С.Молор-Эрдэнийн багш Вильхельм Фоссенкуль: Шүүмжлэлт сэтгэлгээ, нээлттэй үзэл бодлынхоо улмаас хоригдож буйд зовниж байна

Философич С.Молор-Эрдэнийг нэг сарын хугацаатайгаар цагдан хориод буй. Түүнийг "Үндэсний эв нэгдлийг бусниулах хэрэг. Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон" гэх зүйл ангиар шалгаж буй.

Тэгвэл түүний багш Герман улсын Мюнхен хотын Людвиг-Максимилианы их сургуулийн философийн профессор Вильхельм Фоссенкуль дараах байр суурийг илэрхийлжээ. Тэрбээр "хуучин докторант С.Молор-Эрдэнэ баривчлагдсан тухай мэдээг би сонссон бөгөөд энэ мэдээ намайг гүнээ цочирдууллаа. Молор-Эрдэнэ нь 2007 онд миний удирдлага дор философийн чиглэлээр “Мэдлэг гэж юу вэ?” гэсэн асуудалыг хөндсөн докторын ажлаа хамгаалан төгссөн.

Тэр бол ёс зүй, ёс суртахууны хувьд шударга, зарчимч хүн. Түүний хувьд эх орныхоо өмнө хүлээх хариуцлага, мөн мэдээж өөрийнхөө болон гэр бүлийнхээ өмнө хүлээх хариуцлага нэн чухал. Түүнийг бодитой бус үнэн зөв бус үндэслэлгүйгээр баривчилж, урьдчилан хорьж байгаа нь миний сэтгэлийг маш их түгшээж байна. Монголын эрх зүйт төр түүнийг суллаж, амьдрал болон ажлаа үргэлжлүүлэх боломжийг нь хангана гэдэгт би чин сэтгэлээсээ найдаж байна.

Философич хүн мэдлэгийн талаарх тогтсон ойлголтуудыг шүүмжлэлтэйгээр эргэлзэн шинжлэх ёстой. Мөн бусдад таалагдахгүй, таагүй санагдаж болох байр суурийг илэрхийлж, бусдын асууж зүрхэлдэггүй эсвэл таагүй гэж үздэг асуултуудыг тавих эрхтэй байх ёстой. С.Молор-Эрдэнэ шүүмжлэлт сэтгэлгээ, нээлттэй үзэл бодлынхоо улмаас одоо урьдчилан хоригдож байгаа нь надад маш их санаа зовнил төрүүлж байна. Энэ нөхцөл байдал эцэс болно гэдэгт би түүний төлөө чин сэтгэлээсээ найдаж байна" гэжээ.

Б.САНАА

Өөрийн сэтгэгдлээ илэрхийл

Share Tweet