“Ирээдүйн түмэн эх-2026” бооцоот уралдааны үеэр морьноосоо унасан хүүг бэртэл гэмтэл аваагүй гэв

Монголын хурдан морины түүхэн дэх хамгийн өндөр бооцоотой зохион байгууллагддаг “Ирээдүйн түмэн эх-2026” хурдан морины уралдаан өчигдөр Төв аймгийн Хүй долоо худгийн Цагаанхөтөлд болжээ. Тус уралдаанд 127 хүүхэд бүртгүүлж 116 уралдаанч гурван насны уралдаанд оролцсон байна.  Энэ үеэр хүрэн Байдас унаж уралдсан хүү барианы шугамны наахан талд улаан нүүрээрээ газарт унаж 1-2 метр орчим зайд цээжин хэсгээрээ гулссан ч үргэлжлүүлэн морио унасаар бариандаа орсон. Морьноосоо унасан хүүхдийг Ууганцэцэгийн Түвшинбат гэдэг бөгөөд Өвөрхангай аймгийн Бүрд сумын уяач Пүрэвдоржийн Ганхүүгийн хүрэн Байдсыг унаж уралдаж байжээ. Уг үйл явдлыг харсан иргэд “Хүүхдэд эмнэлгийн анхан шатны тусламж үзүүлэлгүй шууд моринд нь мордууллаа. Тархи толгойд нь доргилт өгсөн бол яах вэ” гэсэн шүүмжлэл дагуулсан.

Бид хүүгийн биеийн байдлыг асуухаар ХГБХХЕГ-ын Хүүхэд, гэр бүлийн хамгааллын бодлогын хэрэгжилтийн газрын дарга Л.Бадамцэцэгтэй холбогдож мэдээлэл авлаа. Тэрбээр “Тухайн мориноос унасан хүүхэд хамгаалалтын хувцасаа бүрэн өмссөн байсан учраас бэртэл гэмтэл аваагүй. Харин хацар, шанааны хэсэг нь бага зэрэг халцарсан. Унаач хүүхдийг Төв аймгийн Хүүхэд, гэр бүлийн хөгжил, хамгааллын төв эмнэлгийн бүрэн үзлэгт хамруулсан. Одоо унаач хүүхдийн биеийн байдал хэвийн байгаа. Манай байгууллагаас хаврын хүйтэн салхи, хавсарганд хурдан морь унаж буй хүүхдүүддээ бээлий өмсгөөчээ гэсэн уриалгыг уяач нартаа гаргаж багаа. Хэдийгээр хамгаалалтын хувцас хэрэглэлийн стандарт байхгүй ч гэсэн бид унаач хүүхдүүдээ хүн ёсоор хайрлах ёстой. Мөн унаач хүүхдүүдийн шагайг хамгаалсан урт түрийтэй гутал өмсгөх хатуу шаардлагыг тавьж байгаа” гэсэн мэдээлэл өглөө.

Хэдийгээр хурдан морины уралдаан дэлхийд ганцхан эрийн гурван наадмын нэг төрөл монголчуудын өв соёл, уламжлалыг тээдэг ч гэсэн унаач хүүхдийн аюулгүй байдал, эрүүл мэнд нэн тэргүүнд тавигдах ёстой.

Өөрийн сэтгэгдлээ илэрхийл

Share Tweet