Б.Сэргэлэнбаатар нарыг Туулын хурдны зам бус Сэлбэ дэд төвийн тендертэй холбоотойгоор саатуулжээ

Засгийн газраас "Туулын хурдны зам" төслийг холбогдох хүмүүсийг хууль хяналтын байгууллагаас шалгаж дуустал зогсоох шийдвэр гаргасан. Энэ хүрээнд АТГ-аас тус төсөлтэй холбоотой хэрэг бүртгэлтийн хэрэг нээн, мөрдөн шалгах ажиллагаа явуулж байна. Тэгвэл өнгөрөгч баасан гарагийн шөнө НИТХ-ын төлөөлөгч Б.Сэргэлэнбаатарын албан өрөөнд нэгжлэг хийж, нэг компанид хувь эзэмшдэг Ш.Мөнхсайхан нарыг баривчилжээ.

Гэхдээ түүний саатуулагдаад буй гол учир Туулын хурдын зам бус "Сэлбэ дэд төв" төсөлтэй холбоотой юм байна. Тодруулбал, тус төслийн долоон багц ажлын нэг багцын гүйцэтгэгчээр түүний хувь эзэмшдэг компани шалгарсан тул албан тушаал, эрх мэдлээ урвуулан ашигласан байж болзошгүй гэдэг үндэслэлээр шалгаж байгаа аж. Тэгвэл түүний компани тендер авсан нь үнэн эсэх, тендертэй холбоотой агуулгад нийтийн албан тушаалтны эрх хэмжээг холбогдох хууль тогтоомжид хэрхэн тусгасныг нягталж үзье.

"Сэлбэ дэд төв" төслийн гүйцэтгэгчдээс эхлэн асуудлыг хөвөрдье. Одоогоор төслийн барилгын талбайд Нутгийн буян, Монкон, Морин сувд, Профессионалстрой гэх дөрвөн монгол компани ажиллаж буй. Нээлттэй мэдээллийн сангаас шүүж үзвэл ‘Професионалстрой’ ХХК нь Б.Сэргэлэнбаатарын хувь эзэмшлийнх байна. Харин эцсийн өмчлөгчөөр Ш.Мөнхсайхан бүртгэлтэй байна. Тэрбээр "Үнэн ба зөв" намын ерөнхий нарийн бичгийн албыг хашдаг аж.

Тус компани Сэлбэ дэд төв төслийн багц 4.2 болох 994 айлын 14 блок орон сууцны иж бүрэн цогцолбор хорооллын 223.4 тэрбум төгрөгийн тендерт гүйцэтгэгчээр шалгарчээ. Ийн хувь эзэмшдэг компаниараа тендер авсан нь нотлогдож байна. Тэгвэл НИТХ-ын төлөөлөгч хувь эзэмшил бүхий компани нээлттэй тендерт оролцож болдог эсэхийг дор тодруулъя.

Манай улсад нийтийн албан тушаалтны үүрэг, эрх хэмжээг Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөөс урьдчилсан сэргийлэх тухай хуулиар зохицуулдаг. Харин аливаа тендертэй холбогдох процессыг Төрийн болон нутгийн өмчийн хөрөнгийн бараа, ажил, үйлчилгээ худалдан авах тухай хуульд тусгасны дагуу явуулна.

Нийтийн албан тухай хууль-ийн гуравдугаар бүлэгт албан тушаалтанд тавигдах, хориглолт хязгаарлалтыг 10-22 хүртэлх зүйлд тодорхойлжээ. Ингэхдээ шууд утгаар НИТХ-ийн төлөөлөгчийн хувь эзэмшдэг компани тендерт оролцож болохгүй гэсэн заалт алга.

Тендерийн хуульд заасны дагуу нээлттэй, харьцуулалт, гэрээ шууд байгуулах, нэг эх үүсвэрээс худалдан авах гэсэн дөрвөн аргаар зохион байгуулдаг аж. Мөн хуулийн 6, 7 зүйлд тендерт оролцогчийн ерөнхий шаардлага, тэдгээрийг магадлах асуудлыг тусгасан бөгөөд нийтийн албан тушаалтны хувь эзэмшдэг компанийг хориглох агуулга байхгүй байна.

Сэлбэ дэд төвийн тендерийг нээлттэй тендерийн аргаар зохион байгуулжээ. Ингэснээр сонирхсон бүх компани материалаа өгөх боломжтой, мэдээлэл нь бүгдэд нээлттэй гэх эрх зүйн орчин үүсэж буй.

Харин хэрхэн сонгон шалгаруулах, сонгон шалгаруулалтад нийтийн албан тушаалтанд эрх мэдэл, албан тушаалаа урвуулан ашигласан эсэх нь тусдаа буюу хууль хяналтын байгууллагаар магадлах асуудал болох юм.

Түүнчлэн Туулын хурдны замтай холбогдуулан АТГ-аас шалгаж буй гэх хүмүүсийн жагсаалтад Нийслэлийн Засаг даргын нэгдүгээр орлогч Т.Даваадалайгийн нэр бий.

Одоогоор нээлттэй мэдээллийн санд түүнийг "Туулын хурдны зам" төслөөс тендер авсан талаар баримт байсангүй. Иймд хэвлэл мэдээллийн хэрэгслээр гараад буй эхнэрийнхээ хамаарал бүхий компаниас Нэгдүгээр тойрог замын тендер авсан гэх мэдээллийг нягтлаж үзлээ.

Т.Даваадалайгийн хамгийн сүүлийн буюу 2024 оны хөрөнгө орлогын мэдүүлэгт "Анка Урбан Инженеринг энд Дизайн” ХХК-д хувьцаа эзэмшдэг гэжээ. Энэ нь түүний эхнэр Б.Анхтуяагийн компани аж. Гэхдээ 2024 оны аравдугаар сард хувь эзэмшигчээс хасагдаж, компанийн эцсийн өмчлөгч нь Н.Билгүүн гэх хүн болжээ. Мөн тус компаниар дамжуулан авсан тендерийн мэдээлэл гарч ирсэнгүй.

Харин нэгдүгээр тойрог замтай холбогдох өөр нэг сэжим байна. ТЭЗҮ-г БНХАУ-ын “Си Эс Си И Айком Консалтантс” ХХК болон “ШУА хотын хүрээлэн буй орчны судалгааны хүрээлэн”-гийн түншлэлээр боловсруулжээ.

Уг шинжлэх ухааны хүрээлэнд Т.Даваадалайгийн эхнэр судлаачаар ажилладаг аж. Гэхдээ үүнийг хамаарал бүхий компаниараа дамжуулан тендер авсан гэж шуудхан дүгнэвэл буруудна.

Ташрамд дурдахад, нэгдүгээр  тойрог зам нь Туулын хурдны замтай хоёр байршилд огтлолцох бөгөөд Улаанбаатар хотын хөгжлийн 24 мега төслийн нэг юм.

Д.ХАДААН

Өөрийн сэтгэгдлээ илэрхийл

Share Tweet