Монгол Улсад төрөлхийн зүрхний гажигтай оношлогдох хүүхдийн тоо сүүлийн жилүүдэд нэмэгдэж, энэ төрлийн эмгэг хүүхдийн эрүүл мэндийн анхаарах асуудлын нэг болж байна. 2013-2016 онд ЭХЭМҮТ-д төрсөн 10 мянган нярайд төрөлхийн гажиг илрүүлэхэд 2.4 хувьд нь зүрхний төрөлхийн гажиг оношлогдсон нь дэлхийн дунджаас өндөр үзүүлэлт байжээ.
УГТЭ-ийн Зүрхний мэс заслын тасгийн их эмч Н.Баярмаагийн мэдээлснээр хүн амын тоо нэмэгдэхийн хэрээр зүрхний төрөлхийн гажгийн тохиолдол мөн өсөх хандлагатай байна. Одоогоор нийт төрөлтийн 1.5 орчим хувь нь төрөлхийн гажгаар оношлогдож байгаа аж. Үүний 40 орчим хувийг хүүхдийн зүрхний эмгэг эзэлж байна.
Төрөлхийн зүрхний гажиг нь зүрхний таславчийн цоорол зэрэг харьцангуй хөнгөн хэлбэрээс эхлээд нярай үеэсээ яаралтай мэс засал шаарддаг хүнд хэлбэр хүртэл олон янз. Зарим хүүхдийн зүрхний цоорол өсөж томрох явцад өөрөө битүүрэх боломжтой байдаг бол заримд нь эмчилгээ зайлшгүй шаардлагатай байдаг аж.
Удамшил, эхийн жирэмсний үеийн эрүүл мэнд, халдвар, зарим өвчин эмгэг, эмийн хэрэглээ зэрэг олон хүчин зүйл төрөлхийн зүрхний гажигд нөлөөлдөг. Монгол Улс хүүхдийн зүрхний хүнд гажгийн эмчилгээг эх орондоо хийх боломжоо нэмэгдүүлж байна. Өмнө нь Монголд эмчлэх боломжгүй байсан нярайн зүрхний хүнд гажгийн мэс заслын аргыг ЭХЭМҮТ-д нэвтрүүлж, анх удаа 14 хоногтой нярайд зүрхний нээлттэй хагалгаа хийсэн байна.
Мөн УГТЭ-д зүрхний гажгийн мэс заслыг тогтмол хийж, долоо хоногт дунджаар 7-12 хүүхдэд хагалгаа хийдэг байна.
Хүүхэд зүрхний гажигтай төрсний дараа мэс засал хийхээс гадна ийм эрсдэлийг бууруулахын тулд жирэмслэхээс өмнө болон жирэмсний хугацаанд эх, ургийг хамгаалах бодлого шаардлагатай. Төрөлхийн зүрхний гажиг нэмэгдэж байгаа эсэхийг зөвхөн эмнэлгийн ачааллаар бус, шалтгаан, урьдчилан сэргийлэлт, эрт оношилгоо гэсэн гурван түвшинд авч үзэх цаг болжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.