Ерөнхийлөгч энэ зун дөрвөн төрийн тахилгад оролцож, дээл малгайгаа хэдэнтээ солин дэгжирхэв

Ерөнхий инфляц 13 хувь, хүнсний инфляц 25 хувь хүрээд буй. Өргөн хэрэглээний бараа бүтээгдэхүүний үнэ тэр хэрээ өсөж, иргэдийн нуруун дээр ачаа хүндэрч байгаа гэсэн үг. Ямартаа л ШТС-уудын гадна дугаарлан хонож, зах зээлийн нийгэмд картын бараа мэт зарчмаар бензин авч байна.

Харин бүрэн эрхт хугацааных нь сүүлийн жил тохиож буй Ерөнхийлөгч У.Хүрэлсүх уул хайрхан тахих төрийн тахилгад монгол төрийг төлөөлөн заларсаар зуныг үдлээ. Хэрэв Төрийн тэргүүний дээлийн өнгө, малгай бүсний хийцлэлээр улс орны хөгжлийн хэмждэг бол өнгөтэй, өргөн дэлгэр харагдах аж.

ЮНЕСКО-гоос “Уул овоо тахих монгол зан үйл”-ийг яаралтай хамгаалах шаардлагатай соёлын биет бус өвийн Дэлхийн жагсаалтад бүртгэсэн гэдгийг дурдах нь зүй. Монгол Улсын Ерөнхийлөгч төрийн тахилгад төрийг төлөөлөн оролцдог байна. Өнгөрсөн зургаадугаар сараас хойш дөрвөн төрийн тахилга болсны хоёр өнөөгийн Ерөнхийлөгч У.Хүрэлсүхийн зарлигаар албажжээ.

Отгон тэнгэр хайрханы тахилга | 2026.06.17

Завхан аймгийн Отгон, Алдархаан сумын нутагт орших Хангайн нурууны ноён оргил Отгонтэнгэр хайрхан уулын тэнгэрийг тайх төрийн их тахилга. Тахилгын өдөр Ерөнхийлөгч У.Хүрэлсүх төрийн бэлгэдлийг илэрхийлж, хүндэт харуулын цэргүүдээр хамгаалуулан тусгайлан зассан талбайд хүрэлцэн ирлээ. Тэрбээр жанжин малгай, цайвар өнгийн дээлээр гангарав.

Отгонтэнгэр хайрхан уулыг  Ерөнхийлөгчийн 1995 оны 110 дугаар зарлигаар төрийн тахилгатай болгож, 1995, 1999, 2003, 2007, 2011, 2016, 2021 онд тахисан. Уулын ноён оргил нь далайн түвшнээс дээш 4,021 метрт өргөгдсөн бөгөөд 3,752 метрээс дээш өндөрт мөнх цастай. Мөнх цасны хилийн доохон талд Ар, Өвөр Бадархундага хэмээх үзэсгэлэнт нуур байдаг.

Бурхан Халдун уулын тахилга | 2026.06.23

Ерөнхийлөгч У.Хүрэлсүх оройн дээд шүтээн Эзэн Богд Чингис хааны айлтгалтай Бурхан Халдун хайрхны цадиг түүх бол төрт ёс, түүхэн уламжлал, түмэн олны сүсэг бишрэл, төр, шашны эрхэм ёс, байгаль дэлхийгээ шүтэн дээдлэх ардын ухаан, өв соёл, зан заншлын цогц илэрхийлэл болохыг хэлсэн үгэндээ онцолсон байна. Энэ удаа тэрбээр малгайгаа солин өмсжээ.

Бурхан Халдун уулыг Хиад боржигины өвөг Бодончарын үеэс тахиж, Эзэн Богд Чингис хааны үед Хамаг Монгол, Монголын Эзэнт гүрний Сүлд уул болгон тахиж байсан. 1995 онд Ерөнхийлөгчийн зарлигаар төрийн тахилгатай уул болгосон юм. 2015 онд ХБНГУ-ын Бонн хотноо болсон ЮНЕСКО-гийн Дэлхийн өвийн хорооны чуулганаас “Бурхан Халдун уул, түүнийг хүрээлсэн тахилгат газар нутаг” гэсэн нэрээр Дэлхийн соёлын өвд бүртгэжээ.

Хөвсгөл нуурын лусыг тахих төрийн тахилгын ёслол | 2026.08.02

Ерөнхийлөгч У.Хүрэлсүх XVII жарны “Сүрээр дарагч” хэмээх гал морин жилийн мэндчилгээ дэвшүүлэх үеэрээ Хөвсгөл нуурыг төрийн тахилгатай болгох зарлиг гарсныг албан ёсоор зарласан. |2026.02.20|

Хөвсгөл нуурын лусыг тахих төрийн тахилгын ёслол Чөчү хайрхны тахилгат овоонд болсон. Энэ үеэр орон даяар шатахууны хомстол үүсэж, жуулчид, наадамчид байгаа байгаа газраа гацаанд ороод байсан тул түүний тахилгад өмссөн хөх цэнхэр өнгий, хормой хэсэгтээ угалзарсан хээтэй дээл сэлт олны шүүмжид багагүй өртсөн.

Манай улсын гадаргын цэвэр усны нөөцийн 70 гаруй хувийг Хөвсгөл нуур бүрдүүлдэг. Төв Азийн гадаргын цэнгэг усны эх, нэн ховор араатан, жигүүртний өлгий нутаг болсон  нуурын цэвэр цэнгэг, ариун дагшин байдал, унаган төрх, ургамал, амьтан, түүх, соёлын дурсгал энд хадгалагдан буй.

Хар зүрх уулын тэнгэрийг тахих төрийн тахилга боллоо | 2026.08.21

Хэнтий аймгийн Цэнхэрмандал сумын нутагт орших түүх, соёлын хосгүй өв Хар Зүрхний Хөх нуурын Зүрх хайрханд төрийн тахилга ёслол боллоо. Их Монгол Улс байгуулагдсаны 820 жилийн ойг тохиолдуулан энэ онд Ерөнхийлөгч У.Хүрэлсүхийн зарлигаар Зүрх хайрханыг төрийн тахилгат хайрханы нэг болгон өргөмжилсөн.

Ерөнхийлөгч төрийг төлөөлөн тахилгад оролцов. Тэрбээр тэнгэрт хүргэх дуут сумыг Хэнтий аймгийн Баян-Адарга сумын харьяат, үндэсний сурын Сумын мэргэн Ж.Эрхэмбаярт хүлээлгэн өгч, мөн аймгийн Цэнхэрмандал сумын харьяат, Онц тээвэрчин, мянгат малчин Г.Дэмчигсүрэнгийн бор азаргыг сэтэрлэжээ.

Д.ХАДААН

Өөрийн сэтгэгдлээ илэрхийл

Share Tweet