Н.Энхбаяр хоёр сайдын суудал НЭХЭЖ, С.Ганбаатар үнэд орох ЦЭГ хайж явна

Ерөнхийлөгчийн сонгуулиар МАХН-ын дарга Н.Энхбаяр МАН-ын нэр дэвшигчийг дэмжиж оролцоно гэдгээ маш тодорхой илэрхийлж, 100 жилийн ойгоор нь цэцэг хамтдаа өргөчихсөн. Гэвч яг нэр дэвшигчид СЕХ-нд бүртгүүлэх хүртэл зай ч байна, лай ч байна. Яг эцсийн байдлаар тохирохгүй л бол Н.Энхбаяр шуудхан 300 мянган хүний санал өлхөн авчих С.Ганбаатарыг намаасаа дэвшүүлчихнэ гэж хөшигний ард тулгаж суугаа. Нөгөө талд Н.Энхбаярт туйлын ашигтай хөзөр болж, өөрөө хоосон үлдэх эрсдэлтэй тулсан С.Ганбаатар ч зүгээр суухгүй. Хувь улстөрчөө үнэд хүргэж болох бүх өнцгүүд дээр зэрэг ажиллаж эхэллээ.

Н.ЭНХБАЯР МАН-ААС ХОЁР САЙДЫН СУУДАЛ, ӨӨРӨӨ ШАДАР САЙД ЮМ УУ НҮБ-Д СУУХ ВИЗ ХҮСЧЭЭ

МАХН-ын дарга Н.Энхбаяр хүү Э.Батшугараа СХД-ийн нөхөн сонгуульд эрх баригч намаас нэр дэвшүүлэх, өөрөө НҮБ-д төлөөлөгчөөр суух, залуусаа Засгийн газарт оруулах хүсэлт тавьсан талаар бид өмнө нь мэдээлж байв. Уг асуудлаар МАН-ын генсек Д.Амарбаясгалан, Ерөнхий сайд Л.Оюун-Эрдэнэ нарыг багтаасан ажлын хэсэг байгуулах асуудал ч яригдсан байдаг. Тэгвэл уг асуудал одоо ямар шатанд яваа вэ.

Одоогоор МАХН-ын дарга хоёр сайдын суудал, нэжгээд агентлагийн даргын албан тушаал хүссэнээс гадна өөрөө Шадар сайд болох хүсэлт тавьсан гэх. Тэр бүр Ерөнхийлөгчөөс буусныхаа дараа НҮБ руу явах амбицтай байсан, үүнийгээ Шадар сайдын суудлаар сольж болох агуулга саяхан тулгасан бололтой. Түүний сонирхож байгаа яам нь Эрчим хүч, ХХААХҮ. Гэхдээ эл асуудлаа төдийлөн шамдаж ярихгүйгээр С.Ганбаатарыг нэр дэвшүүлвэл юу болох талаар эрх баригчдад боловсноор сануулж яваа гэх.

Н.Энхбаярын энэ үйлдлийг СЕХ-нд нэр дэвшигчээ бүртгүүлэх өдрийг дөхүүлж байж, идэвхтэй хэлцэлд орох төлөвлөгөө гэж МАН-ынхан харж байгаа аж. Тэдний зүгээс дэд сайд, яамдын газрын даргын суудал залууст нь өгөх хувилбар дээр хэлцэл хийхээр бэлдсэн гэх мэдээлэл байна. Гэвч сонгуульд нэгдэж орвол сайдын суудал өгөхөөс аргагүй гэх яриа МАН дотор хөвөрч буй.

С.ГАНБААТАР ЕРӨНХИЙЛӨГЧИЙГ ТҮШИНГЭЭ НЭР ДЭВШИХ ГАРЦ ЭРЭЛХИЙЛЖ ЯВНА

УИХ-ын гишүүн С.Ганбаатар МАХН, ИЗНН, Монголын уламжлалын нэгдсэн намын "Та бидний эвсэл”-ээс нэр дэвшиж, парламентад суусан. Уг эвслээс МАХН гараад явчихаар нэгдэл хэвээр үлдэх эрхзүйн боломжтой юу гэх асуулт үүсч байна. Тэрбээр нийгэмд шинэ уур амьсгал үүсгэх асуудлаар АН, МАН-ын залуустай уулзсан, өөр боломжууд хайж яваа гэх мэдээллүүд яригдах болов.

Яаж ч бодсон С.Ганбаатар Ерөнхийлөгчийн сонгуульд нэр дэвших амбицаасаа шуудхан салчих хүн биш. Мөн л СЕХ-д бүртгүүлэх  хугацаа хүртэл бүх боломжоо хайна гэсэн үг. Үүнд Н.Энхбаяр МАН-тай тохирч чадахгүй бол намаасаа дэвших сонголт ч багтаж буй. Нөгөө талд талбайн жагсаал, С.Батболдын талаарх акци тэргүүтнээрээ тэр Ерөнхийлөгч Х.Баттулгыг “налсан” гэдэг нь маш тодорхой харагдаж буй. Ямар ч эрх ашиггүй, эх орныхоо төлөө Ерөнхийлөгчийн дууч болсон гэвэл түүн шиг худлаа зүйл гэж үгүй.

Тэгэхээр С.Ганбаатар ч тэр, Н.Энхбаяр ч тэр, Ерөнхийлөгчийн сонгуулийн өмнө бүдүүлгээр хэлэхэд хар зах дээр таван төгрөг нэмж, өрөөсөн гутлаа зарахаар зогсоо наймаачин аятай болтлоо доошоо орцгоосон улс л болцгоов. Тэдний хэнийг нь ч өнөөдөр зөвтгөж, буруутгаж үзэх аргагүй мэт “жижгэрчээ”. Нийтийн эрх ашгийн төлөө явах ёстой улстөрч гэхээсээ илүү хувь хүний ахуйн шуналаар асуудалд хандаж буй амьдрахын төлөө тэмцэгсэд гэлтэй харагдах болсон нь ч нууц биш.

Энэ мэдээнд өгөх таны үнэлгээ

Хуваалцаарай Жиргээрэй