ХӨСҮТ: ХДХВ-ийн халдвартай 20 эмэгтэйгээс 36 нь хүүхэд төрсөн, халдвар дамжсан тохиолдол байхгүй

Олон нийтийн сүлжээгээр нэр бүхий иргэдийг ХДХВ /Хүний дархлал хомсдолын вирус/ халдвартай, түүнээс ХДХВ-ийн халдвартай хүүхэд төрсөн гэх мэдээлэл гарсан. Тэгвэл үүнийг Халдварт өвчин судлалын үндэсний төвөөс үгүйсгэж дараах мэдэгдлийг гаргасан байна.

Тухайлбал, ХДХВ-ийн халдвартай хүмүүст эмнэлгийн тусламж үйлчилгээ үзүүлдэг тандалт, судалгаагааг хариуцдаг мэргэжлийн байгууллагын хувьд дээрх мэдээлэлд албан ёсны тайлбар мэдэгдэл гаргаж байна. ХДХВ-ийн халдварын анхны тохиолдол 1992 онд бүртгэгдсэнээс хойш өнөөдрийн байдлаар нийт 451 тохиолдол бүртгэгдсэн. 2026 онд ХДХВ-ийн халдварын 24 шинэ тохиолдол оношлогдсон байна. Нийт тохиолдлоос нас барсан 73, гадны улс орнуудад амьдарч байгаа 40, эрүүл мэндийн байгууллагын хяналтад тогтмол үзлэг, шинжилгээ, эмчилгээнд хамрагдаж байгаа 322 /95.2 хувь/ хүн байна.

Хувь хүний нууцын тухай хууль тогтоомжийн дагуу эдгээр хүмүүсийн эрүүл мэндийн талаарх мэдээлэл нууцлалын өндөр зэрэглэлтэй хамгаалагдсан байдаг. Мөн ХДХВ-ийн халдвартай хүмүүст тусламж үзүүлж байгаа эрүүл мэндийн байгууллага, эмч мэргэжилтнүүдэд "Нууцлалын гэрээ" байгуулж ажилладаг.

ХДХВ-ийн халдварын 99.7 хувь нь бэлгийн замаар дамжиж халдварласан, ХДХВ-ийн халдвартай амьдарч байгаа 20 эмэгтэйгээс 36 нь хүүхэд төрсөн, тэдгээрээс 15 эх нь давтан төрсөн ба эхээс хүүхдэд халдвар дамжсан тохиолдол бүртгэгдээгүй. Цахим орчинд тархаж буй энэхүү мэдээлэл нь үндэслэлгүй, хүний нэр төрд санаатайгаар халдаж байгаа хуурамч мэдээлэл болохыг мэргэжлийн байгууллагын зүгээс мэдэгдэж байна" гэлээ.

Б.САНАА

Өөрийн сэтгэгдлээ илэрхийл

Share Tweet