Дундговь аймгийн Цагаандэлгэр суманд Араб улсын таван иргэн болон нэг Монгол орчуулагчийн хамтаар идлэг шонхор барихаар явж байх үедээ саатуулагдсан. Шалгалтаар 30 тагтааг байрлаж буй газартаа барьсан байсныг тогтоосон тухай мэдээлэгдсэн.
Тус иргэдэд ямар арга хэмжээ авсан талаар Дундговь аймгийн Цагаандэлгэр сумын хэсгийн төлөөлөгчөөс тодруулахад "Араб улсын таван иргэн идлэг шонхор шувуу барихаар явж байхад нь илрүүлж, саатуулсан. Шонхор барихаар зэхэж байснаас гадна 30 тооны тагтаа барьсан нь шалгалтаар илэрсэн. Бид зөрчил гаргасан иргэдийг сумынхаа Байгаль орчны байцаагчид хүлээлгэн өгсөн. Тэд торгуулийн арга хэмжээ авсан байх" гэх мэдээллийг өглөө.
Үргэлжлүүлэн тус сумын Байгаль орчны газартай холбогдон тодруулга авах гэсэн боловч холбогдож чадсангүй. Харин сумын Засаг даргын орлогчтой уг асуудлаар холбогдон тодруулахад "Манай аймгийн Засаг даргаас 2026 онд соёлын зориулалтаар идлэг шонхор шувууг аймгийн хэмжээнд бариулахгүй гэсэн чиглэл гарган мөрдөн ажиллаж буй. Иймд шонхор агнахаар зэхэж, хууль бусаад 30 тагтааг барьсан иргэдийг Засгийн газраас тогтоосон амьтны экологийн эдийн засгийн үнэлгээний хүрээнд торгосон. Ингэхдээ нэг тагтааг 15 мянган төгрөгөөр тооцож, нийт ₮450 мянган төгрөгийн торгуулийн арга хэмжээг оноосон. Идлэг шонхорыг барьсан нь тогтоогдоогүй учир тус асуудалд холбогдох арга хэмжээ аваагүй" гэв.
Ташрамд дурдахад, Монгол Улс 2026 онд соёлын зориулалтаар 350 хүртэл толгой идлэг шонхор шувуу барьж, гадаад улсад гаргах тоо хэмжээг Засгийн газрын 2026 оны зургаадугаар сарын 17-ны өдрийн 263 дугаар тогтоолоор баталжээ. Нэг идлэг шонхрыг 26 сая 100 мянган төгрөгөөр үнэлдэг бөгөөд үүний 90 хувь нь тухайн сумын төрийн сангийн орлого болдог.
Түүнчлэн Архангай, Баян-Өлгий, Баянхонгор, Говь-Алтай, Говьсүмбэр, Завхан, Дорноговь, Өвөрхангай, Сүхбаатар, Төв, Хөвсгөл, Хэнтий зэрэг аймгийн Байгаль орчны газрын дарга нарт батлагдсан гэрээний загварыг хүргүүлж, идлэг шонхор барих үйл ажиллагаанд гэрээ байгуулан ажиллах чиглэл өгчээ.
Шонхор барьсан тохиолдолд тусгай акт үйлдэх бөгөөд сумын нэр, барьсан идлэг шонхрын тоо, огноо, бөгж болон зүүлтийн дугаар зэрэг мэдээллийг алдаагүй бүртгэхээр гэрээний загварт тусгасан байна. Мөн актыг хоёр хувь үйлдэж, нэг хувийг тухайн суманд, нөгөөг аймгийн Байгаль орчны газарт төвлөрүүлэх зохицуулалттай.
Г.МИШЭЭЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Шонхор бариагүй нь сайн ч 30 тагтаа барьсан үйлдэлд 450 мянган төгрөгийн торгууль арай бага санагдаж байна
Shonhor barih gej ywsan humuus 30 tagtaa barisan ni bas l baigali orchnii huuli zurchsun uildel shuu
Гадаадын иргэд Монголд ирээд байгальтай холбоотой хууль зөрчсөн бол иргэн харьяаллыг нь үл харгалзаад адилхан хариуцлага тооцдог байх хэрэгтэй