Өнгөрөгч наймдугаар сар бол дэлхий даяар агаарын температур түүхэнд үзэгдээгүй халуун байжээ. Тодруулбал, Европын Холбооны Коперникийн Уур амьсгалын өөрчлөлтийн алба (C3S) пүрэв гарагт /2026.09.10/ мэдээлснээр наймдугаар сард дэлхийн дундаж температур аж үйлдвэрийн хувьсгалын өмнөх үеийн түвшнээс 1.5 хэмээр давж халсан гэсэн юм.
Өнгөрсөн сард олон улсад уур амьсгалын өөрчлөлттэй холбоотой байгалийн гамшиг олон тохиолдсон. Балба болон Төвөдийн хил дээр олон зуун хүний амийг авч одсон хөрсний нуралт, үерт уур амьсгалын өөрчлөлт тодорхой хэмжээгээр нөлөөлсөн байж болзошгүй гэж эрдэмтэд үзэж байгаа. Мөн Индонез, Грек, Бельги зэрэг оронд ойн түймрийн тохиолдол нэмэгдэж, Унгар болон Румынд хүчтэй ган гачиг нүүрлэсэн.
Дэлхийн дундаж температур аж үйлдвэржилтийн өмнөх үеийнхээс 1.5 хэмээр нэмэгдсэн нь онцгой чухал үзүүлэлт юм. Учир нь Парисын уур амьсгалын хэлэлцээрээр дэлхийн 200 орчим улс 1.5 хэмийн босгыг давахгүй байх зорилго тавьсан.
Наймдугаар сар нь 2025 оны арваннэгдүгээр сараас хойш дэлхийн дундаж температур аж үйлдвэржилтийн өмнөх үеийнхээс 1.5 хэмээр давсан анхны сар болжээ.
Өнгөрсөн сард агаар мандлын дундаж температур 16.96 хэмд хүрсэн байна. Ингэснээр 2023 оны долоодугаар сарын рекорд эвдсэн температуртай адил түвшинд хүрсэн байна. 16.96 хэм гэдэг нь 19 дүгээр зууны дундаж температураас 1.65 хэмээр өндөр үзүүлэлт юм.
Европын Дунд хугацааны цаг агаарын урьдчилсан мэдээний төвийн стратегийн удирдагч Саманта Бөржесс "Бид уур амьсгалын өөрчлөлтийн нөлөөнд хэр зэрэг бэлтгэлгүй байгааг Европ даяар бодитоор мэдэрлээ. Уур амьсгалын өөрчлөлт нь алс хол болдог хийсвэр зүйл гэх ойлголт халагдаж, өдөр тутмын амьдралд шууд нөлөөлдөг бодит асуудал болж байна" гэжээ.
Энэ зун баруун Европын орнууд түүхэндээ байгаагүйгээр хэт халсан. Хэдийгээр хэт халалт өнгөрсөн ч гэсэн улс орнуудад гол мөрний усны түвшин болон хөрсний чийгийн хэмжээ хэвийн түвшнээс бага байгаа юм.
Гэхдээ дэлхийн дулаарал Парисын гэрээний 1.5 хэмийн зорилгыг давсан гэж мэргэжилтнүүд үзэхгүй байна. Учир нь энэхүү босгыг давахын тулд дэлхийн дундаж температур олон арван жилийн хугацаанд тогтмол өндөр байх ёстой. Одоогоор урт хугацааны температурын өсөлт аж үйлдвэржилтийн өмнөх үетэй харьцуулахад ойролцоогоор 1.4 хэмээр өндөр байгаа аж.
Өнгөрсөн долоо хоногт НҮБ мэдэгдэл хийхдээ урт хугацаандаа 1.5 хэмийн зорилтыг баримтлах боломжгүй болсон гэсэн юм. НҮБ тэрхүү мэдэгдлээрээ дамжуулж улс орнуудад уриалга гаргахдаа зорилтот түвшнээс хэтрэх хэмжээг аль болох бага байлгахын тулд улс орнууд нүүрсхүчлийн хийн ялгарлыг илүү хурдтай бууруулах хэрэгтэй хэмээжээ. Эль-Ниньо ирэх саруудад улам эрчимжих төлөвтэй байгаа учир энэ нь дэлхийн дундаж температурыг цаашид өсгөх хандлагатай байна.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.