"Чингис хаан" олон улсын нисэх онгоцны буудлыг Японоос ₮3.5 их наяд зээлж өргөтгөнө

Монгол Улсын Засгийн газар Япон улсын Засгийн газартай "Чингис хаан" олон улсын нисэх буудлыг өргөтгөх 158.3 тэрбум иен буюу 3.5 их наяд төгрөгийн дүнтэй зээлийн гэрээг хийхээр болсон.  

Саяхан Японы Гадаад хэргийн сайд Мотэги Тошимицү Монгол Улсад айлчлах үеэрээ “Чингис хаан” нисэх буудлын өргөтгөлийн асуудлыг хэлэлцсэн билээ.

Тэр үеэр өргөтгөлийн зээлийн дүнг нийт 65 тэрбум иен буюу 1.4 их наядын хөнгөлөлттэй зээл хэмээн яригдаж байсан ч өнөөдрийн (2026.09.22) УИХ-ын Эдийн засгийн байнгын хорооны хурлаар Сангийн сайд З.Мэндсайхан энэ дүнг “3.5 их наяд”-ын зээл гэж танилцуулсан юм.

Японы Олон Улсын Хамтын Ажиллагааны Байгууллага (JICA)-аас зээлдүүлэх санхүүжилт болох 158.3 тэрбум иенийг шинээр барих зорчигч терминалын барилга болон холбогдох дэд бүтцийн ажилд зарцуулж, харин Монголын талаас 38.4 тэрбум иенийг татварын хөнгөлөлт, чөлөөлөлт, ачаа терминалын барилгын зардал, магадлашгүй зардал болон шимтгэл хураамжийн санхүүжилт болгон гаргахаар тохирсон байна.

"Чингис хаан" нисэх онгоцны буудлын өргөтгөлийг 7 жил буюу 2027-2034 онд барьж дуусгах төлөвлөгөөтэйгээр, зээлийн эргэн төлөгдөх хугацааг 40 жил байхаар харилцан тохирчээ. Үндсэн төлбөрөөс чөлөөлөгдөх зээлийн хугацаа нь 10 жил, жилийн 1.1  хувийн тогтмол хүүтэй байх, мөн Монгол Улс 2024 оны дунджаас дээгүүр орлоготой орны ангилалд шилжсэнтэй холбогдуулан энэхүү төсөл нь Японы Засгийн газраас олгож буй нэн хөнгөлөлттэй зээлийн хүрээнд хэрэгжих төсөл гэдгийг З.Мэндсайхан сайд онцоллоо.

Өнөөгийн байдлаар "Чингис хаан" олон улсын нисэх онгоцны буудал нь манай улсын арилжааны бүх нислэгийг хариуцаж байгаа бөгөөд хүчин чадлаасаа гурав дахин их ачаалалтай байдаг нь хүндрэлтэй нөхцөлд тооцогддог аж.

Төслийн хүрээнд 81.9 м2 талбай бүхий зорчигч терминалын барилгыг 2028-2034 оны хооронд шинээр барихаар төлөвлөж буй бөгөөд ингэснээр "Чингис хаан" олон улсын нисэх буудлын жилд хүлээн авах зорчигчийн хүчин чадлыг 1.6 саяас 5.2 сая болгож, одоогийн нисэх онгоцны буудлын хүчин чадлыг 3.2 дахин нэмэгдүүлэх гэнэ.

Төслийн хариуцагч нь Зам тээврийн яам бол төсөл хэрэгжүүлэх байгууллага нь “Хөшигтийн хөндийн Нисэх онгоцны буудал” ТӨХХК байх аж.

Нисэх онгоцны буудлын өргөтгөлийн төслийг хэрэгжүүлэх хугацаа долоон жил, үүнээс барилгын ажил нь 2028-2033 оны хооронд буюу таван жил үргэлжлэхээр тооцжээ.

Өөрийн сэтгэгдлээ илэрхийл

Share Tweet