Шүүхийн жижүүрээс УДШ-ийн шүүгч хүртэл өгсөгч Т.Өсөхбаяр нь "Их засаг"-ийн төгсөгч, Ерөнхийлөгчийн нутгийнх

ХЗБХ-ны өчигдрийн хуралдаанаар УДШ-ийн шүүгчид нэр дэвшигч Т.Өсөхбаярыг танилцуулсан. Түүний намтарт 2000-2001 онд Нийслэлийн шүүхэд жижүүрээр ажиллаж байсныг тэмдэглэсэн байна. Ерөнхий сайд асан Л.Оюун-Эрдэнийг Бэрхийн ЗТДГ-ын галч, жижүүрээс Засгийн газрын тэргүүн болсныг олон нийт егөөдөн ярьдаг. Тэгвэл шүүх засаглалын толгой байгууллагат нэгэн жижүүр нэмэгдэхээр ирлээ.

Т.Өсөхбаярын томилгоог Ерөнхийлөгч хийнэ. Тодруулбал, Үндсэн хуулийн 51.2-т "Шүүхийн ерөнхий зөвлөлөөс Улсын дээд шүүхийн шүүгчдийг УИХ-д танилцуулснаар Ерөнхийлөгч томилно" заасан байдаг. Гэхдээ түүний томилгоо төвөггүй урсах төлөвтэй. Учир нь, нэр дэвшигч Сүхбаатар аймгийнх буюу Ерөнхийлөгчийн ажил амьдралын гараагаа эхлүүлсэн "хайртай" нутгийнх.

Ерөнхийлөгч дүү У.Отгонбаяр тус аймгийн нутгийн зөвлөлийн даргаар ажиллаж байгаад парламентын гишүүн болоод. Тиймдээ ч ах, дүү хоёр нутгаа чамгүй тойлдог. Энэ хүрээндээ АН-ын Ж.Батсуурь гишүүнтэй сүлбэлдэж, бүлгийн даргад зүтгүүлээд амжсан.

Түүнчлэн олон жил цэнхэртсэн тус аймагт 2024 онд МАН арайхийж ялалт байгуулсан. Тиймээс МАН-ынханд энэ байр сууриа бататгах, Ерөнхийлөгчийн сонгуулийн бэлтгэл гэхчилэн сүхбаатарынхныг дэмнэх, дээш татах улс төр, цаг үеийн олон шалтгаан бий.

Мөн Т.Өсөхбаяр нь Ерөнхий сайд Н.Учралын "Их засаг" сургуулийн төгсөгч юм байна. Хожим МУИС-д хууль зүйн ухааны магистрын зэрэг хамгаалжээ. Улс төрийн фракцын хувьд У.Хүрэлсүх, Н.Учрал нар нэг талынх. Тэгэхээр дэмжлэг улам батжина гэсэн үг.

ШЕЗ-өөс Т.Өсөхбаярыг шүүгчээр 20 гаруй жил ажиллаж байгаа бөгөөд үүнээс 13 жил дөрвөн сар давж заалдах шатны шүүхэд ажиллаж байгааг тодотгосон. Мөн сул орон тооны сонгон шалгаруултад  16 хүн ирүүлж, оролцсноос бичгийн шалгалтад 5 хүн тэнцсэн, дараагийн шатанд ганцаар тэнцсэн гэсэн юм.

Тодруулбал, 2012-2013 онд Нийслэлийн давж заалдах шатны шүүхийн шүүгч, 2013-2015 онд Эрүүгийн хэргийн давж заалдах шатны 10 дугаар шүүхийн шүүгч, 2015 оноос Нийслэлийн Эрүүгийн хэргийн давж заалдах шатны шүүхийн Ерөнхий шүүгч, шүүгчээр ажилласан байна.

Энэ хугацаандаа Шүүхийн сахилгын хорооны хаалга татаж байсан мэдээлэл ч байна. Тодруулбал, 2022 онд дэгдсэн согтуудаа лифтэнд зохисгүй үйлдэл гаргасан "оцгонодог" гэх Б.Баасанцогт хамаатай гэх зургаан шүүгчийг сахилгын хороогоор авч хэлэлцсэн дотор түүний нэр багтжээ. Энэ үед Т.Өсөхбаяр Нийслэлийн Эрүүгийн хэргийн давж заалдах шатны шүүхийн шүүгчээр ажиллаж байв.

Түүнчлэн ирэх зургаадугаар сард УДШ-д дахин нэг сул орон тоо гарна. Ерөнхийлөгч асан Х.Баттулгын зарлигаар томилогдсон Ерөнхий шүүгч Д.Ганзоригийн  бүрэн эрхийн хугацаа дуусаж байгаа.

Д.ХАДААН

Өөрийн сэтгэгдлээ илэрхийл

Share Tweet