Монголын шашин соёлын 700 гаруй ховор, сонин үзмэрийг олны хүртээл болголоо

Г.Занабазарын нэрэмжит Дүрслэх урлагийн музейд судлаач, цуглуулагч, соёлын өвийг түгээн дэлгэрүүлэгч, соён гэгээрүүлэгч Ц.Батсайханы "Монголын шашин соёлын өв дурсгал" цуглуулгын үзэсгэлэн энэ сарын 20-ныг хүртэл олон нийтэд хүрч байна.

Үүнд, монголын шашин соёлын холбогдолтой шүтээн уран зураг, шашин номын зан үйлд зориулсан монгол зураг, модон барын хэвлэмэл зураг, бурхны уран баримал зэрэг 700 гаруй ховор сонин үзмэр багтжээ.

Нээлтийн үеэр судлаач, цуглуулагч Ц.Батсайхан ярихдаа, “Монголд шашин гурван удаа дэлгэрсэн гэж үздэг. Хүннүгийн үе, XIII зуун, XVII зуун багтдаг. Харин XX зуунд тодорхой хугацаанд тасалдсан бөгөөд 2000 оноос хойш дахин сэргэж, дөрөв дэх удаагаа дэлгэрч байна гэж хэлж болно. Тэрхүү 70 гаруй жилийн хугацаанд шашин хэлмэгдэж, лам нар хавчигдан, сүм хийд, эд өлгийн зүйлс устаж үгүй болсон.

Монголын шарын шашин ард түмний дунд өргөн дэлгэрч, тухайн цаг үеийн сэхээтэн, эрдэмтэн, бичгийн хүмүүсийн ихэнх нь лам нар байв. Тэд гүн сүсэг бишрэлийг эрхэмлэн, уран бүтээлээ туурвиж байжээ. Үзэсгэлэнд дэлгэсэн бүтээлүүд нь ард түмний гараар дамжин хадгалагдаж, зарим нь авдрын ёроолоос гарч ирсэн эд өлгийн зүйлс юм. Би энэ чиглэлийн мэргэжлийн судлаач биш, харин сонирхлоороо судалж ирсэн. Монголын соёлын чиглэлээр 30 орчим ном бүтээсэн. Цаашид дахин ном гаргах төлөвлөгөөтэй байна” хэмээн онцолж байв.

Шашин соёлын өвийг дэлгэсэн ховор, сонин үзмэртэй үзэсгэлэнгээс хийсэн гэрэл зургийн сурвалжилгаас сонирхоно уу.

ГЭРЭЛ ЗУРГИЙГ О.УЛСБОЛД

Өөрийн сэтгэгдлээ илэрхийл

Share Tweet