Мөнгөгүй Ерөнхий сайд, улстөржүүлэгч Ерөнхийлөгч

СОНГУУЛИЙН ӨМНӨ МӨНГӨТЭЙГӨӨ ЗАРЛАЖ, ДАРАА НЬ ҮГҮЙРСНЭЭ МЭДЭГДЭВ

МАН-ын дарга бөгөөд Ерөнхий сайд У.Хүрэлсүх: Энэ Монгол Улсад тань хүнд үед хэрэглэхээр хадгалсан хэд гурван төгрөг бий. Тэр мөнгөө одоо ард түмэндээ зарцуулна гэх утга бүхий агуулгыг өнгөрөгч дөрөвдүгээр сард хэлж байв. Ингэхдээ тэрбээр, хүүхдийн мөнгийг 100 мянган төгрөг болгох, ААН-үүдийн НДШ, ААНОАТ тэргүүтнийг зургаан сарын хугацаанд тэглэж, бүх төрлийн зээлийн төлөлтийг хойшлуулах зохицуулалт хийхээр болсноо өөрийн биеэр зарласан билээ. Энэ бол УИХ-ын сонгуулиас ердөө хоёр сарын өмнөх явдал.

Тухайн үед нь "Сонгууслийн дараа ч амьдрал үргэлжилнэ. Төсөв мөнгө тань хүндрэхгүй юм уу” гэж сэтгүүлчийн хувиар хэвлэлийн хурал дээр сануулж байв. Гэтэл орон нутгийн сонгуулийн дараа яг нэг сар болоод У.Хүрэлсүхийн Засгийн газар үндсэндээ мөнгөгүй болсноо өчигдөр зарлалаа. Юун нөгөө дөрөвдүгээр сард дотоодын цар тахалгүй үеийн хайлж урссан эдийн засгийн төлөвлөгөө, түүнийгээ бүр мартжээ. Эдүгээ авч хэрэгжүүлэх 23 арга хэмжээн дотор илгээмжийг сайн ариутгах, гаалийн цахим шилжилтийг түргэвчлэх, соёлын нэвтрүүлэг бэлдэх гэхчлэн агентлагийн дарга нарын өглөөний хурал дээр л шийдчих асуудлууд багтсан нь хачирхал төрүүлнэ.

МЕССЭЖ: ААН-ҮҮД ӨӨРСДИЙГӨӨ АРГАЛ, ӨРХҮҮД ХҮҮХДИЙН МӨНГӨӨРӨӨ АМЬДАР

Дотоодод вирүсийн тархалтаа алдаж, хатуу хөл хорионд буй энэ үеийг бодвол өнгөрсөн хавар бид тэнэгэр уужим байжээ. У.Хүрэлсүхийн Засгийн газрын зарласан санхүүгийн арга хэмжээ нь ч чанартай байсан тул ААН-үүд дажгүй аравдугаар сартайгаа золгосон. Харин эдүгээ тэд оны өмнөх хуримтлалаа энэ саруудад шавхаж, ер нь маш хүнд байдлаас татварын төлөлтүүдээ хийж, ажилчдаа цалинжуулж явахаас өөр аргагүй болов.

Иргэдийн хувьд ч тэр, ядаж л түлээ түлшний зардал нэмэгдсэн үедээ хөл хорионд сууж таарав. Бүтэн 20 хоногийн хатуу дэглэмийн үед гэр хороололд хагас өлсгөлөнд нэрвэгдсэн айл өрх асар их. Цаашлаад түлшээ худалдаж авахад ч бэрхшээл үүсэх нь тодорхой. Багцалж хэлбэл, У.Хүрэлсүхийн Засгийн газрын сонгуулиас өмнө өгсөн дэмжлэг жинхэнэ утгаараа эдүгээ л хэрэгтэй байна. Гэвч Ерөнхий сайд, Сангийн сайд нар хүүхдээ хүүхдийн 100 мянгаараа л аргалж бай, ААН-үүдийг бол нэг их харж үзэхгүй гэдгээ зарлав.

ЯДАХАД ЕРӨНХИЙЛӨГЧИЙН УЛСТӨР ДУУСАХГҮЙ

Засгийн газрын мөнгөний гахай ер нь хоосорч буйг мэдсэн Ерөнхийлөгч ийм үед зөвхөн өөрийгөө бодсон шинжтэй улстөржилт хийж, У.Хүрэлсүхэд нэрмээс болов. Яаж ч бодсон, Засгийн газарт өрхүүдэд 1 сая төгрөг тараагаад суух боломж байхгүй. Вирүс намжсаны дараа ч амьдрал байгаа болохоор эх адаггүйгээр жаахан нөөцөө тавиад туучихгүй нь тодорхой билээ. У.Хүрэлсүхийн ийм эмзэг, зовлонтой байдал дээр Ерөнхийлөгч харин ч нэг сайн тоглож чадлаа.

Тэр их удахгүй шиг л өрхүүдэд 1 сая төгрөг өгсөн бол байдал ингэж доройтохгүй байсан гэх агуулгаар улстөржилтөө хийж эхэлнэ. Өнгөрсөн удаад тэр 30 мянган хонь, ахмадын зээлийг тэглэх ажлуудыг ТӨХК-иудыг түшиглэн хийсэн. Энэ удаа Монголбанкийг түшиж мөнгө хэвлэх лобби хийдэггүй л юм бол Засгийн газарт Ерөнхийлөгчийн хүссэн нөөц байхгүй. ҮАБЗ дээр ч яриагүй асуудлаараа тэр ингэж У.Хүрэлсүхэд битүү цохилт өглөө. Битүү шарх эдгэхдээ их л удаан бөгөөд ямагт хортой байдаг талтай.

ДҮГНЭЛТИЙН ОРОНД: Засгийн газрын өчигдөр хийсэн мэдэгдлийн дараах уур амьсгалаас харахад, иргэд үнэхээр халамжийн бодлого хүлээж байгаа ч Засгаас өмнөх тэлэлтээрээ барих бодлого хэрэгжүүлнэ. Ерөнхийлөгч зөрүүлээд олон нийтийн уур амьсгал дээр масс эргүүлэх дараачийн тоглолтоо хийх хүлээлт үүсэв. Тодорхой байгаа зүйл нь, Засгийн газар үнэхээр мөнгөгүйдэж эхэлсэн, тэд эдүгээ том дуугарч болох улстөрийн амлалтаас харин ч ухаалгаар татгалзлаа. Мэдээж ирэх хор уршиг нь нэлээд их байна. Эцэст нь Ерөнхий сайд маань үнэхээр мөнгөгүйджээ гэх эерэг үгээр л түүнийг бяцхан өмөөрч болох ч...

Энэ мэдээнд өгөх таны үнэлгээ

Хуваалцаарай Жиргээрэй