Н.Учрал ХОМ-тээ "Их засаг"-ийг мэдүүлсэн ч ээжийнхээ эзэмшдэг "Их засаг кингс" сургуулийг дурдаагүй байна

Боловсролын яамнаас "Гэрт ойр сургууль" хөтөлбөр хэрэгжүүлнэ гэж ₮50 тэрбумыг төсөвт тусгаад буй. Тус хөтөлбөрийн хүрээнд гурван хувийн сургуулийн тоног төхөөрөмжийг сайжруулахаар ₮7 тэрбумыг тусгасанд ерөнхий сайдын ээжийн эзэмшдэг "Их засаг кинг" сургууль багтсан нь олны анхааралд орж, шүүмжлэл дагуулах болсон. Тэгвэл ерөнхий сайд Н.Учралын ХОМ-д "Их засаг кингс" сургууль шууд байдлаар дурдагдаагүй байна.

Харин Н.Учрал ХОМ-тээ "Их Засаг олон улсын их сургууль" ХХК-ний хувьцааг эзэмшдэг хэмээн мэдүүлжээ. Тус сургуулийн УЗ-ийн даргаар түүний аав Н.Ням-Осор бүртгэгдсэн бол УЗ-ийн дэд даргаар ээж Ж.Цэцэгмаа бүртгэлтэй байгаа юм. Өөрөөр хэлбэл "Их засаг кинг" сургуулийн эцсийн өмчлөгчөөр бүртгэгдсэн Ж.Цэцэгмаа ерөнхий сайдын хувьцаа эзэмшдэг Их Засаг олон улсын их сургуультай холбогдож байна. Иймд төсвөөс тоног төхөөрөмжийн зардал гэж ₮3 тэрбум 520 саяын санхүүжилт авахын завдсан "Их засаг кинг" сургуультай ерөнхий сайд хамааралтай байж таарах нь.

Ерөнхий сайд Н.Учралын ХОМ-ийн дэлгэрэнгүй:

• Өөрийн орлого: 1 тэрбум 784 сая төгрөг
• Гэр бүлийн орлого: 47 сая төгрөг
• Хөрөнгө борлуулсны орлого: 1 тэрбум 972 сая төгрөг
• Орон сууц, барилга байгууламж: 5 тэрбум төгрөгийн үнэ бүхий хоёр авто зогсоол, үйлчилгээний зориулалттай нэг барилга, хоёр зуслангийн байшин, хоёр нийтийн орон сууцтай
• Тээврийн хэрэгсэл: 965 сая төгрөг
• Мал, аж ахуй: 60 сая төгрөг
• Газар: 150 сая төгрөг-
• Үнэт эдлэл: 85 сая төгрөг
• Дансны үлдэгдэл: 2 тэрбум 178 сая төгрөг
• Бэлэн мөнгө: 7 сая төгрөг

Мөн тэрбээр "Их Засаг олон улсын их сургууль" ХХК, "Массив трейд" ХХК, "Грийн Ланд групп" ХХК, "Рояал Академи" ХХК, "Гоц жаалууд цэцэрлэг" ХХК, "Эрдэнэс Тавантолгой" ХК-д хувьцаа эзэмшдэг. Нийт гурван тусгай зөвшөөрлийн эрх эзэмшдэг" хэмээн мэдүүлж байжээ.

Б.САНАА

Өөрийн сэтгэгдлээ илэрхийл

Share Tweet