#1: Нутгийн ах Н.Баяртсайханаа 20 жил бараадаж, хоёр жил УИХ-ын гишүүнээр ажиллаад давхар дээл нөмөрсөн Ж.Алдаржавхлан

Сүүлийн хорин жилийн намтар түүх нь нэг нутгийн ах Н.Баяртсайхантайгаа нягт холбоотой, 2020 онд Хан-Уул дүүргээс УИХ-д сонгогдож саарал ордонд заларч, Н.Учралын Засгийн газарт сайд болж өдөлсөн Ж.Алдаржавхланг онцолж байна.

Намтраас нь эхэлье.

Ж.Алдаржавхлан бол, УИХ-ын анхдугаар сонгуулиас хойш Монголын парламентад гурван удаа сууж УИХ-ын гишүүн, Сангийн сайдаар хүртэл ажиллаж, сүүлд М.Энхболдын УИХ-ын дарга байхдаа бүрэн эрхийнхээ хүрээнд томилсноор Монгол банкны ерөнхийлөгчөөр гурван жил гаруй ажилласан Н.Баяртсайханы нөмөрт 20 жил хорогдсон гэхэд хилсдэхгүй.

Ж.Алдаржавхлангийн намтар 2001-2006 онд УИХ-ын Тамгын газрын референт, УИХ-ын Төсвийн байнгын хорооны зохион байгуулагч байсан гэж эхэлдэг. Энэ нь үнэн хэрэгтээ УИХ-ын гишүүн, Төсвийн байнгын хорооны дарга Н.Баяртсайханы цүнхийг барьж, ордон орж ирсэн эхлэл нь.

Дараа нь, 2006 онд УИХ-ын гишүүн Н.Баяртсайхан Сангийн сайд болж, улмаар туслах явсан Ж.Алдаржавхлан сайдын зөвлөх болон дэвшиж, Сангийн сайд Н.Баяртсайхан 2007 онд “Орон сууцны санхүүжилтийн корпораци”-ийг байгуулж, 2008 онд Н.Баяртсайхан зөвлөх Ж.Алдаржавхлангаа “Орон сууцны санхүүжилтийн корпораци”-ийн Гүйцэтгэх захирлаар томилсон байдаг. Тус албан тушаалаа 2012 он хүртэл хашсан.

Ингээд Ж.Алдаржавхлан 2016 онд НИТХ-ын төлөөлөгч болж, Хан-Уул дүүргийн Засаг даргаар томилогдсон. Мөн л Н.Баяртсайхантай холбогдоно. Тодруулбал, 2016 онд Монголбанкны Ерөнхийлөгчөөр УИХ-ын гишүүн асан Н.Баяртсайханыг томилсон. Тус томилгооноос дөрвөн сарын дараа буюу 2016 оны аравдугаар сард Ж.Алдаржавхлан анх удаа НИТХ-д Хан-Уул дүүргээс нэр дэвшин сонгогдож, улмаар 2016 оны арваннэгдүгээр сарын 11-нд Хан-Уул дүүргийн Засаг даргаар томилогдсон байдаг. Эл дүүрэг бол 2004 оны сонгуульд Н.Баяртсайханы ялсан тойрог.

Ж.Алдаржавхлан 2020 оны сонгуульд Налайх дүүргээс өрсөөд бараагүй, 2020 онд өөрийн Засаг ноёноор ажиллаж байсан дүүргээсээ дэвшиж, 35.3 хувийн саналаар сонгогдсон байдаг.

Н.Баяртсайхан Монголбанкны ерөнхийлөгчөөр 2019 он хүртэл ажилласан. 2019 онд Монгол Улсыг FATF саарал жагсаалтад оруулснаас үүдэн өргөдлөө өгсөн. Тэрбээр АТГ-т шалгагдаж байхдаа гадагш зугтаж, “Шувуу” ажиллагаанд ч нэр нь бүртгэгдэж байжээ. Улмаар гаднаас өөрөө ирж, АТГ-т саатуулагдаж, алдарт 461-т 48 цаг суугаад амжсан. Энэ үйл явдал 2024 оны 10 сард болсон байдаг.

Орлого нь буурсан ч орон сууцаа өргөжүүлэв

Ж.Алдаржавхлангийн намтар нь ийм. Өөрийгөө мерит зарчмаар дээшилсэн гэдэг боловч Н.Баяртсайханаас холдоогүйг сая харлаа. Тэгвэл түүний хөрөнгө орлого дүүргийн засаг дарга байснаас хойш хэрхэн өөрчлөгдсөн болохыг харцгаая.

Эхэнд түүний Хан-Уул дүүргийн Засаг даргаар ажиллаж байсан 2023 он, УИХ-ын гишүүнээр сонгогдсон 2024 оныг харьцуулъя.

• Өөрийн орлого: 2023 онд 86 сая, 2024 онд 378 сая
• Гэр бүлийн орлого: 2023 онд 50 сая, 2024 онд 60 сая
• Орон сууц барилга байгууламжийн үнийн дүн: тус онуудад 185 сая
• Автомашины үнэлгээ: 29 сая
• 2023, 2024 онуудад 2 саяар үнэлэгдэх нэг газартай
• Хадгаламж: 2023 онд 56 сая, 2024 онд 79 сая хэмээн мэдүүлсэн байна.

Харин хамгийн сүүлд буюу 2025 онд мэдүүлсэн ХОМ нь 2024 оныхоос эрс ялгаатай.

Өөрийн хөрөнгө нь 265 саяар, гэр бүлийн орлого нь 3 саяар буурсан. Нэг нийтийн орон сууцтай болж, автозогсоолоо нэгээр нэмснээр орон сууц барилга байгууламжийн нийт үнэлгээ нь 330 саяар өссөн байна. Үүнээс гадна эзэмших гурван газартай болж, нийт 20 саяар үнэлэгдэж байна. Мөн сүүлд мэдүүлсэн ХОМ-доо автомашингүй хэмээжээ.

УИХ-ын гишүүний хувиар тэр юу хийв

УИХ-ын гишүүн тойргийнхоо иргэдийг төлөөлөн хуралд сууж, санал өгч, хууль санаачилж, батлах үүрэгтэй. Түүний ирцийг харвал,

• 2024 оны намрын чуулганд 79 хувийн оролцоотой. Найман удаа хоцорч, дөрвөн удаа чөлөө авч, хоёр удаа тасалжээ
• 2025 оны хавар 83 хувийн оролцоотой. 14 удаа хоцорч, гурван удаа чөлөө авч, гурван удаа тасалж, нэг удаад нь гадаад томилолтод явжээ
• 2025 оны намар 78 хувийн оролцоотой. 19 удаа хоцорч, таван удаа чөлөө авч, гурван удаад нь чуулганаа тасалжээ.
• 2026 оны хавар 86 хувийн оролцоотой. 35 удаагийн хуралдааны 17-д нь хоцорч, тавд нь томилолтод явсан гэх мэдээлэлтэй байна.

Харин санаачилсан, батлагдсан хуулиудыг сөхөж харвал, 20 орчим хуулиас нь гурав нь батлагдсан. Бусад нь дэмжигдээгүй, өргөн барьсан, хэлэлцэж байгаа гэх утгатай байна.

Батлагдсан хуулиудыг нь тодруулбал, Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд өөрчлөлт оруулах тухай, Хот байгуулалтын тухай хууль /Шинэчилсэн найруулга/-д нэмэлт оруулах тухай, Үндэсний их баяр наадмын тухай хуульд өөрчлөлт оруулах тухай

Сайд болоод юу хийв

Угаас МАН дотроо 38|30 гэсэн бүлэглэл үүсгэж, хоёр талдаа гарчхаад буй. Нам доторх цөөнхийн бүлгийн зүгээс УИх-ын даргыг өөрсдийн хүнээр томилох санал гаргасан ч МАН-ын удирдах хүрээндээ зөвшөөрөгдөөгүй юм. Ингэснээр,

• Хууль зүй, дотоод хэргийн сайдаар С.Амарсайханыг
• Соёл, спорт, аялал жуулчлал, залуучуудын сайдаар Б.Алдаржавхланг,
• Цахим хөгжил, инновац, харилцаа холбооны сайдаар Ч.Номинг
• Хүнс, хөдөө аж ахуй, хөнгөн үйлдвэрийн сайдаар Ц.Идэрбатыг
• Байгаль орчин, уур амьсгалын өөрчлөлтийн сайд Ц.Сандаг-Очир ыг томилуулах тохироог хийсэн.

Нам доторх цөөнх, нөлөө нь бүдгэрсэн бүлгээс тохироогоор танхимдаа орж ирсэн. Н.Учралын Засгийн газар байгуулагдаад дөрвөн сарын нүүрийг үзэж байна. Энэ хугацаанд Ж.Алдаржавхлан ажил хийж бүтээсэн гэхээс илүү тэсэж үлдэх арга саам хайж ирсэн гэхэд үнэнээс хол зөрөхгүй болов уу.

Намрын чуулган хаяанд ирэв, намрын улс төр өрнөөд эхэлчихсэн. Энэ үест байгуулагдаад дөрвөн сар болж буй Н.Учралын танхимын сайд нарын мэдээллийг бид цувралаар хүргэсээр байх болно.

Өөрийн сэтгэгдлээ илэрхийл

Share Tweet