“Зарим нь С.Жавхлан шиг бие даавал амжилтад хүрч, тодорч болно гэж боддог”

2016 онд Баянзүрх дүүргийнхний итгэл, сэтгэлийг хүлээж бие даагчаар гарч ирсэн С.Жавхлан өнгөрөгч долоо хоногт Ардчилсан намд элсэж байгаагаа зарласан. Улмаар Ардчилсан нам түүнд уугуул нутаг болох Увс аймагт нь УИХ-ын сонгуульд нэр дэвшүүлэхээр болсон юм. АН-д элсэхээсээ өмнө тэрбээр бие дааж нэр дэвшихээ илэрхийлээд байсан билээ. Намд элсэх шийдвэр гаргасных нь дараа түүнтэй цөөн хором ярилцсан юм.

-С.ЖАВХЛАНГИЙН ГАРГАСАН СОНГОЛТ БҮХЭН МЭРГЭН БАЙДАГ-

-Гэнэт л Ардчилсан намд элсэх шийдвэр гаргаад мэдээлэл хийчихлээ. Таныг бие даан нэр дэвшсэн бол илүү ирээдүйтэй байсан гэлцэх юм?

-Би хаанаас, яаж ч нэр дэвшсэн гарна гэдэгтээ итгэлтэй байна. Бие дааж нэр дэвшсэн ч түмэн олон намайг сонгоно.

-Яагаад Ардчилсан намыг сонгов?

-Сөрөг хүчнийхний хувьд би дүгнэлтээ өгсөн. Өргөн олон ч гэсэн харж, дүгнэлтээ хийсэн байх. С.Жавхлангийн гаргасан сонголт болгон мэргэн байдаг. Би өөрийнхөө гаргасан шийдвэр бүртээ итгэлтэй байдаг. Ганцаараа явсан С.Жавхлан олуулаа болж байна. Миний үзэл баримтлал түгэн дэлгэрэх эрин үе эхэлж байна. Нөгөө талаар энэ бол миний улстөрийн шийдвэр. Хүн чинь урам авч байгаа, өөрийг нь дэмжиж байгаа газарт л очдог. Миний мөрийн хөтөлбөр мөн таарч байгаа гэж хэлж болно.

-100 саяын дэнчингээ намдаа өгчихсөн үү?

-Бодлогын хүрээнд ийм зүйл яригдаагүй байгаа.

-Өнгөрсөн дөрвөн жил өөрийгөө хэр сайн ажилласан гэж дүгнэх вэ?

-Ганц хүн үгээ хэлэх, дуу хоолойгоо хүргэхэд маш их хүчгүйддэг юм байна лээ. Хэд хэдэн хууль өргөн барьсан ч хүлээж аваагүй, хэлэлцээ ч үгүй.

-ГАНЦ ХҮН ХҮЧГҮЙДДЭГ ЮМ БИЛЭЭ. ХУУЛЬ ӨРГӨН БАРИХАД ХЭЛЭЛЦЭЭГҮЙ-

-УИХ-ын нэг гол үүрэг нь хууль санаачлах, батлуулах байдаг. Та хичнээн хууль санаачлав?

-Намгүй, бүлэггүй, эвсэлгүй ганц хүн хууль санаачлан өргөн барих хэцүү. Өнгөрсөн дөрвөн жил хэд хэдэн хууль санаачилсан ч харамсалтай нь хүлээж аваагүй. Үүний нэг нь оффшорчдын эсрэг хууль байсан. Оффшор буюу “Офт шаарчид” уул уурхайн лецинз, архи мансууруулах бодисын арилжаа хийдэг, хууль бус үйлдэл, мөнгө санхүүтэй холбоотой, оффшор данс нээсэн зэрэг асуудалд орооцолдсон нөхдүүдийг дахиж УИХ-ын сонгуульд оруулахгүй байх хуулийн нэмэлт, өөрчлөлт боловсруулсан.

-Бие даагчдын нэр хүнд нилээдгүй унасан. Ямар ч зорилго зорилтгүй орж ирцгээж, мөрийн хөтөлбөрөө хэрэгжүүлж чаддаггүй гэх шүүмжлэл дагууллаа. Энэ тал дээрита ямар байр суурь илэрхийлэх вэ?

-Хуулиараа дандаа намыг дэмжсэн зохицуулалттай, тогтолцоотой. Энэ нь нэг том тээг. Нөгөө талаар бие даагчид олноороо гарч ирж, ингэлээ тэглээ гэж шүүмжилж байгааг би үгүйсгэж байна. Яагаад гэвэл Монгол орны төлөө зүрх сэтгэл чинь цохилж л байвал чи хэн байх нь хамаагүй. Чи дуучин байна уу, гагнуурчин байна уу, зохиолч байна уу сонин биш. Зүрх сэтгэл чинь цохилж байвал Монголынхоо төлөө цохилуулаач ээ гэдгийг л хэлмээр байна. Олон бие даагчид гарах болсон нь цаг үеийн шаардлагатай холбоотой. Нөгөө талаар зарим нь С.Жавхлан шиг бие даавал гараад ирдэг юм байна, амжилтад хүрдэг юм байна, тодорч болдог юм байна гэж бодсон байж магадгүй. Тэд зөвхөн С.Жавхлангийн амжилтыг харсан байж магадгүй. Тэр хүмүүст С.Жавхлангийн тэмцлийг олж хараарай гэж хэлмээр, уриалмаар байна. Үүнд нэгдэж орж ирсэн бие даагч байгаа юу, үгүй юу гэдгийг асуумаар байна.

-Нэг хэсэг ШИНЭ намд элссэн байсан.

-ШИНЭ эвсэлд нэг хэсэг орж явсан. ШИНЭ нам болох явцад нь оролцоогүй. Өөрөөр хэлбэл намд нь элсээгүй. Эл намын удирдлагуудтай дөрөв таван ч аймгаар явж, хамтран ажилласан.

-Үзэл бодол нийлэхгүй байсан уу?

-Ерөнхийдөө тийм хэж хэлж болно. Өөр өөр зорьсон зорилготой хүмүүс.

-ДАРААГИЙН ДӨРВӨН ЖИЛ БИ ЭВИЙН ТӨЛӨӨ ТЭМЦЭНЭ ГЭСЭН ГАНЦХАН ЗОРИЛГОТОЙ-

-Дараагийн дөрвөн жил юу хийх төлөвлөгөөтэй байна вэ?

-Эвлэсэн цагтаа Монголчууд дэлхийд мандаж явсан байдаг. Энэ дөрвөн жил С.Жавхлан дандаа үнэний төлөө тэмцэж ирлээ. Дараагийн дөрвөн жил би эвийн төлөө тэмцэнэ гэсэн ганцхан зорилго өвөртөлж сууна. Эл тэмцэл маань эхэлж байна гэж ойлгох хэрэгтэй. Би Монголчуудаа эвлүүлж авч явах аянд мордож байна.

-Тантай уулзсаных асуухгүй үлдээж болохгүй байх. Өнгөрсөн жил У.Хүрэлсүхийн Засгийн газрыг авч үлдэх эсэх шийдвэр дээр таны кнопоо зарсан гэж хэвлэлээр баахан шуугисан. Та үүнд ямар тайлбар өгөх вэ?

-Тухайн үед нь хариулт өгч л байлаа. “Гуравдугаар үеийнхнийг хоолонд оруулмааргүй байна” гээд. Нэг хэсэг хүмүүсийг оруулаад тэд нь идэж аваад гараад явдаг хоолны газар биш ээ. Монголын төр тогтвортой байх ёстой гэдэг улстөрийн шийдвэрийг л би гаргасан. Улстөрийн тохироо биш, өнөөдрийн гаргаж байгаа шиг С.Жавхлангийн улстөрийн шийдвэр байсан. Энэ тухай би тун тодорхой хэлж байсан шүү дээ. Би кнопоо зарсан бол, хардах үндэслэл байгаа бол тэрийгээ гаргаад ирэх хэрэгтэй.

-Цаг зав гарган ярилцсанд баярлалаа.

-Баярлалаа.

Энэ мэдээнд өгөх таны үнэлгээ

Хуваалцаарай Жиргээрэй