Жингээ хасах эсвэл барихын тулд өдөрт хэд алхах ёстой вэ

Жин хассан эсвэл хоолны дэглэм барьж буй хүмүүс жин эргэж нэмэгдэхээс сэргийлэхэд туслах гол зүйл нь өдөр тутамдаа тодорхой тоогоор алхах байж болохыг шинэ судалгаа харуулжээ.

Европын таргалалт судлалын холбооноос хийсэн шинэ судалгаа жингээ барих болон эргэж таргалахаас сэргийлэхийн тулд өдөрт 8,500 орчим алхам алхах хэрэгтэй гэх дүгнэлтэд хүрсэн байна.

Судалгааг ахалж бичсэн Италийн Модена ба Режжо Эмилия их сургуулийн судлаач Марван Эль Гоч "Илүүдэл жинтэй эсвэл таргалалттай хүмүүсийн 80 орчим хувь нь жин хассанаас хойш гурваас таван жилийн дотор жингээ эргүүлж нэмдэг" гэжээ. Тэр нэмж "Энэ асуудлыг шийдэх болон шинэ жингээ барихад туслах стратегийг тодорхойлох нь эмнэлгийн практикт маш их ач холбогдолтой" хэмээсэн юм.

Жин хасах гэж буй хүмүүст өгдөг нийтлэг зөвлөгөө бол өдөр тутмын алхмаа нэмэгдүүлэх явдал. Гэвч яагаад, хэзээ, хэдэн алхам алхах нь тодорхойгүй хэвээр байгаа гэж үзэж эрдэмтэд энэ судалгааг хийсэн байна.

Хүмүүс жин хасахдаа хэр их алхах ёстой талаар нэгдсэн ойлголтод хүрэхийн тулд судлаачид 4 мянга орчим өвчтөн хамрагдсан хэд хэдэн эмнэлгийн туршилтад дүн шинжилгээ хийжээ.

Дүн шинжилгээндээ амьдралын хэв маягаа өөрчлөх хөтөлбөрт хамрагдсан 1,987 өвчтөнийг, зөвхөн хоолны дэглэм барьсан эсвэл ямар ч эмчилгээ хийлгээгүй 1,771 өвчтөнтэй харьцуулжээ. Эхний бүлгийнхэн жин хасах үе шатны төгсгөлд өдөр тутмын алхмаа 8,454 болгож нэмэгдүүлсэн байна. Тэд дунджаар биеийн жингийн 4.39 хувь буюу 4 орчим кг-ыг хассан юм.

Модена ба Режжо Эмилия их сургуулийн Марван "Жин хасах үедээ өдөрт 8,500 орчим алхам алхах хэрэгтэй. Жингээ эргэж нэмэхгүй байхын тулд энэ идэвхтэй хөдөлгөөнөө цаашид ч хадгалахыг хүмүүст үргэлж зөвлөх хэрэгтэй" гэжээ.

“World Obesity Atles” мэдээлснээр бол 2035 он гэхэд дэлхийн хүн амын 30 хувь нь таргалалттай болох төлөвтэй байна. Тиймээс судлаачид таргалалтын эмчилгээний үр дүнг сайжруулахын тулд амьдралын хэв маягийн өөрчлөлтийг илүү судлах болжээ.

Илүүдэл жин болон таргалалт нь эрүүл мэнд, сэтгэл зүйн олон өвчинтэй холбоотой байдаг. Мөн дэлхий даяар эрүүл мэндийн тогтолцоонуудад санхүүгийн хүнд дарамт учруулдаг.

Таргалалттай хүмүүс ноцтой халдвар авах эрсдэл 70 хувиар илүү байдгийг сүүлийн үеийн судалгаанууд харуулж байсан. Мөн дэлхий даяар халдварт өвчний улмаас нас барж буй арван хүн тутмын нэг нь таргалалттай холбоотой байх магадлалтай юм. Үүнээс гадна таргалалт нь зарим хорт хавдар, зүрх судасны эмгэг, чихрийн шижинтэй болох эрсдэлийг өндөрсгөдөг билээ.

Эх сурвалж: Euro News

Өөрийн сэтгэгдлээ илэрхийл

Share Tweet