Хотын МАН, барилгын төсөл, төсвийг атгахаар зэхэж буй БЗД-ийнхэн

Х.Нямбаатарт одоо Нийслэлийн МАН-ын хорооны даргын тамга атгаастай буй. Тэр тамгыг хэзээнээс атгахыг хүсэж, "Би Хотын МАН-ыг удирдах бүрэн боломжтой хүн" гэж хэвлэлд ярьж явсан Э.Бат-Амгалан ирэх 10 сард хүслээ гүйцэлдүүлэх тохироогоо хийжээ.

Харин түүнтэй гар нийлж, Нийслэл дэх барилгын төсөл, төсвийг хамжин түшилцэх хүмүүсээр Б.Мөнхбаатар, Д.Жавхлан, Г.Жаргалсайхан нар нэрлэгдэж байна.

Нэг. Н.Учралын дохиураар "Гадаад зээллэгийн үр ашгийг нэмэгдүүлэх хуулийн төсөл"-өөс сугарч, төсвийн таазанд тулсан шалтгаанаар бүтээн байгуулалтын улиралдаа ажил нь үргэлжлэх эсэх нь тодорхойгүй болсон "Сэлбэ 20 минутын хот" ХХК-ийн захирлаар У.Баатар ажиллаж буй. Түүний оронд У.Хүрэлсүхийн Засгийн газрын үед Барилга хот байгуулалтын дэд сайдаар хоёр жил ажиллаж, үргэлжлүүлэн тус яамны сайдаар томилогдон 2.5 жил ажиллаад Л.Оюун-Эрдэнийн үед чөлөөлөгдсөн Б.Мөнхбаатарыг томилохоор тохирчээ. Тэр бол БЗД-ийн Засаг даргаар ажиллаж байсан нэгэн.

Ажилласан байдлыг нь тухайлбал,

1998–2001 онд Монголын Ардчилсан Социалист Оюутны Холбооны Ерөнхий нарийн бичгийн даргаар ажиллаж улс төрийн замналаа эхэлсэн бөгөөд 2001–2002 онд Нийслэлийн Монгол Ардын Хувьсгалт Намын Хороонд ахлах ажилтнаар үргэлжлүүлэн ажилласан.

2002–2004 онд Боловсрол, Соёл, Шинжлэх Ухааны яамны Төрийн захиргааны удирдлагын газрын орлогч дарга, Гадаад харилцааны хэлтсийн даргын үүрэг гүйцэтгэж, 2006–2008 онд Нийслэлийн Засаг даргын Тамгын газрын Хотын хөгжлийн бодлогын хэлтсийг удирдсан.

2008 онд Баянзүрх дүүргийн Засаг даргаар томилогдож, 2009–2012 онд Нийслэлийн Засаг даргын орлогч буюу барилга, хот байгуулалт, дэд бүтцийн асуудал хариуцсан орлогч даргаар ажилласан.

Улмаар 2014–2015 онд Хүн амын хөгжил, нийгмийн хамгааллын дэд сайдаар томилогдсон тэрбээр 2016–2018 онд "Эрдэнэс Оюу Толгой" ХХК-ийн гүйцэтгэх захирал болон "Оюу Толгой" ХХК-ийн Төлөөлөн удирдах зөвлөлийн гишүүнээр хувийн хэвшилд ажиллаж, 2018 оноос Барилга, хот байгуулалтын дэд сайдаар, 2020 онд тус яамны сайдаар томилогдсон юм. 2023 онд сайдын суудлаасаа бууснаас хойш улс төрийн хүрээнд "чимээгүй", ямар нэгэн төрийн албанд томилогдолгүй иржээ.

Хоёр. Саях даваа гарагт ХББОС-ын сайд Э.Бат-Амгалан "ТОСК, НОСК-ыг татан буулгаж, нэгдсэн “Үндэсний орон сууцны корпорац” байгуулна. Ипотекийн зээл хүсэгчдийн эх үүсвэр нэмэгдэж, 3-5 жил хүлээгдэж буй асуудал наашилна. Мөн зээлийн хүсэлтийг 2-2,5 дахин түргэн шийдвэрлэдэг болно" хэмээн мэдэгдсэн. Тус тодруулгад дурдагдсанчлан ТОСК, НОСК-ыг нэгтгэн байгуулах "Үндэсний орон сууцжуулалтын корпорац"-ийн даргаар БЗД-ийн НИТХ-ын төлөөлөгч, “Улаанбаатар орон сууцжуулалт” ХХК-ийн ТУЗ-ийн гишүүн Д.Жавхланг томилох аж.

Түүний хувьд НИТХ-ын төлөөлөгчөөр 2024 онд томилогдох хүртлээ ер төрийн албанд ажиллаж байгаагүй. Ажилласан байдал нь:

• 2005-2007 он Ордгеод ХХК Захирал
• 2007 оноос Рич Констракшн ХХК Захирал
• 2020 оноос Хантесо Констракшн ХХК Захирал
• 2020 оноос Рич групп ХХК Захирал
• 2024 нийслэлийн Иргэдийн Төлөөлөгчдийн Хурлын Төлөөлөгч 

Гурав. Х.Нямбаатар суудлаа өгөөд даруй 23 хоног өнгөрч байна. Түүний нэгдүгээр орлогч Т.Даваадалайг АТГ-аас шалгаж, нэг сарын цагдан хорих, таслан сэргийлэх арга хэмжээ авсан. Түүний оронд Х.Нямбаатарын томилж үлдээсэн Б.Мөнхбат ажиллаж байгаа. Хөшигний ард, шинэ Хотын дарга Б.Пүрэвдагва түүнийг солихгүй, ажиллуулахаар яригдаж байгаа аж.

Харин хоёрдугаар орлогч А.Амартүвшинд Агаарын бохирдол, ногоон хөгжлийн асуудал хариуцсан зохицуулагч гэх ажил даалгаад, хоёрдугаар орлогчийнх нь ажлыг Г.Жаргалсайханд өгөхөөр тохирчээ. Г.Жаргалсайханы хувьд Хот байгуулалт, барилга, орон сууцжуулалтын сайд Э.Бат-Амгалангийн хүн, БЗД-ийн Засаг даргынхаа ажлыг өгч, Х.Нямбаатарын үед Хотын даргын нэгдүгээр орлогчоор томилогдсон ч тав хонолгүй "хөөгдсөн" нэгэн билээ.

О.ОНОН

Өөрийн сэтгэгдлээ илэрхийл

Share Tweet