Нэг дороос | Могойн нүд камераар харахад хүүхэд байрандаа байгаа ч биеийн байдлыг мэдэх боломжгүй байна

Төв аймгийн Заамар сумын нутагт өрмийн хуучин цооногт 3 настай хүүхэд унасан нөхцөл байдлын талаар бид цаг алдалгүй мэдээлэх болно.

17:30 цаг:

Төв аймгийн Онцгой байдлын газрын дарга Г.Эрдэнэбат цаг үеийн мэдээлэл өглөө. "Хоёр баг ээлж солихдоо хэмжилт хийж байгаа. 14 цагийн байдлаар долоон метр явсан. 18 цагт ээлж солихдоо хэмжилт хийнэ. Малтлагын ажиллагаа гүн рүүгээ орох тусам хүндрэлтэй болж байгаа тул аврах ажиллагаа удааширч болзошгүй. Охиныг гаргаж авах цагийг урьдчилан хэлэх боломжгүй байна. Могойн нүд камераар харахад хүүхэд байсан байрандаа байгаа. Биеийн байдлын талаар гаргаж ирсний дараа мэдээлэл өгье" гэв.

12:47 цаг:

Шадар сайд Н.Номтойбаяр ослын газар дээрээс цаг үеийн мэдээлэл өглөө. Тэрбээр "Онцгой байдлын уул уурхайн аврах тусгай анги мэргэжлийн удирдамжийн дагуу аврах ажиллагааг явуулж байна. 31 метрийн хажууд хөндлөнгөөс 12 метр ухах малтлагын ажиллагаа үргэлжилж байна. Хөрс хайрганы хувьд сул доргилт өгч болохгүй тул бүгдийг гар ажиллагаагаар хийж байна. Нэг цагт 20-35 метр ухах бодит боломжтой. Ойролцоогоор 12 метр ухаж зорилтот газраа хүрэхээр байна" гэлээ.

11:40 цаг:

Гурван настай хүүхэд аврах ажиллагаа тасралтгүй үргэлжилж байна. Хүүхэд нүхэнд унаснаас хойш 47 цаг гаруй хугацаа өнгөрөөд байгаа юм. Онцгой байдлын алба хаагчийн урьдчилсан тооцоогоор аврах багийнхан ойролцоогоор 3–4 цагийн дараа хүүхдэд хүрч, гаргаж ирэх боломжтой хэмээн үзэж буй аж.

05.29-ний өдрийн 11:20 цаг:

Төв аймгийн Заамар сумын гуравдугаар багийн нутаг дэвсгэрт байрлах өрмийн цооногт осолдсон гурван настай хүүхдийг нас барсан байдалтай олдсон гэх мэдээлэл гарав. Тэгвэл бид энэ талаар ОБЕГ-аас тодруулахад "Охин нас барсан байдалтай олдсон гэх мэдээлэл худал. Аврах ажиллагаа үргэлжилж байна" гэлээ.

05.29-ний өглөөний 09:17 цаг:

Төв аймгийн Заамар сумын гуравдугаар багт өрмийн хуучин цооногт 3 настай хүүхэд унаж осолдсон. Тэгвэл аврах ажиллагаа эхлээд 40 гаруй цаг өнгөрсөн ч, осолдсон хүүхдийг гаргаж авч чадаагүй байна. Тухайлбал, хөндлөн ухах 9 метрийн газар шавар, намаг их тул нурах эрсдэл үүсжээ. Улмаар гараар ухаж байгаа тул ажил удааширсан юм.

Хайлааст багийн их эмч О.Баасанбалжир: Анх дуудлага хүлээн авахдаа бэлэн байдлаа бүрэн хангаж ирсэн. Одоогоор дөрвөн их эмч, хоёр сувилагч болон жолоочтойгоо ажиллаж байна. Хүүхэд унаад 40 гаруй цаг болсон, ямар ч байдалтай гарч ирсэн бид түргэн тусламжийн үйлчилгээ үзүүлнэ. Тухайн хүүхэд шавартай, хүйтэн нөхцөлд байгаа учраас цаг алдах тусам нөхцөл байдал хүндэрнэ. Хүнийг үнэлэх амьдын шинж гэж байдаг. Гэхдээ бид тухайн хүүхдийг хараагүй учраас баттай хариу хэлэхэд хүндрэлтэй. Бидний үнэлгээгээр одоогоор амьдын шинж тэмдэг илрэхгүй байна. Орчин нөхцөлөөсөө шалтгаалж ундааны саванд халуун ус хийж жин тавьсан. Түүнээс өөр том овортой зүйл хиймэл хүчилтөрөгчийн дутагдалд орох учраас боломжгүй. Байгаа нөхцөл байдалдаа тулгуурлаж арга хэмжээ авч байгаа.

Осолдсон охины өвөө Ц.Эрдэнэ-Очир: Уул уурхайн газруудад гомдох зүйл алга, ажилчид нь машин техникээрээ чадахаараа л тусалж байна. Гурван өдөр нойргүй хонолоо. Миний охин жижигхэн бамбарууштай бамбарууштай цүнх үүрч явдаг. Түүнийг нь аврагчид татаж гаргасан. Түүнээс хойш хоёр хоног өнгөрлөө. Онцгой байдлын алба хаагчид бидний ойртуулахгүй, мэдээлэл ч өгөхгүй байна.

Төв аймгийн Заамар сумын Засаг дарга Б.Самбуу: Дуудлага авсан даруй сумын холбогдох албан тушаалтнууд ослын газар ирсэн ажиллаж байна. Осол болсон энэ талбай 2021 оноос хойш ашиглагдаагүй, хуулиараа туслан гүйцэтгэгч компани бүх талбайг аюулгүй болгоод хүлээлгэж өгөх ёстой Манай сумын хэмжээнд 10 гаруй ААН-үүд уул уурхайн тусгай зөвшөөрөлтэй. Аймаг сумд, улсын хэмжээнд хүүхдийг гаргаж авахын төлөө тасралтгүй 36 цаг ажиллаж байна.

11:14 цаг

Хүүхдийг гаргахаар аврах багийнхан 22 цагийн турш цооногийг ухаж байна

Шууд дамжуулалт

Онцгой байдлын Ерөнхий газраас Төв аймгийн Заамар сумын нутагт өрмийн хуучин цооног руу унасан 3 настай хүүхдийг аврах ажиллагааг зохион байгуулж буй талаар Хурандаа А.Дашням нөхцөл байдлын талаарх мэдээлэл өглөө.

"Онцгой байдлын Ерөнхий Газраас Төв аймгийн Заамар сумын Хайлааст 3-р багт гурван настай эмэгтэй хүүхэд гүний цооногт унасан гэдэг дуудлага Төв аймгийн Онцгой байдлын газарт ирсэн. Ингээд Төв аймгийн Онцгойгоос аврах баг гарч, нэмэлтээр эрэн хайх аврах ангийнхан нисдэг тэргээр хөдөлгөөн үйлдэж очсон. Очиход хуучин өрмийн 30-50 метрийн цооногт 3 настай Х гэх эмэгтэй хүүхэд хөлөөрөө унаж, гацсан байдалтай байсан. Тухайн үед хүүхэд амьсгалж байсан. Багийн зүгээс хүүхдийг бугуйлдаж гаргах ажлыг зохион байгуулж үзсэн ч хөшөөд гаргах боломжгүй байсан. Ингээд ойролцоох уурхайгаас эксковаторуудыг дуудаж хүүхэд унасан цооногийг харалдаа паралель ухалт хийж, хүүхдийг гаргаж авахаар ажиллаж байна.

Нийтдээ 20 гаруй техник хэрэгсэлтэй 100 гаруй хүн ажиллаж байгаа. Одоогоор 20 метр орчим ухсан гэдэг шинэчилсэн мэдээлэл ирсэн. 10 метр ухах зай үлдсэн. Хүүхэд унасан цооногт хүчил төрөгчийн хэмжилт хийхэд хэвийн буюу амьсгалах нөхцөлтэй, дээрээс халуун дулаан үүсгэх ажлыг шөнөжин хийлээ. Хүүхэд одоогийн байдлаар хариу үзүүлээгүй ч, могой камер гүйлгэж үзэхэд амьсгалын шум бол сонсогдсон. Нийтдээ 20 гаруй цаг өнгөрч байна. Нөхцөл байдал хүнд байгаа.

Тухайн орчин нь өрөмдлөгийн уурхай явуулдаг газар юм билээ. Энэ талаар ЦЕГ-аас мэдээлэл өгөх байх. Хүүхдийн аав ээж тэнд ажилладаг учраас ажлаа хийж явахад нь ийм нөхцөл байдал үүссэн гэж ойлгосон. Ар гэрийнхнийх нь эрүүл мэндийн байдлыг хяналтад авч байна. Холбогдох байгууллагууд бүх талаар зохион байгуулж ажиллаж байна" гэв.

15:45 цаг

Онцгой байдлын ерөнхий газар болон бусад мэргэжлийн байгууллагаас томилогдсон баг бүрэлдэхүүн Төв аймгийн Заамар сумын 3-р багийн нутаг дэвсгэр уурхайн цооногт унасан гурван настай хүүг аврах ажиллагаа 26 дахь цагтаа үргэлжилж байгаа бөгөөд хүүхэд амьд эсэх нь тодорхойгүй хэвээр байна. Осол болсон тухайн газар нь үүрэн телефоны сүлжээнд холбогдоогүй учир газар дээрээс нь мэдээлэл авах боломжгүй байгаа юм. Иймд бид Онцгой байдлын ерөнхий газраар дамжуулан мэдээллийг дамжуулах болно.

19:05 цаг

Төв аймгийн Заамар сумын нутаг дэвсгэрт уурхайн өрөмдлөгийн цооногт унасан гурван настай хүүхдийг аврах ажиллагаа үргэлжилж байна. Тухайн цооногийн нүхний өргөн 35 метр, урт 70 метр бөгөөд 3 дамжлагатай шатлан ухаж, нийт 32 метр орчим ухаад байна. Ослын голомтод Төв аймгийн Онцгой байдлын газрын дарга, хурандаа Г. Эрдэнэбатаар ахлуулсан 48 хүн, 28 автомашин, 20 тусгай зориулалтын техник, хэрэгсэлтэйгээр ажиллаж байгаа юм.

Мөн ОБЕГ-ын Шуурхай штабаас удирдлага, зохион байгуулалтаар тогтмол хангаж байна. Хүүхэд цооногт унаснаас хойш 29:20 цаг, ажиллагааг эхлүүлснээс хойш 24:03 цаг болж байгаа бөгөөд маркшейдерийн мэргэжилтнүүд нарийвчилсан хэмжилт хийж, могойн нүд камер ашиглан цооногт доргилт өгч байгаа эсэхийг тогтмол хянаж байна.

Т.БАТСҮРЭН

Б.ЛУВСАНПЭРЭНЛЭЙ

Зураглаач: Б.АЛТАНГЭРЭЛ

Өөрийн сэтгэгдлээ илэрхийл

Share Tweet