа Б.Баатараас мэдүүлэг, тайлбар авсан. Гэвч хэргийн үйл явц прокурор, шүүхэд шилжээгүй. Тэндээ намжсан байдаг.

Гэтэл хоёр дахиа "Үндэсний эв нэгдлийг бусниулах" гэх зүйл ангид холбогдуулан шалгаж эхэлжээ. Ингэхдээ |2026.02.27|-нд Б.Баатарыг Увс аймагт "Монгол тулгатны зуун эрхэм" нэвтрүүлгийн зураг авалттай явахад нь дээрх зүйл ангид холбогдуулан гэрчийн мэдүүлэг өгөх шаардлагатай буйг ТЕГ-аас танилцуулжээ.

Харин Б.Баатарын хувьд Увс аймгаас ирмэгцээ "Монгол хан" жүжгээ Европ-д толилуулах гэрээ үзэглэхээр хилээр гарсан байна. Яг одоогийн байдлаар Голланд улсад яваа гэх эх сурвалжийн мэдээлэл байна. Тэрбээр тухайн гэрээг үзэглэж дуусмагцаа Монголд ирж, ТЕГ-т ЭХ-ийн 19.9.1-р заалтад холбогдох хэрэгт мэдүүлэг, тайлбар өгөх хүсэлтээ хуулийнханд өгсөн гэгдэж байна.

Одоогийн байдлаар ТЕГ-аас "Үндэсний эв нэгдлийг бусниулах" гэх зүйл ангид холбогдуулан шалгаж байгаа үндэслэлээ тайлбарлаагүй. Б.Баатар ч Монголоос гарч яваад даруй нэг сарын хугацаа өнгөрчхөөд байна. АТГ-аас сэжигтнээр татсан зүйлгүй шалгаж байгаа бол ТЕГ-аас шууд яллагдагчаар татсан нь түүнийг хилээр орж ирмэгц цагдан хорих боломжтой гэсэн үг юм.

-Уг хэргийн улс төрийн нюанс ямар хардлага дагуулж байгаа вэ-

Б.Баатар бол Ерөнхий сайд асан Л.Оюун-Эрдэнийн төрсөн ах. Л.Оюун-Эрдэнэ бол сүүлийн арваад жил монголын улс төрийн гол тоглолтыг "ялагч" статусаас хийж буй У.Хүрэлсүхийг ил сөрж буй үндсэн дүр.

Тэгэхээр хууль, хүчнийхэнд өндөр нөлөө бүхий Ерөнхийлөгчийн инстутиц Л.Оюун-Эрдэнийн төрсөн ахыг "буулгаж" авах сонирхол төрж болох уу гэдэг асуулт эндээс үүсэж байгаа. Эрх мэдэл атгаж буй цагт бол "Тийм".

Энэ ч үүднээс "найруулагч Б.Баатарт ТЕГ-т үүссэн гэгдэж буй хэргүүдийн голлох үүтгэл нь У.Хүрэлсүхийн эсрэг чиглэсэн дөрвөн ширхэг видео шторк байсан. Гол гэрчүүдийг тагнуулынхны олсон вайберын чатад үндэслэсэн. Улмаар Тагнуулын байгууллага 16 хүний бүрэлдэхүүн бүхий ажлын хэсэг байгуулан Б.Баатарыг шалгаж байгаа" гэх зэрэг мэдээллүүд хөвөрсөөр байгаа юм.

Нөгөө талд Л.Оуюн-Эрдэнийг эрх мэдэлтэй үед олон нийтэд чиглэсэн хамаг пи-ар дээр нь ажилласан гэгддэг Херо Б.Баатар, А.Амундра нар өнөөдөр гадагш гарч, хилээр орж ирвэл саатуулагдах дүрүүдээр нэрлэгдэж буй нь өөрөө асар өндөр улс төрийн нюанс явааг харуулж буй.

Бид хэргийн процессыг эргэн мэдээлэх болно.

Г.МИШЭЭЛ

Холбоотой мэдээллийг хавсгаргав.

Өөрийн сэтгэгдлээ илэрхийл

Share Tweet