Хэрэгт холбогдсон эрчим хүчний "томчууд": Гурав нь прокурорт, тав нь АТГ-т шалгагдаж байна

Дөрвөн есийн хүйтнээр дөрөвдүгээр цахилгаан станц нь хөлдөж, дөрвөн жил Эрчим хүчний сайдаар ажилласан Б.Чойжилсүрэн нь үгээ хэлсэн. Гар нийлэн ажиллаж байсан нөхөд нь шил дараалан АТГ-ын хаалгыг татаж, цагдан хоригдсон ч удалгүй суллагдсан.

Дахиад өвөл болно, хүйтэн болно. Монголын эрчим хүчний олон боломжийг хулгайлсан байж болзошгүй хэрэгт холбогдоод буй тэднийг мартаж болохгүй. Иймд эрчим хүчний томчуудын хэргийн яг одоогийн процессыг нэгтгэн хүргэе.

-100 саяын авлига авсан “Эрдэнэт-Булганы цахилгааны сүлжээ” ТӨХК-ийн захирал В.Адъяа, Ерөнхий инженер Б.Эрдэнэцогт, инженер О.Азжаргал нарыг прокурор хилийн хоригтойгоор мөрдөж байна-

“Эрдэнэт-Булганы цахилгааны сүлжээ” ТӨХК-ийн захирал В.Адъяа, Ерөнхий инженер Б.Эрдэнэцогт, инженер О.Азжаргал нарыг /2026-02-02/-нд АТГ-аас 48 цагийн хугацаатайгаар баривчлаад, хилийн хоригтойгоор сулласан.

АТГ-аас тэдний гэр, албан тасалгаанд нэгжлэг хийж, “Эрчим хүчний төсөл-2”-ын хүрээнд Баян-Өндөр сумын 6-0.4 кВ цахилгаан түгээх сүлжээг шинэчлэх, сайжруулах төслийн хүрээнд цахилгаан станц хүлээж авах Улсын комисст оролцон ажиллаж байхдаа гүйцэтгэгч компаниудаас 100 сая төгрөгийн хахууль авсан хэмээн үзсэн байдаг.

Тодруулбал, Дэлхийн банкны олон улсын хөнгөлөлттэй зээлийн санхүүжилтээр хэрэгжиж буй “Эрчим хүчний төсөл-2” хөтөлбөрийн хүрээнд “Р.И” компанийн гүйцэтгэж байгаа Орхон аймгийн төвд баригдах цахилгаан түгээх сүлжээг шинэчлэх, сайжруулах ажлыг дутуу хийсэн, мөн улсын комиссоос ажиллуулах боломжгүй гэж дүгнэсээр байхад гүйцэтгэлийн хяналт баталгаажуулах тооллогын комиссын дүгнэлтийг гаргуулах, эрчим хүчний барилга байгууламжийг ашиглалтад оруулах улсын комиссын гишүүнээр ажиллахдаа саналын эрхтэй шийдвэр гаргасан байна.

Улмаар албаны чиг үүргээ хэрэгжүүлсний хариуд “Р.И” компанийн захирал Г-ээс хадам дүүгээрээ дамжуулан бэлнээр 50 сая төгрөг, танил дүүгийнхээ дансаар 45 сая төгрөг, жолоочийнхоо дансаар 5 сая төгрөгийг хахуульд авсан дөрвөн удаагийн үйлдлийг мөрдөн шалгах ажиллагааны явцад тогтоожээ. Уг эрүүгийн гурван хэрэгт хахуульд авсан нийт 100 сая төгрөгийг төлүүлсэн. Одоо тэдэнд холбогдох хэргийг Нийслэлийн Прокурорын газарт мөрдөн шалгаж буй.

Н.Тавинбэх, П.Товуудорж нарт холбогдох хэргийг удахгүй Прокурорт шилжүүлнэ

Эрчим хүчний сайд асан Н.Тавинбэх албан тушаалаа урвуулан ашиглаж, өөрийн зөвлөхөөр ажиллаж байсан П.Товуудоржийн үүсгэн байгуулсан “Грийн энержи интернэшнл” ХХК-д давуу байдал олгосон нь тогтоогдсон. Тухайлбал, зөвлөх үйлчилгээтэй холбоотой 2.6 сая доллар буюу 7 тэрбум төгрөгийн санхүүжилтийг олгосон гэх үндэслэлээр шалгаж байгаагаа АТГ мэдэгдсэн.

Цагдан хориог хоёр удаа сунгасан ч сүүлд эрүүл мэндийн шалтгаанаар |2026.02.26|-нд Н.Тавинбэхийг, |2026.02.27|-нд П.Товуудоржийг сулласан байдаг. Одоо тэднийг мөрдөн шалгах ажиллагаа АТГ-т үргэлжилж байна, удахгүй прокурорт шилжүүлэхээр бэлдэж байгаа тухай албаны эх сурвалж мэдээлэл өглөө.

Н.Тавинбэх, П.Товуудорж нарт холбогдох хэргийн дэлгэрэнгүйг ЭНД дарж унших боломжтой.

Б.Насантогтох, Ч.Амгалантөгс, Г.Баатар нарын хэрэг АТГ дээр царцжээ

ЗТЯ-ны ТНБД Б.Насантогтох Эрчим хүчний яамны Бодлогын хэрэгжилтийг зохицуулах газрын даргаар ажиллаж байхдаа |2023-11-16|"М Си Эс Интернэйшнл" ХХК-ийн Баянхонгор аймгийн Шинэжинст суманд барьсан цахилгаан хангамжийн техникийн нөхцөлийг хүсэлт ирүүлсэн өдөр нь баталж, өөртөө давуу байдал бий болгосон болох нь тогтоогдоод буй.

Тухайлбал, өөрийн эхнэрийн компаниар “Ган голтой хөнгөн цагаан дамжуулагч утас нийлүүлэх 5.5 тэрбум төгрөгийн өртөгтэй гэрээ”-г байгуулсан байна.

Улмаар гэр болон ажил дээр нь нэгжлэг хийж, 350 сая төгрөгийн валютыг хураан авч, эрх мэдлээ урвуулан ашигласан, хахууль авсан, үндэслэлгүй хөрөнгөжсөн хэрэгт холбогдуулан АТГ-ын Мөрдөн шалгах хэлтэст шалгаж буй билээ. Түүнтэй хамт хадам дүү Ч.Амгалантөгс, хадам дүүгийнх нь нөхөр Г.Баатар нарыг яллагдагчаар тооцон цагдан хорьж, өнгөрсөн сард сулласан. Одоогоор тэдэнд холбогдох хэрэг АТГ-т мөрдөгдөж байна.

-Хуулийн байгууллагад шалгагдаж байгаа эдгээр хүмүүсийн дийлэнх нь Эрчим хүчний сайд асан Б.Чойжилсүрэнтэй шууд холбогдож байна-

ДЦС-IV ТӨХК-ийн гүйцэтгэх захирал Н.Тавинбэх бол Б.Чойжилсүрэнгийн өмнө Эрчим хүчний сайдаар ажиллаж байсан нэгэн. Харин сайдын суудлаасаа буухдаа шинээр томилогдсон сайд Б.Чойжилсүрэнтэй гар барьж, яамныхаа ТНБД-аар үлдэж байсан.

П.Товуудорж: Б.Чойжилсүрэнгийн нэг сумын дүү буюу Увс аймгийн Тэс сумын уугуул. 2020-2021 онд Эрчим хүчний сайд Н.Тавинбэхийн зөвлөх, 2022 оноос одоог хүртэл буюу Б.Чойжилсүрэнг сайдаар ажиллаж буй энэ цаг үед Эрчим хүчний зохицуулах хорооны зохицуулагчаар ажиллаж буй. 

“Эрчим хүчний үндэсний төв” ТӨХХК-ийн захирал Д.Бямбасүрэн: Эрчим хүчний сайд Б.Чойжилсүрэнгийн 10 жилийн найз. Тодруулбал, 1988 оны Увс аймгийн Улаангом хотын 10 жилийн II сургуулийн төгсөгчид. Намтраас нь харвал, 2016 онд Б.Чойжилсүрэн Сангийн сайд болоход Б.Бямбасүрэн Сангийн яамны харьяа Төрийн банкны орлогч захирлаар томилогдож байж. Үүний дараа 2022 онд Б.Чойжилсүрэн Эрчим хүчний сайд болмогцоо Б.Бямбасүрэнг мөн л Эрчим хүчний яамны харьяа "Эрчим хүчний үндэсний төв" ТӨХХК-ийн захирлаар томилжээ.

Б.Нямаа: Мөн цагдан хоригдож, баривчлагдаагүй ч Н.Тавинбэхийг шалгаж эхэлсэн цагаас л АТГ-д шалгагдаж байв. Түүний хувьд Эрчим хүчний сайд Б.Чойжилсүрэнг Сангийн сайдаар ажиллаж байхад түүний зөвлөх болон Сангийн яамны Өрийн удирдлагын хэлтэст олон жил ажиллаж байсан нэгэн юм.

Өөрийн сэтгэгдлээ илэрхийл

Share Tweet