Танилц: Л.Энх-Амгалангийн итгэлийг хүлээсэн ТНБД Т.Ням-Очир

Сайдын албаа буцааж авснаасаа хойш бодлого шийдэл ярихаас илүү өмнөх сайдынхаа бүтсэн бүтээгүйг бүртгэж, "Миний үед ийм байгаагүй юм л даа" хэмээн сошиалаар хов зөөх нь холгүй яваа хүн бол Л.Энх-Амгалан. Түүний өнгөрсөн хугацаанд хэлсэн үгсээс хамгийн үнэнд ойр нь "П.Наранбаяр муу ажилласандаа биш, сайдыг мэдээллээр хангаж, төрийн ажлыг явуулах ёстой Төрийн нарийн бичгийн даргаас эхлээд яамныхан хариуцлагагүй ажилласан байна" гэх дүгнэлт байсан.

Тэгвэл тэр өчигдрийн Засгийн газрын хуралдаанаар халаа сэлгээний асуудлаа оруулж ирсэн. Тодруулбал, Боловсролын яамны ТНБД Ж.Батжаргалыг чөлөөлж, оронд нь Боловсролын ерөнхий газрын даргаар ажиллаж байсан Т.Ням-Очирыг томиллууд буй. Ийн өөрийн итгэлт хүнээ дэргэдээ татав.

Т.Ням-Очир гэж хэн бэ?

Түүнийг "Багшаас эхлээд, сургуулийн захирлаар ажиллаж мерит зарчмаараа явж байгаа хүн" гэж салбарын сайд тодотгоод буй. Намтарыг нь харвал, төрийн албанд шатлан дэвшиж, улсад 24 жил ажиллаж байгаа төрийн мэргэшсэн албан хаагч аж.

Боловсролын шинэчлэлийн хүрээнд 2021 оны арвандугаар сарын 31-нд Засгийн газрын хэрэгжүүлэгч агентлаг-Боловсролын ерөнхий газрыг байгуулах тухай тогтоол гарсан. Тус агентлагийн даргаар Т.Ням-Очирыг нэгдүгээр сарын 26-нд томилогдон дөрвөн жил гаруй ажиллажээ.

Дунд нь 2023 оны нэгдүгээр сард КОВИД-19-ийн цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн хугацаа дуусгавар болсонтой холбогдуулан түр чөлөөлөгдсөн ч дахин томилогдсон. Тэрбээр салбарын шинэчлэл, шинэ агентлагийнхаа үйл ажиллагааг түүнд хариуцуулжээ.

Эдгээр томилгоо Л.Энх-Амгалан салбарын сайдаар ажиллаж байсан үе гэсэн үг. Өдгөө дахин итгэл хүлээлгэж байгаа нь энэ юм.

Ажилласан байдал:

• 2002-2003 онд Ховд аймгийн 10 жилийн 3 дугаар дунд сургуульд химийн багш
• 2003-2004 онд нийслэлийн Засаг даргын хэрэгжүүлэгч агентлаг Нийслэлийн Хүүхэд залуучуудын хөгжлийн газрын Бодлогын хэлтсийн залуучуудын хөгжлийн асуудал хариуцсан мэргэжилтэн, дотоод ажил хариуцсан мэргэжилтэн
• 2005-2008 онд нийслэлийн Сүхбаатар дүүргийн Засаг даргын Тамгын газрын Нийгмийн хөгжлийн хэлтсийн боловсролын асуудал хариуцсан мэргэжилтэн
• 2008-2011 онд нийслэлийн Сүхбаатар дүүргийн Засаг даргын дэргэдэх Боловсролын хэлтсийн ахлах мэргэжилтэн
• 2011-2012 онд нийслэлийн Засаг даргын хэрэгжүүлэгч агентлаг Нийслэлийн Боловсролын газарт Хяналт-шинжилгээ, үнэлгээний албаны дарга, газрын дарга
• 2012-2017 онд нийслэлийн Чингэлтэй дүүргийн Боловсролын хэлтсийн дарга
• 2017-2018 онд нийслэлийн Чингэлтэй дүүргийн Нийгмийн хөгжлийн хэлтсийн хэлтсийн дарга
• 2018 -2022 онд БШУЯ-ны Сургуулийн өмнөх ерөнхий боловсролын бодлогын хэрэгжилтийг зохицуулах газрын дарга
• 2022 оноос өнөөг Боловсролын ерөнхий газрын даргаар тус, тус ажиллажээ.

Д.ХАДААН

Өөрийн сэтгэгдлээ илэрхийл

Share Tweet