Сүхбаатарын талбайд үнэ төлбөргүй элэгний үзлэг шинжилгээ хийж байна

Өнөөдөр /2019.07.26/ элэгний үзлэг, оношлогоо, шинжилгээг үнэ төлбөргүй хийх нээлттэй өдөрлөг 11.00-16.00 цагт болно. Дэлхийн хепатитийн эсрэг өдрийг тохиолдуулан “Хепатитийг устгах ажилд хувь нэмэр оруулья” уриан дор Эрүүл мэндийн яам, Нийслэлийн Эрүүл мэндийн газар, Дэлхийн эрүүл мэндийн байгууллага, Нийгмийн эрүүл мэндийн үндэсний төв, Эрүүл мэндийн даатгалын ерөнхий газраас хамтран үнэ төлбөргүй үзлэг шинжилгээ хийх өдөрлөг зохион байгуулагдаж байна.

Тус өдөрлөгт ХСҮТ, ХӨСҮТ, УНТЭ, УХТЭ, УГТЭ болох нийслэлийн зургаан дүүргийн эрүүл мэндийн төв, Мөнгөн гүүр эмнэлэг, Монос групп, Оном сан, “Монгол эм импекс” концерн зэрэг мэндийн байгууллагууд иргэдэд үзлэг оношилгоо хийж, хепатитийн В, С вирусын илрүүлэг шинжилгээнд Эрүүл мэндийн даатгалгүй иргэдийг хамруулан зөвлөгөө өгч, эрүүл мэндийн сургалт сурталчилгаа хийж байна.

Жил бүрийн 7 дугаар сарын 28-ны өдрийг ДЭМБ-ын гишүүн орнууд хепатиттай тэмцэх дэлхийн өдөр болгон тэмдэглэдэг бөгөөд дэлхий дээр 325 сая хүн вируст хепатитийн халдвартай амьдарч жил бүр 1.4 сая хүн нас барж байна. Нас баралтаар сүрьеэ өвчний дараа ордог, ХДХВ/ДОХ-ын халдвараас 9 дахин илүү хүн вируст хепатитийн халдвараар өвчилж байна. Сүүлийн 20 жилд вируст хепатитийн нас баралт ихэсч байгаа нь дэлхий дахинд уг өвчний талаар мэдээлэл муу байгаатай холбоотойг судалгаагаар баталсан байдаг.

С.ХОНГОРЗУЛ

Өөрийн сэтгэгдлээ илэрхийл

Share Tweet