Монгол Улсын хэмжээнд шатахууны нөөцийн хомсдол үүсээд үндсэндээ хоёр сарын хугацаа өнгөрөөд буй. Учир нь наадмын дараагаас ШТС-уудад дараалах машины тоо ихсэж, нөөц хэвийн хэмжээнээс багасаж эхэлсэн. Иймд иргэд шатахуун ирэхийг хүлээж автомашиндаа хонож эхэлсэн бөгөөд нөхцөл байдал сайжрахгүй хэвээр байсаар өнөөдрийг хүрсэнд бухимдан Төв талбайн урд автомашинтай зогсож эсэргүүцлээ илэрхийлж, жагсах мэдээлэл цахим сүлжээгээр түгж эхэлсэн.
Өчигдөр буюу 10-р сарын нэгний жагсаалын шууд дамжуулалтыг үзэх бол:
-Шатахууны хомсдолоор эхэлсэн жагсаал татварын дарамт, үнийн өсөлтөөр өргөжив-
Улмаар өчигдөр буюу 10-р сарын нэгний өдөр иргэд шатахууны хомсдолыг эсэргүүцэж Сүхбаатарын талбайн урд буюу Төв шуудангийн уулзварыг хааж эсэргүүцлээ илэрхийлж эхэлсэн. Анх шатахууны хомсдолоос үүдэн эхэлсэн тус жагсаал өрнөх явцдаа "Монголын зовлон" болж өрнөв. Ингэж хэлсний учир жагсаалд нэгдэж эхэлсэн иргэд зөвхөн шатахууны асуудал бус татварын дарамт, үнийн өсөлт, инфляц зэрэг өнөөгийн бидний зовлонг эсэргүүцэж Төв шуудангийн уулзварыг хааж зогсов.
Жагсагчид 10-р сарын нэгний 13:00 цагийн орчимд зам хааж эхэлсэн бол шөнийн 23:00 цагийн үед Цагдаа нар иргэдэд уулзвараа чөлөөлөх шаардлага тавьж чөлөөлсөн байна. Үндсэндээ иргэд 10 цаг зам хааж зогссон эсэргүүцлийн жагсаалын үр дүнд гарсангүй. Учир нь Засгийн газар болон холбогдох албаны хүмүүс гарч ирж тэдэнтэй уулзсангүй.
Зарим иргэдэд тус жагсаалыг зохион байгуулалтай хэмээн хардаж байв. Мөн "төв замын уулзвар хааж зогссон нь автозамын ачааллыг нэмэгдүүлж түгжрэл үүсгэж бусад иргэдийг хохироосон үйл явдал боллоо" гэсэн шүүмжлэл өрнөв. Харин энэ талаар жагсаалд оролцсон иргэд "Биднийг тоож ирж уулзах эрх мэдэлтэй, албан тушаалтан алга. Огт ирж уулзахгүй, санал солилцохгүй байгаад харамсаж байна. Тиймээс зам хааж байж бид өөрсдийн санаа бодлоо хүчтэй илэрхийлж, аж байдал, амьдралаа дарга нарт мэдрүүлэхийг зорьж байна" хэмээн тайлбарласан.
Жагсаал үргэлжлэх хугацаанд Засгийн газар болон холбогдох албаны хүмүүс жагсагчидтай биечилж уулзаагүй. Харин төлөөлөл болсон иргэдийг Төрийн ордонд орж ирэх хүсэлт тавьсан аж. Жагсагчдын зүгээс "биднийг зохион байгуулалтай гэж харагдуулахын тулд төлөөлөл болсон хүмүүстэй уулзах санал гаргаж байна. Бид уулзахгүй, харин Загийн газрын төлөөлөл, эрх бүхий албан тушаалтан төв зам дээр гарч ирж бидэнтэй уулз" гэсэн шаардлагыг тавьсан байна.
Жагсаалийн үеэр манай сайтын гэрэл зурагчин О.Улсболдын авсан онцлох зургуудыг хүргэж байна.
Б.САНАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Бид ийм л улсын иргэд юм байна.Бүх зүйлийг улс төржүүлж бүхнийг намын байр сууринаас харна.Бид үнэхээр туйлдаж байна.30 жилийн хугацаанд төр барьсан нам биднийг ямар нийгэмд амьдруулж байгааг нүдээр, биеээр, сэтгэлээр бүхэл зүйлээрээ өдөр бүр мэдэрч байна.Бусад улс орон хөгжил ярьж ахиж дэвшиж амьжиргааны наад захын асуудлаа шийдэж байхад бид ахуйтайгаа зууралдсаар утсан дотроо муудалцсаар.Төрийн ордон хэрүүлийн газар болж ард иргэдийн дээрээс баасаар бид өөрчлөх цаг иржээ.