Сурвалжилга: 1670 төгрөгөөр нэмэгдсэн Евро АИ-92 бензинээр банкаа 2-3 дүүргэхэд цалингийнхаа талыг зарцуулж байна

Евро-5 стандартын АИ-92 шатахуун ганц сар хүрэхгүй хугацааны дотор 1670 төгрөгөөр нэмэгдэж 4960 төгрөгт хүрээд байна. Үнэ нэмэгдсэнээс хойш нийслэлд үйл ажиллагаа явуулдаг ихэнх шатахуун түгээх газрууд зөвхөн энэ төрлийн шатахуун борлуулж байгаад иргэд бухимдлаа идэрхийлэх болов. Иргэд шатахуун хомсдолтой байгаа тул ажил амьдралаа залгуулах зорилгоор хэт үнэтэй ч олдоц их байгаагаас нь авахаас өөр сонголтгүй гэдгийг хэлж байна. Мөн шатахууны хомсдол далимдуулан энгийн АИ-92 шатахууны нөөцтэй боловч хэрэглэгчдэд тодорхойгүй шалтгаанаар борлуулахгүй байгаа гэх шүүмжлэл өндрийг авч буй.

Салбарын сайдын зүгээс энгийн шатахууныг евро стандартынх гэж зарж байх магадлалтай гэх хардлагыг шалгаж, иргэдэд ил тод мэдээлэх, үнэ хэрхэн тогтоож байгааг дэлгэрэнгүй танилцуулах үүрэг өгсөн юм.

ҮСХ-ны мэдээлснээр, Монголын Улсын сарын дундаж нэрлэсэн цалин 2.8 сая төгрөг. Тэгвэл яг өнөөдрийн ханшаар Евро стандартын АИ-92 бензинээр банкаа нэг удаа дүүргэхэд сарын цалингийнхаа 11 хувийг зарцуулна гэсэн үг. Энэ нь 60 литрийн банктай машиндаа литрийг 4960 төгрөгөөр худалдан авч Евро-5 АИ-92 стандартын шатахуунаар дүүргэхэд 297,600 төгрөг болно. Иргэд ихэвчлэн сард 2-3 удаа машиндаа бензин хийнэ гэж тооцвол цалингийн гуравны нэг нь ердөө шатахуунд зарцуулагдана. Үүгээр зогсохгүй, Монголд автобензины үнэ өсөхийн хэрээр бусад бараа, материалын үнэ дагаад нэмэгддэг.

Евро-5 стандартын АИ-92 шатахуун энгийн шатахуунаас түлшний найрлага, ялангуяа хүхрийн агууламж болон бусад бохирдуулагчийн хэмжээнд илүү хатуу шаардлага тавьдаг стандарт. Европын түлшний стандартын хүрээнд хүхрийн дээд хэмжээ 10 мг/кг байдаг аж.

БНХАУ манайд дотоодын үнээс өндөр үнээр шатахуун нийлүүлнэ

Монгол Улсын Засгийн газар нефтийн бүтээгдэхүүнийхээ импортын сувгуудыг тэлэх хүрээнд БНХАУ-аас авах шатахууны хэмжээг дотоодын хэрэглээний 30 хувьд хүргэх зорилтыг тавиад байна.

БНХАУ-ын дотоодын 92 бензиний улсын хэмжээнд мөрдөх жижиглэнгийн үнэ бүс нутгаасаа хамаарч өөр боловч ихэнх нутагт ойролцоогоор 7.7–7.9 юань буюу литр тутмын үнэ нь 4180 төгрөг.  Монгол улсын хувьд БНХАУ-аас газрын тосны бүтээгдэхүүнийг импортлон авах шилжүүлэн ачих байгууламж, агуулахын хүчин чадал сард 150 мянган мкуб-д хүрээд байна. Одоогоор БНХАУ  наймдугаар сард

• АИ-92-6000 тонн,
• Дизель түлш – 2000 тонн,
• Онгоцны түлш – 3000 тонныг тус тус нийлүүлсэн.

Харин Есдүгээр сард

• АИ-92 – 10 мянган тонн,
• Онгоцны түлш – 3000 тонныг нийлүүлэхээ илэрхийлжээ.

Иргэн: Машиныхаа банкийг 527 мянган төгрөгөөр дүүргэлээ. Би сардаа дунджаар 3-4 дүүргэдэг. Хүмүүсийн хэрэглээ ихэссэн үед наадам тааруулан шатахууны хомсдолыг үүсгэж гайхамшигтай тоглолт хийж шатахууны үнээ зоригтойгоор маш сайн нэмжээ.

Иргэн: Жижиг тэрэг 250 мянган төгрөг орчимд дүүрч байна. Тээвэр бол бүх төрлийн бүтээгдэхүүний суурь үнэд шууд нөлөөлнө. Энгийн АИ-92 дээрээ шатахуун түгээх станцууд чинь ашиг хийгээд ард иргэдээ хууран мэхэлж байгаа юм биш биз.

Иргэн: Үнийн зөрүү их байгаа ч шатахуун зарцуулалт ялгаа байдаггүй. Миний хардаж байгаагаар бол энгийн 92 бензиныг евро гэж зараад байгаа болов уу гэсэн таамаг байгаа. Иргэд бидний хувьд ялгаж мэдэхгүй учир худлаа үнэ нэмэх аргуудын нэг л байх даа. Байгаа мөнгөндөө тааруулаад үнэтэй хэдий ч авахаас өөр аргагүйд хүрчихээд байна гэсэн юм.

Шатахууны хомсдлоос шалтгаалсан эрэлт нэмэгдсэн энэ үед иргэдэд зөвхөн Евро стандартын шатахуун борлуулж байгаа асуудлыг салбар яам даруй шийдвэрлэж зохицуулахгүй бол яваандаа аль алиных нь эрэлтээс үүдсэн хомсдол үүсэхдээ тулах вий.

Түүнчлэн “Улсаас энгийн АИ-92 бензинд төр татаас өгч, үнийг барьдаг бол Еврл стандартын АИ-92 бензин дээр төр татаас өгдөггүй учраас орж ирсэн үнээрээ л борлуулагдаж байгаа” хэмээн Г.Дамдинням сайд хэлсэн. Ингэхээр цаашид Евро стандартын бензиний үнэ аль хүртэл өсөхийг төр шийдэхгүй гэсэн үг аж.

Өөрийн сэтгэгдлээ илэрхийл

Share Tweet