Иргэн: "Орон нутгийн замд 83 км/ц хурдтай явсан учир даатгалаас нөхөн олговор өгөхгүй” гэх хариу өгсөн
Авто машины даатгалын компани гэрээнд заасан үүргийн дагуу нөхөн олговор олгохоос татгалзаж буй талаар иргэн н.Дөлгөөн манай сайтад хандлаа. Тодруулбал, тус иргэн нь өөрийн гэнэтийн ослын даатгалаар даатгуулсан автомашинтайгаа орон нутгийн замд шөнө зорчиж байгаад зам руу орж ирсэн нохойг мөргөсөн осол гарчээ. Ослын улмаас автомашины урд талын гупер эвдэрсэн байна.
Иймд тээврийн хэрэгслийн хар хайрцагт бичигдсэн ослын бичлэгийг үзүүлж даатгуулсан "Иншүрко" даатгалд хандахад "Манайх нөхөн олговор өгөх боломжгүй" гэх хариуг өгсөн байна. Улмаар иргэн даатгалын компани хоёрын дунд маргаан үүссэн бөгөөд талуудын байр суурийг хүргэж байна.
Энэ талаар "Иншүрко" даатгалаас тодруулахад "Ослын бичлэгт тээврийн хэрэгсэл 83 км/ц хурдтай явж байсан учраас нөхөн олговор олгохгүй боломжгүй. Учир нь гэрээнд нөхөн олговор олгохгүй нөхцлүүд гэж тусгасан. Үүнд, "Замын хөдөлгөөний дүрэм болон бусад хууль тогтоомжоор тогтоосон тээврийн хэрэгслийн хурдыг хэтрүүлсэн" гэж заасан" гэлээ.
Харин нөгөө талаас иргэн н.Дөлгөөн "Гэрээний үндсэн заалтад гэнэтийн учирсан хохиролд нөхөн олговор олгоно" гэж заасан. Гэтэл хурд хэтрүүлсэн гэх шалтгаанаар шалтаглаж нөхөн олговор өгөхөөс татгалзаж байна. Ер нь энэ даатгалын компаниуд энэ мэт шалтаг гаргаж олон иргэдийг залилж байгаа. Үүнийг хуулиар шийдэх хэрэгтэй" хэмээлээ.
Б.САНАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
bitgii daatguulj bai
daatgal manaid hugjih boloogui