Э.Цэрэнбат: Сурронтой цагдаа гарснаар 184 зөрчил илрүүлж, хүүхдүүд унах нь буурсаар байна

Дулааны улирал эхэлсэнтэй холбоотойгоор дөрөвдүгээр сарын 10-наас хоёр дугуйт тээврийн хэрэгсэл замын хөдөлгөөнд оролцож эхэлсэн. Тэгвэл дөрөвдүгээр сарын 12-наас эхлэн Замын хөдөлгөөний хяналтын газраас 30-н сурронтой алба хаагч нийслэлийн нутаг дэвсгэрийн хэмжээнд ээлжээр үүрэг гүйцэтгэж байна.

Учир нь "А" үнэмлэх шаарагдах хоёр дугуйт тээврийн хэрэгслийн төрөлд багтах цахилгаан скүүтер, суррон зэргийг насанд хүрээгүй буюу ЕБС-ийн сурагчид унаж замын хөдөлгөөнд оролцох тохиолдол ихэссэн юм. Үүнд хяналт тавихаар алба хаагчид ажиллаж буй. Ихэвчлэн ЕБС-ийн сурагчид суррон унаж замын хөдөлгөөнд оролцох болсон нь ЕБС-ийн ахлах ангийн сурагчдын дунд сурронгүй л бол найзуудын хүрээллээс хасагдах, цаашлаад гадуурхагдах хэмжээнд хүрч, нэг хэсэгтээ суррон "моод" болж байв.

Анхаарууштай нь өнгөрсөн онд 224 хүүхэд сурронтой осолдож гэмтсэн бөгөөд жил ирэх тусам энэ тоо өсөх хандлагатай байгаа юм. Дашрамд дурдахад, сүүлийн хоёр жилд сурроны ослоор гурван хүн нас барсны нэг нь 17 настай эрэгтэй хүүхэд цахилгаан сурронтой явж байгаад осолдож эндсэн. Тэгвэл өнгөрсөн сарын 10-наас 19-ныг хүртэл ГССҮТ-д суррон болон цахилгаан дугуйгаас унаж бэртсэн нийт 19 иргэн ханджээ. Өөрөөр хэлбэл өдөрт нэг иргэн суррон цахилгаан дугуйнаас унаж эмнэлэгт хандаж байгаа юм. Үүнд түрээсийн скүүтер, мопедоос унаж бэртсэн хүний тоо ороогүй. Түүнчлэн сурроноос унаж бэртсэн ч ГССҮТ-д хандаагүй иргэд хэд байгааг таашгүй.

Сурронтой иргэдэд хяналт тавьж, бодит нөхцөл байдалтай танилцаж, үүрэг гүйцэтгэж буй ТЦА-ны Нийслэлийн замын хөдөлгөөний хяналтын газрын 2-р хэлтсийн зохицуулагч, цагдаагийн дэслэгч Э.Цэрэнбаттай ярилцлаа.

-Эхэндээ өдөрт 30 гаруй зөрчил илэрдэг байсан бол одоо ганц, нэг зөрчил илэрдэг болсон-

-Хоёр дугуйт тээврийн хэрэгсэл болох сурроныг ихэвчлэн ЕБС-ийн хүүхдүүд унаж хөдөлгөөнд оролцож байгаа гэсэн мэдээлэл цахим орчноор явж байна. Шалгалтын явцад ямар зөрчил их илэрч байна вэ?

-Нийслэлийн засаг даргын захирамжийн дагуу жил бүрийн дөрөвдүгээр сарын 10-наас эхлэн хоёр дугуйт тээврийн хэрэгсэл замын хөдөлгөөнд оролцож эхэлдэг. Үүнтэй холбоотойгоор "А" ангиллын үнэмлэхээр унах сурроныг ЕБС-ийн ахлах ангийн сурагчид унаж хөдөлгөөнд оролцсоноор зам тээврийн осол гаргаж улмаар өөрийн эрүүл мэнд болон бусдын эд хөрөнгийг эвдэж, хохироох тохиолдол олон гарсан. Тиймээс сурронтой 30-н алба хаагч ЕБС-иудын ойр орчимд хяналт шалгалтын ажиллагааг дөрөвдүгээр сарын 12-ноос эхлэн үргэлжлүүлж байна.

-Эцэг эхчүүд насанд хүрээгүй хүүхдэдээ суррон авч өгдөг улмаар дээрх асуудлууд гардаг. Тэгэхээр асран хамаалдагчдын хариуцлагатай байдал чухал юм шиг санагддаг. Хэрэв насанд хүрээгүй хүүхэд сурронтой замын хөдөлгөөнд оролцсон тохиолдолд асран хамгаалагчийг нь 400 мянган төгрөгөөр торгох журам мөрдөгдөж байгаа гэсэн. Авч байгаа арга хэмжээний тухай?

-Манай эцэг эхчүүд энэ тал дээр хамтран ажиллах нь чухал байна. Сурронтой цагдаа нар үүрэг гүйцэтгэж эхэлснээс хойш сурронтой хүүхэд багассан. Алба хаагчид ажиллаж эхэлснээр эцэг эхчүүд хүүхдүүддээ хяналт тавьж байх шиг байна. Авч байгаа арга хэмжээний тухайд гэвэл 18 нас хүрээгүй хүүхэд сурронтой замын хөдөлгөөнд оролцох юм бол эхний ээлжид тээврийн хэрэгсэлийг нь саатуулж тухайн хүүхдийн асран хамгаалагчидтай нь хариуцлага тооцно. Зөрчлийн тухай хуулиар 400 нэгжтэй тэнцэх хэмжээний буюу ₮400 мянган төгрөгөөр торгох арга хэмжээ авна. Мөн 18 нас хүрсэн ч "А" үнэмлэхгүй хөдөлгөөнд оролцвол зөрчлийн хуулиар төгрөгөөр торгох арга хэмжээ авч байгаа.

-Сурронтой цагдаа нар гарснаар энэ төрлийн зөрчил эрс багассан юм байна. Хөдөлгөөнд оролцож байгаа хүүхдүүд та бүхний шаардлагыг хүлээж авахгүйгээр зугтах тохиолдол гарч байгаа юу. Хэрэв зугтсан тохиолдолд ямар арга хэмжээ авч ажиллаж байна?

-Ахлах ангийн сурагчид сурронтой замын хөдөлгөөнд оролцох тохиолдол их байгаа учраас тээврийн цагдаагийн газраас "Сурронгүй сургууль" аян зарласан. Эхнээсээ сургуулиуд манай аянд нэгдээд явж байна. Бидний шаардлагыг хүлээж авахгүй зугтсан тохиолдолд араас нь хөөж дагах боломжгүй. Насанд хүрээгүй хүүхэд сандарч зугтаж байгаад осолд орох эрсдэлтэй учраас дараагийн саатуулж болох уулзвар дээр байгаа алба хаагчид мэдэгдэх байдлаар ажиллаж байна. Уулзвар бүрд алба хаагч байгаа учраас хөөх ямар ч шаардлага байхгүй.

-Сурронтой цагдаа нар хэдий хүртэл үүрэг гүйцэтгэх вэ. Дараа жил энэ ажил үргэлжлэх үү. Тусгай сургалтад суусан суррон унах чадвартай алба хаагчид үүрэг гүйцэтгэж байгаа гэж ойлгосон?

-Нийслэлийн засаг даргын захирамжийн дагуу хүйтний улирал эхэлтэл үүрэг гүйцэтгэнэ. Дараа жил энэ хуваарийн дагуу үргэлжлүүлэн ажиллах байх. Алба хаагчдын тухайд "А" үнэмлэхтэй, сургалтад суусан мэргэжлийн алба хаагч үүрэг гүйцэтгэж байгаа. Бид зөвхөн суррон бус хоёр дугуйт тээврийн хэрэгсэл буюу "А" ангиллын үнэмлэх шаардагдах мопед, суррон, түрээсийн скүүтер зэрэгт хяналт тавьж ажиллаж байна.

-30 алба хаагч үүрэг гүйцэтгээд нэлээд хугацаа өнгөрсөн байна. Нийт хэдэн зөрчил илрүүлсэн бэ?

-Нийт 184 зөрчил илрүүлж арга хэмжээ авсан. Сурронтой алба хаагчид ажиллаж эхэлсэн эхний өдөр нийслэлийн хэмжээнд хоёр дугуйт тээврийн хэрэгсэлтэй холбоотой 30 зөрчил илэрдэг байсан. Тухайн долоон хоногтоо 10, 20 сурронтой зөрчил илрүүлдэг байсан нь аажмаар багассан. Одоо бол сурронтой хүүхэд харагдахаа больсон. Өдөрт 3-4 зөрчил илрүүлж байгаа зарим тохиолдолд ганц нэг л зөрчил илэрч байна.

-Шөнийн цагаар хүүхдүүд унаж хөдөлгөөнд оролцож байгаа гэх мэдээлэл байсан. Тэгэхээр эргүүлд гарч байгаа юу?

-Шөнө сурроны гэрэл муу учир үзэгдэх орчин хязгаарлагдмал. Тиймээс эргүүлд гарахгүй байгаа. Уулзвар дээрх камерын тусламжтайгаар хяналт, шалгалт явуулдаг.

Өөрийн сэтгэгдлээ илэрхийл

Share Tweet