Л.Болдбаатар: Амласан ёсоор Монгол түмэнтэйгээ Төв цэнгэлдэхэд хамтдаа “найрлалаа”. Аав ээждээ дэндүү их талархлаа
Өнгөрсөн бямба гарагт Төв цэнгэлдэх хүрээлэнд "Монголоо дуулна" тоглолтоо амжилтай хийсэн МУГЖ Л.Болдбаатар өөрийн цахим хуудсаараа дамжуулан сонсогчдодоо талархал илэрхийллээ. Тэрбээр "Хайр хүндэтгэл дунд Монголоо дуулсан өдөр өндөрлөж дуучин болох гэж хичээж бүтээсэн 25 жилийн дараах хуанли шинээр эхлэв.
Дулаахан, налгар намрын өдөр олж мэдэрсэн түмэн олныхоо хайр хүндэтгэл, зорин ирсэн хол ойрын үзэгч сонсогчдын баяр жаргалтай харц, хамтран түрэн дуулсан дуу бүхэн чихэнд хадаж сэтгэл хөвсөлзсөн мэдрэмжээ тээсээр өнөөдөр та бүхэндээ дахин баярласан талархсанаа илэрхийлж байна. Хэрэв намайг сонгож сонсдоггүй бол, дуулах л хүсэлтэй мөрөөдлийг минь дэмждэггүй бол үзэгч олон сонсогчгүйгээр би өдий зэрэгт хүрэхгүй байсан. 20 орчим тоглолтыг жил бүр тасралтгүй хийж та бүхэнтэйгээ уулздаг байсан ч "Монголоо хамтдаа дуулсан" энэ мэдрэмж зүрх сэтгэлийг илүү хөдөлгөлөө.
Би та бүхэндээ амласан ёсоор Монгол түмэнтэйгээ Төв цэнгэлдэхэд хамтдаа “найрлалаа”. Бүх насныхан цуглаж, дуулсан дуу бүрийг минь дагаж дуулах тэр мөч бүрт дуучин болгох гэж хүүгээ хөтлөөд гүйж явсан аав ээждээ дэндүү их талархаж зогслоо. Үнэнч үзэгч сонсогчдодоо баярлалаа, намайг дэмжиж урам зориг хайрладаг та нартаа баярлалаа" хэмээн бичжээ.
Б.САНАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.