Украины цохилтын улмаас ОХУ-ын засгийн газар дизель түлш, керосины экспортыг хязгаарлахаар бэлтгэж байна

ОХУ-ын төв хэсэгт орших газрын тос боловсруулах үйлдвэрүүдэд Украин удаа дараа цохилт өгснөөс болж газрын тосны компаниуд түлш үйлдвэрлэх хүчин чадлынхаа 25 хувийг алджээ. Үүний улмаас Оросын засгийн газар нефтийн бүтээгдэхүүний экспортод тавьсан хоригоо тэлэхээр төлөвлөж байна.

Гуравдугаар сарын сүүлээс хойш ОХУ бензиний экспортод хориг тавьсан. Одоо Оросын засгийн газар дизель түлш, керосиныг экспортлохыг хязгаарлах талаар хэлэлцэж байна гэж Интерфакс агентлаг эх сурвалжаас эш татан мэдээлжээ.

Эх сурвалжууд хэлснээр мягмар гарагт /2026.05.26/ Шадар сайд Александр Новак газрын тосны компаниудын төлөөлөгчидтэй шатахууны зах зээлийн нөхцөл байдлыг хэлэлцсэн байна. Уулзалтын дараа газрын тосны компаниудад нефтийн бүтээгдэхүүний экспортыг хязгаарлах зөвлөгөө өгчээ. Нэг эх сурвалж мэдээлснээр, керосин, дизель түлшний экспортыг хориглох шийдвэр нь бэлтгэл ажлын шатандаа явж байгаа ч хугацааг нь хараахан тогтоогоогүй байна.

“Reuters” агентлаг тооцоолсноор, тавдугаар сарын хоёр дахь долоо хоногийн эхээр дроны цохилтоос болж ОХУ-ын газрын тос боловсруулах хүчин чадал 238 мянган тонноор буурсан нь нийт хүчин чадлын дөрөвний нэг орчим хувийг эзэлж байгаа юм.

ОХУ-ын төв хэсэгт байрлах Кириши, Москва, Нижний Новгород, Рязань, Ярославль зэрэг томоохон газрын тос боловсруулах үйлдвэрүүд цохилтод өрстөний улмаас үйл ажиллагаагаа зогсоожээ. Эдгээр газрын тос боловсруулах үйлдвэрүүд нийлээд тус улсын бензиний 30 гаруй хувь, дизель түлшний 25 орчим хувийг үйлдвэрлэдэг.

Зөвхөн тавдугаар сард л гэхэд газрын тос боловсруулах зургаан үйлдвэр үйл ажиллагаагаа бүрэн зогсоожээ. Тодруулбал Лукойл компанийн Нижегороднефтеоргсинтез, Сургутнефтегаз компанийн Киришинефтеоргсинтез зэрэг үйлдвэрүүдийн ажиллагаа зогссон байна. Эдгээр үйлдвэрүүд нь хүчин чадлаараа Оросын дөрөв болон хоёр дахь том газрын тос боловсруулах үйлдвэрүүд юм.

“Bloomberg”-ийн мэдээлснээр ОХУ-ын газрын тос боловсруулах үйлдвэрийн ашиглалт 2009 оноос хойшх хамгийн доод түвшинд хүрчээ. Тодруулбал ОХУ өдөрт 4.69 сая баррель газрын тос боловсруулж буй нь өнгөрсөн намрын бензиний хямралын түвшнээс (өдөрт 4.88 сая баррель) ч доогуур байна. Өнгөрсөн намар Украины өгсөн хэд хэдэн агаарын цохилтын дараа Орос даяар түлшний хомсдол үүсэж, шатахуун түгээх станцууд Зөвлөлтийн үеийн хязгаарлалтад эргэн орж, бирж дээр бензиний үнэ түүхэн дээд хэмжээнд хүрсэн.

Түлшний үйлдвэрлэлийн хямралын улмаас Оросын засгийн газар нефтийн бүтээгдэхүүний үйлдвэрлэлд тавдугаар сарын эхнээс хойш хатуу хяналт тавих болсон юм. Тус улсын Эрчим хүчний яам “Роснефть”, “Газпромнефть”, “Лукойл”, “Сургутнефтегаз” зэрэг 11 газрын тосны компанитай гэрээ байгуулсан байна. Тэрхүү гэрээгээр Эрчим хүчний яам түлшний үйлдвэрлэлийн хэмжээ, дотоодын нийлүүлэлт, экспорт, биржийн борлуулалт дээр заавал биелүүлэх хэмжээ тогтоож өгчээ.

Эх сурвалж: The Moscow Times

Өөрийн сэтгэгдлээ илэрхийл

Share Tweet