"АН Ерөнхийлөгчөөр генсек, бүлгийн даргаа томилуулдаг ч сонгуульд ялах халуун мөрөөдөлтэй"

Анзаарсан бол АН-ынхан ҮБХ-ны гишүүдээ тодруулах, аймаг дүүргийн намын хорооны даргыг сонгохдоо дотоод гишүүнчлэлийн багтаа тэрбум, тэрбумаар тараалаа. Энэ их мөнгө АН-ынханд байхгүй л дээ. Голлох мөнгийг MCS, АПУ зэрэг томчуудаас түүв. С.Баярцогттой ойр гэж хөшигний ард удтал яригдсан Ерөнхийлөгчийн баг ил цагаандаа гарч, түүнийг дэмжлээ.

ҮБХ-ны гишүүд дотор О.Цогтгэрэл генсекээ ч алдаж, Тэсо-гоос зүтгүүлсэн бүх хүмүүсийг нь Б.Пүрэвдорж, Ерөнхийлөгчийн талын АН-ын жигүүр болох 13-ынхан нь дараад авчихсан. Үндсэндээ Ерөнхийлөгчийн баг зүтгэсээр байгаад АН-ын ҮБХ-ны нэгхээхэн хэсгийг авчхаж байгаа юм. Үүнд О.Цогтгэрэлийн лидерийн ялгарал асар бага байсан нь ч нөлөөлөв.

Одоо Ерөнхийлөгч шуудхан АН доторх ахисан нүүдлээ хийж, С.Баярцогтыг ЕНБД-аар томилуулах гэж байна. МАН-ын даргаас Ерөнхийлөгчид нэр дэвшсэн хүнээр АН генсекээ сонгуултлаа хавханд нь гүн оржээ.

АН-ын Ерөнхийлөгчийн талд буй хэсгийнхэн "С.Баяроцогт мөнгө олж чаддаг. Манай намын гал тогоог мөнгө олж чаддаг хүн барих ёстой" гэцгээх болов. С.Баярцогт мөнгө олж чаддаг нь үнэн байх. Гэхдээ үнэгүй мөнгө хаанаас ч олж чадахгүй юм. Тэр үнийг нь АН бүх эд эсээрээ С.Баярцогтод мөнгө өгсөн хүмүүст төлөх, энгийн л логик юм.

О.Цогтгэрэл Ерөнхийлөгчөөр УДШ-д намын даргаар ажлын 14 хоногт бүртгүүлсэн том өртэй.

Тэр утгаараа ил тодоор түүний шахаж буй С.Баярцогтыг түлхэх аргагүй байна. Шүүхийн гурван шатны шийдвэрээр Оюутолгойн төслөөс авлига авсан нь батлагдаж, 4 тэрбум гаруй төгрөгийг улсад төлөх үүрэг хүлээсэн хүн бол С.Баярцогт. Дансандаа 1 сая ам.доллар буюу өнөөгийн ханшаар 3.6 тэрбум төгрөг байгааг мартатлаа С.Баярцогт сагаж явсан үе бий.

ТЕГ-ын дарга Б.Хурцын хүүгийн хуримаар манай томчууд найрлан цэнгэж байхдаа С.Баярцогтыг цагаатгахаар тохирч, тэр нь хэрэгжсэн байдаг. Хэдэн жилийн өмнө л тэр АН-ын генсекийн суудал руу зүтгэх зургаа гаргачихсан байв. Тэр зураглалаа У.Хүрэлсүхтэй хамт хийсэн гэгддэг.

О.Цогтгэрэл "намын дарга" сэтэртэй суунгаа Ерөнхийлөгчид алдах гэж байгаа хоёр дахь суудал нь УИХ дахь АН-ын бүлгийн дарга. Бүлгийн даргад Ж.Батсуурийг тавих шахалт түүнд ирсээр удав. Ж.Батсуурь Ерөнхийлөгчтэй нэг аймаг, өмнөх Засгийн газарт түүний дэмжлэгээр багтсан зэрэг түүх нэгтэй хүмүүс. Уг нь АН-ын дотоод дэмжлэгийг хүлээхийн тулд О.Цогтгэрэл анхлан Л.Гантөмөрт бүлгээ өгөх тохироо хийсэн байдаг. Гэвч өгөхгүй явсаар эцэст нь Ерөнхийлөгчид алдах дээрээ тулж байгаа нь энэ.

Ер нь О.Цогтгэрэл системийн чанартай, сэргэчхээр сайн үндэстэй том нам авсан атлаа нэг тийм жижиг, Тэсо тойрсон бодолдоо хөтлөгдөж явсаар Ерөнхийлөгчийн өгөөш болж гүйцэв.

АН ингэж Ерөнхийлөгчөөс буугаад МАН-ын дарга болохоор зэхэж суугаа У.Хүрэлсүхээр генсекээ, бүлгийн даргаа томилуулахаас өөр аргагүй нөхцөл байдалд ортлоо нам дор хэвээр байна. Гэсэн ч АН-ынхан сонгуульд ялах халуун мөрөөдөлтэй, ийм итгэлээр залуус нь ч дүүрэн яваа.

Нэг ёсондоо сайхан малгай авч өмсөх мөнгө нь өөрөө ороод ирсэн ч ямар малгай авахаа байнга өрсөлддөг ахаараа заалгаж байгаа жаахан дүүгийн дүрийг АН бүтээв.

Өөрийн сэтгэгдлээ илэрхийл

Share Tweet